Palaki razabrali na miažy aŭtamabil žonki važnaha biełaruskaha čynoŭnika. U pošukach narkotykaŭ
Były časovy pavierany ŭ spravach Polščy ŭ Biełarusi Vitald Juraš raskazaŭ, jak Varšava adkazała Minsku na cisk na polskuju mienšaść.
Vitald Juraš u 2010 hodzie ŭznačaliŭ palityčny adździeł pasolstva Polščy ŭ Minsku, a z krasavika 2010‑ha pa luty 2011 hoda vykonvaŭ abaviazki kiraŭnika dypłamatyčnaj misii jak časovy pavierany ŭ spravach. Paśla zaviaršeńnia dypłamatyčnaj karjery jon staŭ žurnalistam i publicystam.
U razmovie z žurnalistam Bahdanam Rymanoŭskim na jaho YouTube-kanale Juraš zhadaŭ časy svajoj pracy ŭ Biełarusi. Pavodle byłoha dypłamata, u toj čas biełaruskija ŭłady rehularna stvarali prablemy pradstaŭnikam polskaj mienšaści. Siarod tych, chto sutykaŭsia ź ciskam, jon nazvaŭ Anžaliku Borys, Andžeja Pačobuta i Anžaliku Arechvu.
«My vielmi doŭha dumali, što z hetym rabić. I ŭ niejki momant udałosia arhanizavać takuju niepryjemnaść biełaruskamu boku, bo tam usia hrodzienskaja i bresckaja elita jeździła adpaviedna ŭ Biełastok i Biełuju-Padlašskuju na zakupy. Udałosia skłaści śpis hetych najbolš važnych biełarusaŭ, ichnich žonak.
Čysta vypadkova na miažy ich stali zatrymlivać. Čysta vypadkova žoncy adnaho z važnych biełaruskich funkcyjanieraŭ u novym aŭtamabili adkrucili unutranuju abšyŭku stoli, bo sabačka vyniuchaŭ narkotyki. Nijakich narkotykaŭ nie znajšli, ale niepryjemna było», — raskazvaje Juraš.
Pa słovach byłoha dypłamata, prykładna praz dva tydni biełaruski bok prapanavaŭ spynić uzajemnaje stvareńnie prablem.
Ale palaki chacieli, kab u Minsku dakładna zrazumieli pryčynu taho, što adbyvałasia na miažy. Juraš śćviardžaje, što było damoŭlena: adzin z kiraŭnikoŭ Pamiežnaj achovy Polščy patelefanuje jamu z Varšavy pa adkrytaj linii, jakuju, pavodle byłoha dypłamata, prasłuchoŭvali biełaruskija śpiecsłužby, i spytaje, ci treba praciahvać «kipiš» u dačynieńni da biełarusaŭ, ci biełaruski bok užo adstupiŭ.
Juraš ličyć, što taki sposab kamunikacyi akazaŭsia bolš zrazumiełym dla biełaruskich uładaŭ, čym dypłamatyčnyja pratesty.
«Bo heta takaja mova. Kali skažaš: «My pratestujem», — nu to pratestuj sabie. Kali abaraniaješsia — nu to abaraniajsia. Toje, pra što ja kažu, — paniaćcie «deeskałacyjnaja eskałacyja». Heta rasiejcy ŭ svajoj stratehii vykarystoŭvajuć, — patłumačyŭ jon.
Ciapier čytajuć
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam28
Kamientary