Na STB zapuścili novaje realici dla pošuku kachańnia. Udzielnikam prapanoŭvajuć niuchać potnyja majki i daić kazu
U šou «Formuła kachańnia» hierojaŭ jak tolki nie vypraboŭvali.
Viadučymi šou na STB stali Julija Krynickaja i Anton Sankievič. Jon, darečy, čałaviek nie z telebačańnia, a načalnik upraŭleńnia ideałahičnaj raboty MUS Respubliki Biełaruś.
U kožnym vypusku ŭdzielničajuć šeść čałaviek — try žančyny i try mužčyny. Kab raźbić ich na pary, prydumali roznyja zadańni, jakija musiać zadziejničać piać orhanaŭ adčuvańnia.
Dla pieršaha vypusku scenarysty, zdajecca, vykarystali ŭsie mahčymyja kliše pra kachańnie — ad matylkoŭ u žyvacie da «žančyny lubiać vušami». U niejki momant pačynaješ chvalavacca, što ad prytarnych słoŭ viadučych pavysicca ŭzrovień cukru ŭ kryvi.
Darečy, udzielnikaŭ dla «Formuły kachańnia» dapamahała šukać «Mis Biełaruś» Eleanora Kačałoŭskaja. A prapanovu paŭdzielničać atrymlivaŭ navat stalinist-jabaćka z Homiela Vital Drabyšeŭski (jamu aktualna, bo praz zališniuju cikavaść siłavikoŭ da mužčyny jaho niekalki hadoŭ tamu kinuła žonka).
U premjerny vypusk trapili błohierka Karalina Šadurskaja (pryznałasia, što nie suprać, kab partnior zarablaŭ mienš za jaje — bo takaja situacyja była z usimi mužčynami ŭ jaje žyćci), kiraŭnica kafe Ludmiła Markoŭskaja (pryjšła pa brutalnaha mužčynu kaŭkazskaj źniešnaści), administratarka restarana Alesia Apanasovič (tut hałoŭnym patrabavańnie było, kab mužyk byŭ rukasty — i droŭ nasiekčy moh, i razietku adramantavać).
A partnioraŭ im treba było vybirać z pradprymalnika Barysa Kraŭcova (adrazu papiaredziŭ, što dziela dziaŭčyny skakać vyšej za hałavu nie budzie), artysta Dźmitryja Hieorhiu (acharaktaryzavaŭ siabie jak narcysa, jaki šukaje seksotačku) dy finansavaha kansultanta Uładzimira Šulhi (pryznaŭsia, što miescami kateharyčny dušniła).
Na pieršym «ekśpierymiencie» ŭdzielnikam stavili zapisy hałasoŭ adno adnaho, a im treba było vyrašyć, čyj bolš padabajecca. Pierad hetym arhanizatary dali pračytać roznyja litaraturnyja frahmienty — ad lista Taćciany da Jaŭhiena Aniehina da «Zorki Vieniery».
Užo na hetym etapie dziaŭčaty byli ŭ šoku ad taho, nakolki niepryjemnyja hałasy ŭ ich patencyjnych kachanych. Mužčyny taksama nie vielmi vysoka acanili ŭdzielnic, ale ŭsio ž im niešta spadabałasia.
Pad čas druhoha «dośledu» pryjšłosia niuchać adzieńnie. Viadučyja rastłumačyli: za try dni da zdymkaŭ udzielnikam razdali majki i zahadali nasić ich i zajmacca svaimi zvyčajnymi spravami. Karystacca lubymi aramatyčnymi srodkami było zabaroniena.
Vidavočna, što ŭdzielnikam było niepryjemna. Dźmitryj pryznaŭsia, što jašče da taho, jak adkryŭ pieršy pakiet, zrazumieŭ, što pach hetaj futbołki jamu nie spadabajecca — i paśla heta paćvierdziłasia.
«Byccam tam i kurycu pasmažyli, i vyjšli na bałkon papalić cyharetu… Byŭ prosty taki smurod mužčynskaha bieskłapotnaha žyćcia», — padzialiłasia ŭražańniami Karalina.
A pach adnoj mužčynskaj cišotki adčuli navat viadoŭcy, jakija stajali na adlehłaści.
Cikava, što jaje ŭłaśnik adrazu zrazumieŭ, što zmoh vydzielicca. Barys pryznaŭsia, što schadziŭ u joj dvojčy na treniroŭku. Tamu i atrymałasia bijałahičnaja zbroja.
Ale ž niechta znajšoŭ i majki, jakija pryjemna pachli.
Na trecim etapie ŭdzielnikam prapanavali pakaštavać lubimuju ježu patencyjnych kachanych. U čaćviortym dazvolili dakranucca da ruk praź ścianu. A ŭ piatym narešcie dali paŭtary chviliny pahladzieć na inšych udzielnikaŭ.
Tut u kahości adbyŭsia šok, bo byli vypadki, kali pa ŭsich inšych konkursach dziaŭčyna ličyła, što chłopiec joj pasuje, ale ž źniešnie jon zusim nie spadabaŭsia. Jašče adna zrazumieła, što ŭdzielnik, jaki joj spadabaŭsia, źniešnie vielmi padobny na jaje minułaha.
Karaciej, rasčaravańnia chapiła z usich bakoŭ.
Paśla hetych pakut udzielnikaŭ adpravili na «śpieczadańnie» — u chacinu pasiarod lesu. Čamuści vyrašyli, što heta dapamoža zblizicca chłopcam i dziaŭčatam. Maŭlaŭ, u ekstremalnych umovach lepš raskryvajucca ludzi.
Da ścipłaha žylla (jakoje nazvali «Chutaram kachańnia») treba było jašče dabracca praź niejkaje bałota. Užo tut u kahości z mužčyn adbyłasia isteryka.
Karalina sprabavała padtrymlivać uzrovień pazityvu chacia b na ŭzroŭni lištvy: «Padumajcie, kali my jašče zmožam trapić u takuju ž..u».
Paŭrazburanaja chata taksama ŭraziła: mebla, starejšaja za luboha z kankursantaŭ, brudny posud, śmiećcie paŭsiul. Prosta kadry ź filma žachaŭ. A ludzi maryli, što pryviazuć ich na bazu adpačynku sponsara šou!
Hrupu padzialili na pary i dali asabistyja zadańni — prybracca, abahreć chatu, pryhatavać ježu i inšaje.
Navat kazu pryjšłosia daić — ale ž chłopcam heta navat spadabałasia.
Atmaśfieru ahułam možna było apisać «chacia b nie pazabivalisia».
Ale ž hałoŭnym punktam prahramy niečakana stała noč. Niahledziačy na stomlenaść, kampanija amal uvieś čas praviała ŭ dušeŭnych razmovach.
U vyniku ŭ finale šou utvaryłasia dźvie pary — im padaryli pucioŭki na adpačynak. Paabiacali, što na hety raz nie ŭ chacinu, a ŭ biełaruski sanatoryj.
Biełaruskija komiki zapuścili jutub-šou spatkańniaŭ uślapuju
ANT zapuściła intelektualnaje šou, u jakim treba adhadvać kadry z rasijskich sieryjałaŭ «Univier» i «Tatavy dočki»
Na biełaruskija ekrany viarnułasia intelektualnaja hulnia «Brejn-rynh»
U čarhovym šou na TNT — biełaruski desant: himnastka Hałkina, baksior Kudzin i nie tolki
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty21
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych1414
Kamientary