Ličycie svoj ananimny akaŭnt biaśpiečnym? ŠI moža raskryć vašu asobu

Znakamity žart časoŭ rańniaha internetu «U siecivie nichto nie viedaje, što ty sabaka» siońnia nabyvaje novy sens. Navat chavajučysia za psieŭdanimam, čałaviek moža mižvoli raskryvać u svaich dopisach mnostva drobnych źviestak pra siabie. Štučny intelekt zdolny sabrać ich razam, supastavić ź inšaj infarmacyjaj u adkrytym dostupie i pasprabavać vyznačyć, chto staić za ananimnym akaŭntam.

U niadaŭnim daśledavańni hetuju zdolnaść ŠI pravieryli na karystalnikach technałahičnaha forumu Hacker News. Dla ekśpierymientu vybrali ludziej, jakija pakinuli ŭ svaich profilach spasyłki na LinkedIn. Daśledčyki prybrali z danych infarmacyju, jakaja naŭprost raskryvała asobu, i prapanavali ŠI vyznačyć uładalnikaŭ akaŭntaŭ pa inšych źviestkach z adkrytych krynic.

Z 338 vypadkaŭ ŠI nazvaŭ kankretnaha čałavieka ŭ 252. I ŭ 90% hetych vypadkaŭ jon mieŭ racyju. Pry hetym takoje supastaŭleńnie možna było pravodzić chutčej, tańniej i ŭ značna bolšych maštabach, čym heta moh by rabić čałaviek.

Pra toje, što heta aznačaje dla ananimnaści ŭ internecie, The Wall Street Journal pahavaryła z adnym z aŭtaraŭ daśledavańnia — dacentam infarmatyki Šviejcarskaj vyšejšaj techničnaj škoły Ciurycha Fłaryjanam Trameram (Florian Tramèr).

U hrupie ryzyki — praktyčna kožny

Pa słovach Tramera, aścierahacca raskryćcia asoby varta kožnamu, chto piša ŭ internecie pad psieŭdanimam, u tym liku jamu samomu.

Karystalnik moža ŭ adnym dopisie mimachodź zhadać, dzie i ŭ jakim hodzie vučyŭsia, a ŭ inšym pryvieści mianušku svajho sabaki. Paasobku hetyja detali zdajucca biaskryŭdnymi, ale razam mohuć dapamahčy vyznačyć kankretnaha čałavieka.

Pa słovach śpiecyjalista, zrabić niešta padobnaje technična možna było i raniej. Ale ŠI dazvalaje značna chutčej i tańniej analizavać vialikuju kolkaść infarmacyi.

Dziaržavy pa-raniejšamu majuć u hetym istotnuju pieravahu, bo vałodajuć dostupam da danych, jakich niama ŭ zvyčajnaha karystalnika. Ale kali havorka idzie pra infarmacyju ŭ adkrytym dostupie, nieabchodnyja technałohii faktyčna ŭžo jość.

Možna sabrać dopisy, jakija čałaviek pakidaŭ pad sapraŭdnym imiem, dapoŭnić ich inšymi adkrytymi źviestkami, a zatym z dapamohaj ŠI pasprabavać źviazać usio heta z ananimnym akaŭntam.

Što najčaściej vydaje čałavieka

Jak tłumačyć Tramer, mierkavańnie, što ŠI vyznačaje aŭtara pieradusim pa maniery pisać, pamyłkova.

Spačatku madel analizuje dopisy pad psieŭdanimam i składaje profil čałavieka z faktaŭ, jakija tam zhadvajucca. Zatym paraŭnoŭvaje jaho ź inšymi akaŭntami i šukaje najbolš imaviernaje supadzieńnie.

Padčas ekśpierymientu z Reddit časam chapała navat davoli śpiecyfičnych hustaŭ. Naprykład, cikavaść da adnych i tych ža małaviadomych filmaŭ mahła dapamahčy źviazać dva psieŭdanimnyja akaŭnty.

Maniera pisać taksama moža ŭličvacca, ale, pa słovach daśledčyka, chutčej jak dadatkovaja prykmieta na apošnim etapie pravierki.

Ci dapamoža zakryty akaŭnt?

Jak tłumačyć Tramer, abmiežavańni na aŭtamatyčny zbor danych nie dajuć nadziejnaj abarony. Kali infarmacyju moža ŭbačyć zvyčajny karystalnik, jon moža sam sabrać jaje, a paśla pieradać ŠI dla analizu.

Z zakrytymi profilami inakš. Kali toj, chto sprabuje raskryć vašu asobu, nie maje dostupu da źmieściva staronki, to nie zmoža prosta pieradać hetyja źviestki ŠI.

Ryzyka, adnak, zastajecca. Naprykład, dostup da zakrytaha profilu moža mieć vaš znajomy, jaki pieradaść jaho źmieściva ŠI. Da taho ž, jak adznačaje śpiecyjalist, ludzi časta niedaaceńvajuć, kolki infarmacyi pra ich nasamreč znachodzicca ŭ adkrytym dostupie.

Ci možna zachavać ananimnaść?

Tramer nie ličyć, što ananimnaść u internecie pamierła. Źviazać ananimny akaŭnt z realnym čałaviekam časta było mahčyma i raniej — prosta zvyčajna nichto nie chacieŭ marnavać na heta čas i siły.

Ciapier ža takaja mahčymaść stanovicca dastupnaj značna šyrejšamu kołu ludziej. A heta, pa słovach daśledčyka, moža spraścić pieraśled, zrabić mahčymym šantaž u vialikich maštabach abo dapamahčy raskryvać asoby ludziej, jakija pracujuć u adčuvalnych śfierach.

Kali vy nie chočacie, kab akaŭnt źviazali z vašaj sapraŭdnaj asobaj, varta raskryvać jak maha mienš kankretnych i niezvyčajnych źviestak pra siabie. Asabliva niebiaśpiečnym moža być spałučeńnie detalaŭ, jakija paasobku zdajucca biaskryŭdnymi: miesca i čas vučoby, pracoŭnaja bijahrafija, horad, zachapleńni, siamiejnyja abstaviny. Čym bolš takich źviestak, tym lahčej supastavić ananimny profil z realnym čałaviekam.

Tearetyčna ŠI možna pasprabavać zabłytać, naŭmysna publikujučy vydumanyja źviestki pra siabie. Ale, jak adznačaje daśledčyk, zrabić heta pierakanaŭča niaprosta.

Madeli dobra zaŭvažajuć supiarečnaści. Kali ŭ adnym miescy čałaviek napiša, što vyvučaŭ infarmatyku, a ŭ inšym — historyju mastactva, nieadpaviednaść moža jaho vydać. Da taho ž vydumanaj bijahrafii daviadziecca paśladoŭna prytrymlivacca na praciahu doŭhaha času.

Adnak, jak padkreślivaje Tramer, vialikija moŭnyja madeli nie zdolnyja raskryć asobu luboha ananimnaha karystalnika. Kali ŭ adkrytym dostupie niama źviestak, jakija dazvalajuć źviazać akaŭnt z kankretnym čałaviekam, ŠI prosta nie budzie na što abapiercisia.

• 0
• 0
• 0
• 0
• 0
• 0
• 0
• 0