Jeŭrapiejskija śpiecsłužby papiaredzili pra mahčymuju eskałacyju apieracyj Rasii suprać NATA ŭ bližejšyja miesiacy

Kiraŭniki troch jeŭrapiejskich śpiecsłužbaŭ paviedamili The Guardian, što rasijskaja dyviersijnaja kampanija ŭ Jeŭropie, imavierna, uzmocnicca ŭ najbližejšyja miesiacy. Kiraŭnik češskaj BIS Michał Koŭdełka dapuściŭ, što Maskva moža pajści na abmiežavanaje ŭvarvańnie abo inšuju pravakacyju na terytoryi NATO ŭžo ciaham niekalkich miesiacaŭ. Havorka moža iści ŭ tym liku ab naziemnaj apieracyi, piša «Ahienctva».

The Guardian uziała intervju ŭ kiraŭnika češskaj Słužby biaśpieki i infarmacyi Michała Koŭdełki, hiendyrektara Słužby dziaržbiaśpieki Łatvii Normundsa Mižvijetsa i kiraŭnika Słužby vajennaj raźviedki i biaśpieki Šviecyi Tomasa Nilsana.

Usie troje zajavili, što rasijskaja dyviersijnaja kampanija ŭ Jeŭropie, vierahodna, uzmocnicca ŭ bližejšyja miesiacy.

Nilsan nazvaŭ niadaŭni incydent ź bieśpiłotnikam u aeraporcie Lejpcyha, adkaznaść za jaki niamieckija ŭłady ŭskłali na Rasiju, «pierałomnym momantam».

Maskva pierachodzić ad vypadkovaha vybaru metaŭ dla dyviersij, zaklikanych pasiejać paniku, da kankretnych abjektaŭ, źviazanych z padtrymkaj Ukrainy, zajaviŭ Mižvijets.

«My bačym, što jany imknucca atakavać čyhunačnuju infrastrukturu, infrastrukturu, źviazanuju z padtrymkaj Ukrainy. Ciapier my bačym pierachod da metaŭ u abaronnaj pramysłovaści», — skazaŭ Mižvijets.

U płanach Kramla moža być nievialikaje ŭvarvańnie na terytoryju NATA, jakaja miažuje z Rasijaj, miarkuje Koŭdełka.

«Jano moža ŭklučać abmiežavanaje ŭvarvańnie, pravakacyi pad čužym ściaham, maštabnuju kampaniju ŭpłyvu», — skazaŭ Koŭdełka. Pavodle jaho, taki scenar moža być realizavany na praciahu «niekalkich miesiacaŭ, a nie hadoŭ», adnak jon dadaŭ, što «mnohija ludzi robiać usio mahčymaje, kab hetaha nie adbyłosia».

Prykmiety padrychtoŭki Maskvoj bolš rašučych dziejańniaŭ u Jeŭropie pryznajuć i ŭ Słužbie dziaržbiaśpieki Łatvii. Pry hetym, sa słoŭ Mižvijetsa, prykmiet nieminučaha napadu łatvijskaja Vyviedka pakul «nie bačyć». «Pa — raniejšamu zastajecca adkrytym pytańnie, ci jość u ich pramyja i kankretnyja płany abo ŭsio heta tolki častka ich ahulnych sprobaŭ pasiejać strach i niavyznačanaść u zachodnim hramadstvie», — skazaŭ Mižvijets.

Ni Mižvijets, ni Koŭdełka nie stali raskryvać, jakimi mienavita raźvieddannymi vałodajuć.

Jany taksama nie stali kamientavać, ci było metaj pajezdki dyrektara CRU Džona Retklifa ŭ Maskvu ŭ minułym miesiacy papiaredzić Kreml ab nastupstvach mahčymaj ahresii suprać krain Bałtyi.

Ciapierašniaja rasijskaja taktyka ŭjaŭlaje saboj «eskałacyju dziela deeskałacyi», zajaviŭ Koŭdełka. Pavodle jaho słoŭ, Kreml imkniecca cisnuć na ŭraźlivyja miescy zachodnich tavarystvaŭ, kab asłabić ich padtrymku Ukrainy. «Jany ličać, što kali buduć dastatkova mocna pavyšać staŭki, jeŭrapiejskija krainy vyrašać spynić padtrymlivać Ukrainu», — skazaŭ Koŭdełka.

Niadaŭniaja aktyvizacyja rasijskaj dyviersijnaj dziejnaści maje niekalki metaŭ: asłabić padtrymku Ukrainy, unieści raskoł u NATA i ŭstryvožyć jeŭrapiejskaje nasielnictva, miarkuje Nilsan.

«Dumaju, Maskvie vielmi chaciełasia b, kab NATA biaskonca abmiarkoŭvała kansultacyi pavodle artykuła 4, ale ŭ vyniku nie rabiła nijakich dziejańniaŭ», — skazaŭ jon.

Jašče adnym śledstvam dyviersijnaj kampanii stanovicca pavieličeńnie nahruzki na zachodnija raźviedsłužby, kaža Koŭdełka.

«Ciapier kožnaje ŭzharańnie abo kožnaja niaspraŭnaść pavinny rasśledavacca vyviedsłužbami jak patencyjnaja terarystyčnaja ataka, i dla ich [Kramla] heta dobry vynik», — skazaŭ Koŭdełka.

Papiaredžańni kiraŭnikoŭ jeŭrapiejskich śpiecsłužbaŭ źjavilisia praz try dni paśla vystupu ŭ polskim Siejmie premjera Donalda Tuska.

Jon paviedamiŭ, što danyja vyviedki pakazvajuć na padrychtoŭku Rasijaj u bližejšyja miesiacy «hibrydnych udaraŭ» bieśpiłotnikami i rakietami pa krainach NATA, jakija padtrymlivajuć Ukrainu, u tym liku Polščy.

Sa słoŭ Tuska, Maskva moža vydavać takija epizody za vypadkovyja, sprabujučy pierakanać čalcoŭ aljansu, što «artykuł 5 nosić chutčej tearetyčny, čym praktyčny charaktar». Pry hetym premjer padkreśliŭ, što prykmiet padrychtoŭki rasijskaha ŭvarvańnia raźviedka nie bačyć.

• 0
• 1
• 6
• 0
• 0
• 0
• 0
• 0