U Varšavie zatrymali 69‑hadovaha palaka ŭ spravie napadu na biełarusku Marynu Nikandrynu
Jamu zabaranili nabližacca da jaje i kantaktavać ź joj.
69‑hadovaha hramadzianina Polščy zatrymali i dastavili ŭ rajonnuju prakuraturu Varšava-Žalibož u spravie napadu na biełarusku Marynu Nikandrynu. Pra heta Radyjo Svaboda paviedamiŭ pres-pradstaŭnik Akruhovaj prakuratury Varšavy Piotr Skiba.
Mužčynu vystavili abvinavačańnie pavodle art. 257 u sukupnaści z art. 119 §1 i ŭ suviazi z art. 11 §2 Kryminalnaha kodeksu Polščy. Havorka idzie, siarod inšaha, pra publičnuju abrazu, parušeńnie cialesnaj niedatykalnaści, a taksama hvałt abo supraćpraŭnuju pahrozu z pryčyny nacyjanalnaj prynaležnaści.
Pavodle prakuratury, padazravany nie pryznaŭ u poŭnym abjomie, što ŭčyniŭ inkryminavanaje jamu dziejańnie. Jon admaŭlaje, što ŭdaryŭ Nikandrynu i pahražaŭ pazbavić jaje žyćcia. Mužčyna taksama zajaviŭ, što nie maje praduziataści da ludziej inšych nacyjanalnaściaŭ, a Nikandryna, na jahonuju dumku, chacieła rozhałasu.
U dačynieńni da padazravanaha ŭviali palicejski nahlad, jamu zabaranili nabližacca da Nikandrynaj i kantaktavać ź joj.
Incydent adbyŭsia 30 maja na chodniku kala stancyi mietro Rondo ONZ u centry Varšavy.
Jak raniej raskazvała Nikandryna, nieznajomy mužčyna hruba zahadaŭ joj sastupić darohu. Pačuŭšy jaje akcent, jon pačaŭ abražać jaje i kryčać, kab jana «valiła va Ukrainu». Kali Nikandryna skazała, što jana biełaruska, mužčyna, pavodle jaje słovaŭ, pačaŭ pasyłać jaje ŭ Biełaruś i nazyvać «rasijskaj padściłkaj».
Nikandryna śćviardžała, što mužčyna taksama jaje ŭdaryŭ. Častku incydentu jana źniała na videa, jakoje pieradała palicyi.
31 lipienia prakuratura raspačała rasśledavańnie pavodle faktaŭ publičnaj abrazy Nikandrynaj, parušeńnia jaje cialesnaj niedatykalnaści i pahrozy pazbaŭleńniem žyćcia z pryčyny jaje nacyjanalnaj prynaležnaści. Na toj momant asoba napadnika jašče nie była ŭstanoŭlenaja.
Kamientary
Stranno, čto polak nie sdiełał (poka) zajavlenija o publikacii v intiernietie vidieo s nim biez razriešienija.