Nie tak daŭno Alaksandr Łukašenka pryznačyŭ novaha premjer-ministra — im staŭ Alaksandr Turčyn. Asabistaje žyćcio čynoŭnika achutanaje tajamnicaj. Z aficyjnych paviedamleńniaŭ viadoma tolki, što jon žanaty i maje dačku. Spartyŭnaje vydańnie «Trybuna» pryhledziełasia da siamji Turčyna.
«Tata moža ŭsio»
Darja Turčyna naradziłasia ŭ 1995 hodzie ŭ Navahrudku. Jaje baćku na toj momant było 20 hadoŭ. Dziaŭčynka spačatku vučyłasia na małoj radzimie, a potym pieraviałasia ŭ Minski abłasny licej.
Pa skančeńni škoły dačka Turčyna pastupiła ŭ Minski dziaržaŭny linhvistyčny ŭniviersitet i padčas navučańnia aktyŭna viała tvitar, dzie pisała i pra adukacyju, i pra asabistaje, i pra palityku.
Niekalki razoŭ jana ŭspaminała baćku Alaksandra Turčyna. «Moj tata moža ŭsio. Lublu jaho», — pisała jana ŭ sakaviku 2014-ha. Litaralna praz tydzień źjaviŭsia jašče adzin tvit: «Tolki tata, kali bačyć, što ja splu, padydzie i razbudzić, kab pierakanacca, što ja splu».
Repościła tvity ŭ padtrymku Rasii
Pra vučobu jana pisała tak: «Šeraść. Byzvychodnaść. Sumna. Heta ŭsio pra ŭniviersitet». A ŭ inšym dopisie skardziłasia na składanaść napisańnia ese pa-anhlijsku, kali «ciažka navat na ruskaj movie paru skazaŭ napisać».
Viasnoj 2014-ha Rasija zachapiła Krym, a na Danbasie pačalisia bajavyja dziejańni.
Z hetaha času Darja aktyŭna repościć prapahandysckija supołki, jakija padtrymlivajuć Pucina i Rasiju. Na futbolnym čempijanacie śvietu-2014 Turčyna źbirałasia zaŭzieć za Rasiju.
Aktyŭna adnaŭlaŭsia tvitar dziaŭčyny da vieraśnia 2015 hoda.
«Maryła źviazać žyćcio ź siłavymi strukturami»
U šlubie Darja nosić proźvišča Bodnar. Jaje abrancam staŭ supracoŭnik ministerstva pa nadzvyčajnych situacyjach Illa Bodnar. Chłopiec na hod maładziejšy za žonku, jon uradženiec Hancavičaŭ Bresckaj vobłaści.
Illa i Darja Bodnary. Fota z mchs.gov.by.
Svaju historyju kachańnia Darja i Illa raskazali ŭ 2022 hodzie sajtu MNS.
«Ź dziacinstva ja maryła źviazać svajo žyćcio ź siłavymi strukturami, dapamahać ludziam zajmacca čymści važnym i karysnym. Ale kali paŭstała pytańnie ab vybary prafiesii, to pasłuchałasia baćkoŭ i pastupiła ŭ MDŁU na fakultet anhlijskaj movy», — kazała Turčyna.
U publikacyi hovorycca, što paśla vučoby va ŭniviersitecie Darja atrymała pasadu inśpiektara siektara mižnarodnaha supracoŭnictva ŭ Respublikanskim atradzie śpiecyjalnaha pryznačeńnia «Zubr». Tam ža pracavaŭ i Illa Bodnar.
«Stasavacca my pačali adrazu, ale pieršapačatkova razmovy byli siabroŭskimi. A paśla hoda znajomstva my pačali adnosiny ŭ jakaści pary», — praciahvała Darja.
Padraździaleńnie MNS «Zubr» było zasnavanaje naprykancy isnavańnia BSSR — 15 traŭnia 1991 hoda. Asnoŭnaja meta — reahavańnie na pryrodnyja i technahiennyja katastrofy. U skład «Zubra» ŭvachodziać chimiki, uzryvalniki, alpinisty, vadałazy, kinołahi i inšyja.
Pradstaŭniki «Zubra» rehularna ŭdzielničajuć u vyratavalnych apieracyjach za miežami Biełarusi. 27-hadovy Illa Bodnar na siońniašni dzień zajmaje pasadu namieśnika načalnika centra pošuka-vyratavalnych rabot i pažaratušeńnia «Zubra».
Zdymaje na telefon
Svaju staronku ŭ instahramie Darja Bodnar zakryła, ale žurnalisty paśpieli jaje pahladzieć. Ciapier siabie jana pazicyjanuje tak: «Zdymaju na telefon, ambasadar kavy, u storyz pakazvaju budni».
Pry hetym adkrytaj zastałasia staronka ŭ sacyjalnaj sietcy threads. U pary jość maleńkaje dzicia. I Darja, i Illa aktyŭna zajmajucca sportam — heta i prabiežki, i roznyja praktykavańni.
Darja Bodnar. Fota z threads
«Ja vyrašyła dla siabie, što hety hod dyscypliny, štodzionna ŭ maim žyćci pavinna prysutničać fizičnaja nahruzka. Učora heta byŭ paŭnavartasny treninh, kardya i chadźba. Siońnia doŭhaje kardya, kab adnavicca paśla ŭčorašniaha treninhu. Lanota, ale prymušaju siabie, kab raźvić zvyčku, palubić heta», — pisała dziaŭčyna ŭ pačatku 2025 hoda.
Ziać Turčyna hulaje ŭ amatarskaj futbolnaj lizie
Para časta vandruje pa Biełarusi, chodzić u roznyja kaviarni ŭ Minsku. Zdymkaŭ z zamiežža adšukać nie ŭdałosia. Nieviadoma, ci praciahvaje dziaŭčyna pracu ŭ MNS, adnak možna z upeŭnienaściu kazać, što jana zachapiłasia fatahrafijaj. Ładzić fotasiesii dla achvočych.
Zachapleńniem Illi Bodnara źjaŭlajecca futboł. Jon hulaje ŭ amatarskaj lizie AŁF za kamandu AFK «Varhi». Apošnija dva hady pazicyja Bodnara paznačana jak «bramnik», ale ŭ 2017 hodzie jon pačynaŭ paŭbaroncam.
Illa i Darja Bodnary. Fota z mchs.gov.by
Raniej jon vystupaŭ za kalektyvy «Toten», «Hrabary» i «Fieniks».
U sacyjalnaj sietcy «Ukantakcie» chłopiec padpisany ŭ asnoŭnym na supołki bodybiłderaŭ i fitaniašak.
Darja nijak nie abaznačaje ŭ sacyjalnych sietkach, što jana dačka premjer-ministra Alaksandra Turčyna. Niama tam fotak z baćkam i ŭvohule zhadak pra jaho.
Ciapier čytajuć
«Kibierpartyzany» zajavili, što zdabyli bazu danych danosčykaŭ KDB25
Kamientary