Novaja rasijskaja rakieta «Filin»: čym jana niebiaśpiečnaja i jak moža zamianić šachiedy

Ciapier hetyja novyja rakieta-drony zmohuć jašče dalej dastavać tyłavyja rehijony krainy, bo zajaŭlenaja dalnaść palotu «Filina» — 1200 kiłamietraŭ, u toj čas jak ciapierašnija reaktyŭnyja šachiedy ŭ roznych madyfikacyjach laciać značna mienš.

Pa danych HUR, rakietu raspracavała AAT «NVA «Małanka», što ŭvachodzić u skład karparacyi «Taktyčnaje rakietnaje ŭzbrajeńnie». U raźviedcy adznačajuć, što «Filin» — heta praciah tendencyi rasijskaha VPK da stvareńnia adnosna niedarahich srodkaŭ pavietranaha napadu z reaktyŭnaj ciahaj i naziemnym zapuskam.

Pa infarmacyi viedamstva, rakieta maje kampazitny fiuzielaž z vuhle– i škłapłastyku daŭžynioj 3,5 mietra i razmacham kryłaŭ 3 mietry. Častku elemientaŭ vyrablajuć z dapamohaj 3D-druku.

Zajaŭlenaja maksimalnaja chutkaść «Filina» — da 800 km/h, dalokaść palotu — da 1200 km. Rakieta moža dziejničać jak na samych nizkich vyšyniach, tak i na vyšyni da 6 km. Isnujuć madyfikacyi z bajavoj častkaj masaj 50 i 100 kh. Zvonku jana trochi nahadvaje «Hierań-5» apošniaha pakaleńnia na reaktyŭnym ruchaviku, ale lacić značna pavolniej.

Pusk rakiety ažyćciaŭlajuć z naziemnaj ustanoŭki z dapamohaj parachavoha paskaralnika. U HUR taksama vyśvietlili, što bartavoje abstalavańnie dla «Filina» vyrablaje rasijskaja kampanija TAA «PŁAZ», jakaja biare ŭdzieł u vytvorčaści bieśpiłotnikaŭ «Harpija». Pa danych raźviedki, błoki abodvuch vyrabaŭ majuć padobnuju kampanoŭku i markiroŭku.

Naviadzieńnie rakiety na cel zabiaśpiečvajuć iniercyjalnaja navihacyjnaja sistema kitajskaj vytvorčaści i 16‑kanalnaja sistema «Kamieta». U toj ža čas analiz elemientnaj bazy pakazaŭ pavieličeńnie doli kitajskich kampanientaŭ u paraŭnańni ź inšymi rasijskimi rakietami i bieśpiłotnikami.

Jak adznačajuć u HUR, ruchavik «Filina» — rasijski. Havorka idzie pra R500 vytvorčaści TAA «Rejnalds». Anałahičny ruchavik raniej identyfikavali ŭ kryłatych avijacyjnych rakietach S-71K «Kavior» i S-71M «Manachrom».

Novaja pahroza zamiest šachiedaŭ

Napiaredadni ministr abarony Ukrainy Jaŭhien Chmara zajaŭlaŭ, što Minabarony pracuje nad zabieśpiačeńniem dronami-pierachopnikami, avijacyjaj i bojeprypasami da jaje, zienitnymi rakietnymi i artyleryjskimi kompleksami, turelami, srodkami REB i inšymi rašeńniami dla supraćpavietranaj abarony Ukrainy.

«My taksama viedajem, jakija rašeńni Rasija raźvivaje, heta tyčycca reaktyŭnych dronaŭ z chutkaściu 800 km. Pracujem i nad pošukam supraćdziejańnia nastupnamu pakaleńniu pahroz. Adpaviednyja zadačy — padać prapanovy i pratatypy — pastaŭlenyja vytvorcam, APK», — skazaŭ Chmara.

Pa danych krynic Bi-bi-si ŭ Minabarony, jon mieŭ na ŭvazie mienavita «Filina». Rakiety, drona-rakiety abo baražavalnyja bojeprypasy, jakija pavialičvajuć svaju chutkaść da 800—900 km/h, stanoviacca jašče bolš składanymi celami dla pierachopnikaŭ, čym zvykłyja šachiedy i pieršyja pakaleńni reaktyŭnych šachiedaŭ.

Jaŭhien Chmara taksama raskazaŭ žurnalistam, što Ukraina ŭžo maje paśpiachovyja vyniki prymianieńnia dronaŭ-pierachopnikaŭ suprać reaktyŭnych bieśpiłotnikaŭ.

«Adno z padraździaleńniaŭ padčas bajavoha prymianieńnia piaćciu pierachopnikami («Bars») źniščyła piać pavietranych celaŭ. To-bok vynikovaść 100%», — skazaŭ ministr.

Pa jahonych słovach, adnym z najbolš efiektyŭnych srodkaŭ baraćby z reaktyŭnymi bieśpiłotnikami zastajecca avijacyja.

Raniej Bi-bi-si pisała, što era zvykłych dronaŭ-pierachopnikaŭ suproć šachiedaŭ i pieršych pakaleńniaŭ reaktyŭnych šachiedaŭ adychodzić u minułaje, a sa źjaŭleńniem novych madyfikacyj drona-rakiet z chutkaściu 800—900 patrebnyja novyja srodki ich źbivańnia. Dla hetaha patrebnyja buduć chutkasnyja pierachopniki z reaktyŭnymi ruchavikami, jakich va Ukrainie nie staje.

• 0
• 0
• 0
• 1
• 1
• 2
• 4
• 0