Niahledziačy na publičnaść svaich pasad, biełaruskija čynoŭniki ličać za lepšaje lišni raz biez patreby nie vysoŭvacca. I tym bolš nie raskryvać spravy siamiejnyja. Pry dapamozie «Biełpoła» i «Kibierpartyzanaŭ» «Naša Niva» praciahvaje raskazvać pra abrańnic ludziej, u rukach jakich skancentravanaja ŭłada ŭ Biełarusi. Heta treciaja častka cykła artykułaŭ.
Dzie pracujuć i jak vyhladajuć žonki top-čynoŭnikaŭ? Pieršaja častka
Dzie pracujuć i jak vyhladajuć žonki top-čynoŭnikaŭ? Častka druhaja
Ina Turčyna
Premjer-ministr Alaksandr Turčyn pachodzić z Navahrudka. Jaho žonka taksama raniej była čynoŭnicaj — Ina pracavała kaliści ŭ Navahrudskim rajvykankamie, UUS Minskaha abłvykankama. Apošniaje jaje viadomaje miesca — Biełaruski navukova-daśledčy instytut traŭmatałohii i artapiedyi (pa danych z baz na 2024 hod).
U pary ŭžo darosłaja dačka: Darja naradziłasia ŭ 1995 hodzie. Dziaŭčyna maryła źviazać žyćcio ź siłavymi strukturami, ale skončyła Minski dziaržaŭny linhvistyčny ŭniviersitet (jakomu valuntarysckim rašeńniem Łukašenki viernutaja savieckaja nazva Univiersitet zamiežnych moŭ) i vyjšła zamuž za supracoŭnika ministerstva pa nadzvyčajnych situacyjach Illu Bodnara.
Siońnia dziaŭčyna padpisvaje siabie ŭ sacsietkach «kreatarkaj i fatohrafkaj».
Eła Valfovič
Eła Valfovič — žonka dziaržsakratara Rady biaśpieki Alaksandra Valfoviča. Zhodna z apošnimi dastupnymi danymi z bazaŭ, jana pracuje ŭ kampanii «Altares», jakaja zajmajecca cyrulnickimi pasłuhami i trymaje punkty chimčystak.
Adziny syn Valfovičaŭ Maksim pajšoŭ pa śladach baćki i taksama staŭ vajskoŭcam. U 2022 hodzie jon skončyŭ fakultet Hienieralnaha štaba Vajskovaj akademii.
Volha Markava
Žonka ministra kultury Marata Markava Volha maładziejšaja za jaho na 14 hadoŭ. I ŭsiaho na vosiem hod starejšaja za miedyjnuju dačku Markava ad pieršaha šlubu — Nastaśsiu, jakaja ciapier z ekranaŭ televizara raskazvaje biełarusam pra historyju.
Jašče budučy zaniatym u miedyjnaj śfiery, Markaŭ raskazaŭ, jak dačka pryjšła na telebačańnie. Žonka ž ministra taksama pry televizijnaj pracy — zhodna z apošniaj dastupnaj infarmacyjaj u bazach, jana pracavała ŭ Biełteleradyjokampanii.
Iryna Hara
Iryna Hara — žonka hienieralnaha prakurora Biełarusi. Apošnija hadoŭ 20 žančyna pracuje ŭ Nacbanku.
Viadoma, što ŭ 1991 hodzie ŭ pary naradziłasia adzinaja dačka Alaksandra. U 2013 hodzie dačka skončyła BDEU.
Maryja Krutaja
Kiraŭnik administracyi Łukašenki Dźmitryj Kruty žanaty na inžyniercy z «Biełdziaržlesu» Maryi.
U siamji dźvie niepaŭnaletnija dački — Ksienija, jakaja adśviatkuje 18‑hodździe ŭ nastupnym hodzie, i 14‑hadovaja Hanna.
Darja Byčak
Hebist i kiraŭnik Śledčaha kamiteta Kanstancin Byčak, jaki lubić publičnaść i miedyjnaść, asabistaje žyćcio imkniecca pakidać pa-za kadram.
Viadoma, što žonka siłavika Darja ŭ minułym pracavała ŭ roznych miedycynskich ustanovach. Z apošnich miescaŭ — z 2019‑ha da pačatku 2022 hoda jana była ŭ Biełaruskim pratezna-artapiedyčnym adnaŭlenčym centry. A z 2022 hoda — u Ministerstvie pryrodnych resursaŭ i achovy navakolnaha asiarodździa.
U Byčakaŭ dvoje dziaciej — dačka i syn.
Nadzieja Isačanka
Nadzieja Isačanka, žonka kiraŭnika Mahiloŭščyny Anatola Isačanki, pracavała ŭ «Pryjorbanku». Ciapier, mahčyma, na piensii.
Na kantraście z mnohimi inšymi čynoŭnikami staršynia abłvykankama aktyŭna viadzie sacsietki — abnaŭlaje i instahram, i telehram-kanał. U jaho žonki Nadziei ž u instahramie zakryty profil.
U pary dvoje ŭžo darosłych dziaciej — dačka Maryna, jakaja pracuje psichołaham, i syn Dźmitryj, jaki ŭ 2025 hodzie ŭznačaliŭ mahiloŭskaje dziaržaŭnaje abjadnańnie «Miasamałpram».
Ciapier čytajuć
Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe13
Kamientary