Dzie pracujuć i jak vyhladajuć žonki top-čynoŭnikaŭ? Častka druhaja
Biełaruskija čynoŭniki i sami pa sabie pałachlivyja i niepubličnyja. A z ulikam taho, što ich načalnik nikoli nie źjaŭlajecca na publicy sa svajoj žonkaj, to i biurakraty svaich abrańnic chavajuć, u aficyjnym kadry ich poŭnych siemjaŭ nie ŭbačyš. Z dapamohaj bazaŭ «Biełpoła» «Naša Niva» praciahvaje pakazvać, jak vyhladajuć abrańnicy tych, chto vyznačaje žyćcio krainy.
Dzie pracujuć i jak vyhladajuć žonki top-čynoŭnikaŭ? Častka pieršaja
Maryja Karpienka
Žonka hałoŭnaha kamunista Biełarusi, byłoha ministra adukacyi, a ciapier kiraŭnika CVK Ihara Karpienki. Da 2005 jana pracavała ŭ Biełaruskim dziaržaŭnym piedahahičnym univiersitecie (dzie ŭ 1994-2004 pracavaŭ i sam Karpienka).
Kali muž pajšoŭ u čynoŭniki, tudy ž rušyła i Maryja Renualdaŭna. Jana była kansultantam upraŭleńnia vyšejšaj i siaredniaj adukacyi Ministerstva adukacyi.
A ciapier Maryja Karpienka — namieśnica načalnika ŭpraŭleńnia sacyjalnaj palityki i navukova-inavacyjnaj dziejnaści sakrataryjata Savieta respubliki.
Ludmiła Alejnik
U 1993-2001 hady Ludmiła, žonka ministra zamiežnych spraŭ Siarhieja Alejnika, była nastaŭnicaj minskaj himnazii №7.
Z 2001-ha, kali i karjera muža pajšła ŭhoru, miesca pracy źmianiajecca na sakrataryjat Savieta respubliki. Aproč taho, Ludmiła Alejnik vykładała ŭ Biełaruskim dziaržaŭnym piedahahičnym univiersitecie.
A apošni zapis pra miesca pracy — pryvatnaje pradpryjemstva «Sistemy i technałohii», čyj zadekłaravany vid dziejnaści — budaŭnictva i ramont.
Natalla Chrenina
Žonka ministra abarony Viktara Chrenina, čyjo viedamstva absłuhoŭvaje rasijskuju armiju, maje dziŭny prafiesijny šlach.
Da 2006 jana pracavała ŭ «Rembudaŭtadary». A potym stała zahadčycaj adździaleńnia ŭ Vajennym miedycynskim kliničnym centry. Spačatku pracavała ŭ vajennym špitali ŭ Hrodnie, potym pieraviałasia bližej da muža ŭ Minsk.
Julija Piarcova
Žonka łukašenkaŭskaha ministra infarmacyi, Uładzimira Piarcova — asnoŭnaja pryčyna, ź jakoj hety čałaviek uvohule staŭ čynoŭnikam.
Žurnalistka i viadučaja BT Julija — dačka Alaksandra Radźkova, niekali vialikaj fihury ŭ biełaruskaj sistemie, namieśnika kiraŭnika administracyi Łukašenki, kiraŭnika «Biełaj Rusi».
Radźkoŭ, jak ličycca, i daŭ šturšok, vyvieŭ u ludzi mała čym zaŭvažnaha ziacia.
Žanna Rumas
Žonka apalnaha premjer-ministra — znakamity ŭ Minsku stamatołah. Z 1995 pa 2014 jana pracavała ŭ 15-j haradskoj stamatałahičnaj paliklinicy.
Potym jana dajšła da svajho biznesu i zasnavała ŭ stalicy Proud clinic, dzie sama i pracuje nie tolki ŭpraŭlencam, ale i niepasredna stamatołaham.
Ludmiła Pietryšenka
Žonka vice-premjera Ihara Pietryšenki, Ludmiła, da 2006-ha pracavała ŭ navukova-vytvorčym abjadnańni «Centr».
Heta niaprostaja arhanizacyja, jakaja ŭvachodzić u strukturu Akademii navuk i zajmajecca razmytym «daśledavańniem technałahičnych pracesaŭ». Za savieckim časam tam pravodzili testy avijacyjna-kaśmičnaj techniki, častak atamnaj pramysłovaści.
A ciapier robiać atrakcyjony, kompleksy płaźmiennaj rezki, miedycynskija centryfuhi i drabiłki minieralnaj syraviny.
Bolš zapisaŭ u bazach ab jaje dziejnaści niama.
Zinaida Parchomčyk
Žonka jašče adnaho dziaržaŭnaha muža, vice-premjera Piatra Parchomčyka.
Z 2005 pa 2012 pracavała ŭ zamiežnym pryvatnym handlovym pradpryjemstvie «Rejnardympeks». Čym zajmałasia kampanija, nie jasna.
Z 2012-ha pracuje ŭ «DV Trejdynhu» — pastaŭščyku marharynaŭ, hłazury, masłaŭ i padobnaj pradukcyi.
Ała Zajac
Žonka Leanida Zajca, vice-premjera ź viečna sumnym tvaram, doŭha pracavała ŭ Biełarusbanku. A ŭ 2003-2010, da samaj piensii, dapracoŭvała ŭ Biełaruskaj čyhuncy.
Volha Pinievič
Žonka ministra achovy zdaroŭja Dźmitryja Pinieviča — taksama doktar, dziciačy hastraenterołah.
Z 2003 pa 2014 jana pracavała ŭ 4-j haradskoj dziciačaj kliničnaj balnicy Minska. Potym pierajšła na rabotu ŭ RNPC «Maci i dzicia».
Siamja Pinievičaŭ — redki vypadak, kali čynoŭnik pakazvaje śvietu svaju žonku. Jany razam chadzili na telešou da Marata Markava.
Viktoryja Bahdanava
Žonka ministra handlu Alaksieja Bahdanava — vypusknica Univiersiteta fizkultury. Z 2013 hoda jana kiravała TAA «Paryzen», jakoje zajmałasia handlem. Ale ŭ siaredzinie 2021-ha kampanija pajšła ŭ likvidacyju. Z taho času, miarkujučy pa infarmacyi z huhła, ministr znajšoŭ svajoj biespracoŭnaj žoncy siniekuru i ŭładkavaŭ u fiederacyju karate, jakuju sam ža i ŭznačalvaje. A Viktoryja tam — «vykanaŭčy dyrektar».
Natalla Siamaška
Žonka byłoha vice-premjera i eks-pasła Biełarusi ŭ Rasii Uładzimira Siamaški. Z 1997 hoda zajmałasia kamiercyjaj — była zasnavalnikam i dyrektaram lesanarychtoŭčaj kampanii «TDA Biełkantyniet 97», jakaja likvidavałasia ŭ 2014-m.
Ciapier Natalla Savieśćianaŭna na piensii.
Ludmiła Miaśnikovič
Žonka mastadonta i doŭhažychara biełaruskaj palityki Michaiła Miaśnikoviča, prafiesijnaje žyćcio addała bankaŭskaj śfiery.
Z 1991 pa 2004 jana była hałoŭnym śpiecyjalistam u Biełprambudbanku, jaki paźniej staŭ nazyvacca BPS-Śbierbank.
Užo ŭ BPSie Ludmiła Mikałajeŭna pracavała načalnikam upraŭleńnie da 2010, kali i vyjšła na piensiju.
Dzie pracujuć i jak vyhladajuć žonki top-čynoŭnikaŭ? Častka pieršaja
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»11
Kamientary