Cyhareta dapamahaje sacyjalizavacca? Vialikaje daśledavańnie pakazała advarotnaje

Pra škodu kureńnia dla zdaroŭja viadoma vielmi šmat, a voś jaho suviaź z sacyjalnym žyćciom daśledavałasia značna mienš. Pryčym raniej navukoŭcy čaściej zadavalisia pytańniem, ci moža adzinota padšturchoŭvać čałavieka da kureńnia. Kamanda navukoŭcaŭ ź Impierskaha kaledža Łondana vyrašyła pahladzieć na suviaź ź inšaha boku. Pra vyniki daśledavańnia, pradstaŭlenaha na kanhresie Jeŭrapiejskaha reśpiratornaha tavarystva (ERS) u Barsiełonie, piša Medical Xpress.

Da hetaha daśledčyki ŭžo nazirali za padžyłymi ludźmi ŭ Anhlii i vyjavili, što kurcy z časam stanavilisia bolš samotnymi i sacyjalna izalavanymi. Adnak zastavałasia niezrazumiełym, ci nie tłumačycca heta asablivaściami brytanskaha hramadstva. Tamu ciapier navukoŭcy vyrašyli pravieryć, ci nazirajecca takaja suviaź u inšych krainach.

Jany praanalizavali źviestki bolš jak 50 tysiač čałaviek z 15 krain, jakija ŭdzielničali ŭ jeŭrapiejskim daśledavańni zdaroŭja i stareńnia SHARE. Siaredni viek udzielnikaŭ składaŭ 67 hadoŭ, 22% ź ich na pačatku daśledavańnia kuryli, a 48,5% mieli bolš za dva chraničnyja zachvorvańni.

Uzrovień adzinoty aceńvali z dapamohaj škały adzinoty UCLA. Jana ŭličvaje, jak časta čałavieku brakuje kampanii, jon adčuvaje siabie pakinutym abo izalavanym ad inšych. Praz dva hady ŭdzielniki znoŭ prajšli takoje ž apytańnie.

Akazałasia, što kurcy ŭžo na pačatku daśledavańnia ŭ siarednim adčuvali siabie bolš samotnymi, čym ludzi, jakija nie palili. Za nastupnyja dva hady adčuvańnie adzinoty ŭ ich taksama ŭzmacniałasia chutčej. Suviaź zachoŭvałasia i paśla taho, jak daśledčyki ŭličyli viek, poł i inšyja čyńniki.

Pry hetym pamiž roznymi rehijonami Jeŭropy vyjavili tolki nievialikija adroźnieńni. Heta śviedčyć, što vynik papiaredniaha brytanskaha daśledavańnia naŭrad ci možna rastłumačyć tolki miascovymi kulturnymi asablivaściami.

U čym pryčyna?

Daśledčyki prapanujuć niekalki mahčymych tłumačeńniaŭ. Adno ź ich źviazanaje sa zdaroŭjem. Chraničnyja zachvorvańni, vyklikanyja abo pahoršanyja kureńniem, mohuć abmiažoŭvać ruchomaść čałavieka i ŭskładniać udzieł u sacyjalnym žyćci.

Druhi mahčymy čyńnik źviazany sa źmienaj staŭleńnia hramadstva da kureńnia. Zabarony na paleńnie ŭ hramadskich miescach i niežadańnie ludziej dazvalać kuryć doma mohuć skaračać kolkaść situacyj, u jakich kurcy kamfortna pravodziać čas razam ź inšymi.

Adnak hetyja tłumačeńni pakul zastajucca hipotezami. Daśledavańnie było naziralnym, tamu jaho vyniki nie dakazvajuć, što mienavita kureńnie vyklikaje adzinotu. Jany pakazvajuć suviaź: siarod daśledavanych ludziej kurcy byli bolš samotnymi, a ź ciaham času adčuvańnie adzinoty ŭ ich narastała chutčej.

Na dumku ekśpiertaŭ, hetyja vyniki staviać pad sumnieŭ raspaŭsiudžanaje ŭjaŭleńnie pra kureńnie jak pra sposab sacyjalizacyi. Pry hetym jany padkreślivajuć, što heta nie pavinna stanavicca padstavaj dla styhmatyzacyi kurcoŭ. Naadvarot, važna padtrymlivać ludziej, jakija chočuć kinuć palić.

• 1
• 0
• 0
• 0
• 0
• 0
• 0
• 0