Zialenski: Padarunki Pucinu nie pryniasuć miru i nie daduć nijakaj karyści cyvilizavanamu śvietu

«Miru dziakujučy słabaści nikoli nie byvaje. Siońnia ŭ Kijevie byli pradstaŭniki Kanhresa ZŠA — dvuchpartyjnaja delehacyja. Ja ŭdziačny im za vizit va Ukrainu ŭ taki składany čas. Jany spytali: «Što treba, kab skončyć vajnu?»

Adkaz musić być rašučym. Pavinny być sankcyi ŭ adpaviednaści z zakonam Lindsi Hrema, pavinna być padtrymka Ukrainy ŭ abaronie žyćciaŭ i musić być cisk na Rasiju za vajnu. A siońnia adbyłasia razmova lidaraŭ Amieryki i Rasii. Razmova, jakaja viadzie da inšaha.

Niadaŭna Jeŭropa pryniała rašeńnie źniać sankcyi z rasijskich aliharchaŭ. Paśla hetaha rasijskich udaraŭ i ździekaŭ ź ludziej stała tolki bolš. Tolki za hety tydzień — žorstki rakietny ŭdar Rasii pa domie ŭ Pryłukach, avijabomby pa Kramatorsku, pa zvyčajnych haradskich aŭtobusach, pastajannyja abstreły enierhietyčnych abjektaŭ Kijeva, infrastruktury, nieabchodnaj dla žyćcia, u Dniapry, Charkavie, Adesie i inšych našych haradach. Dziasiatki zahinułych i sotni paranienych.

Rasijanie kampiensujuć takim teroram svaju niazdolnaść dasiahnuć pastaŭlenych pierad imi metaŭ na froncie. Sioleta Rasija na froncie słabiejšaja, čym u luby inšy pieryjad vajny. Mienavita tamu Pucin raźličvaje na teror. Mienavita tamu jon raźličvaje na sproby kułuarnych damoŭlenaściaŭ pra toje ci inšaje źmiakčeńnie cisku na Rasiju, kab vyjhrać jašče čas i atrymać mahčymaści dla praciahu vajny.

Luboje źmiakčeńnie sankcyj suprać Rasii biez vyraznaj i praciahłaj damoŭlenaści ź joj ab deeskałacyi — heta vidavočnaja słabaść. Heta pracuje na karyść Rasii, spryjaje tamu, što jana budzie zabivać bolš ludziej, vajavać daŭžej, jašče mienš pavažać Amieryku i nanosić śvietu jašče bolšyja straty i škodu.

Ukraina hatovaja da ŭzajemnych krokaŭ pa deeskałacyi, i amierykanskaja kamanda viedaje našu pazicyju. Našy ŭdary pa rasijskich naftapierapracoŭčych zavodach i inšych naftavych abjektach — heta adkaz na šmathadovuju kampaniju Rasii pa terory suprać ukrainskaj enierhietyki.

Ukraina nie budzie palić rasijskija naftapierapracoŭčyja pradpryjemstvy, kali Rasija nie budzie razburać našu enierhietyku. My prapanujem Amierycy mienavita takuju damoŭlenaść i ličym, što Złučanyja Štaty majuć dastatkova ŭpłyvu, kab dasiahnuć hetaha kampramisu.

Padarunki Pucinu nie pryniasuć miru i nie daduć nijakaj karyści cyvilizavanamu śvietu. Rasija «adździačyć» za dyziel dalejšym teroram i podłaściami. Dazvoł Rasii pradavać naftapradukty — heta inviestycyja ŭ vajnu, jakuju treba skončyć, a nie praciahvać. Nieabchodnaja sapraŭdnaja deeskałacyja z Rasijaj i ŭ lustranym farmacie.

Raźličvajem na spraviadlivuju padtrymku z boku Amieryki ŭ abaronie našaha žyćcia i našych ludziej va Ukrainie, a taksama na adpaviednuju rašučuju razmovu Złučanych Štataŭ z Rasijaj. Rašučuju, a nie słabuju», — napisaŭ prezident Ukrainy.

• 14
• 0
• 0
• 0
• 0
• 1
• 0
• 2