Brakańjery zastrelili łasia pad Kobrynam. Ich vyličyli pa abłomkach bampiera
Padčas palavych mierapryjemstvaŭ niepadalok ad Kobryna supracoŭniki inśpiekcyi achovy raślinnaha i žyviolnaha śvietu vyjavili na ŭskrajku pola ślady kryvi. U lasnym huščary jany zaŭvažyli reštki zabitaha łasia: hałavu, škuru, kapyty, vantroby i chrybietnik.
Ahlad miesca zdareńnia daŭ začepku: za piać mietraŭ ad pareštkaŭ zastaŭsia śled pratektara šyn, a pobač lažaŭ frahmient rašotki bampiera, piša Onliner.by.
U susiedniaj vioscy inśpiektary znajšli aŭtamabil, u jakoha nie chapała detali bampiera, a malunak pratektara supadaŭ sa śladami na miescy zdareńnia. Tam ža jany sustreli dvuch mužčyn u kamuflažnym adzieńni. Na dachu pabudoŭ lažali šeść miaškoŭ sa śviežym łasinym miasam, a ŭ sałonie druhoha aŭtamabila znachodziłasia zarehistravanaja palaŭničaja strelba. Mienavita ź jaje i zastrelili łasia.
Ustanoŭlena, što navakolnamu asiarodździu naniesieny ŭron u pamiery 300 bazavych vieličyń — heta 13 500 rubloŭ. Usiaho kanfiskavali 300 kiłahramaŭ dzičyny, a taksama dźvie zarehistravanyja strelby z patronami. Akramia taho, abodva aŭtamabili aryštavali i adpravili na štrafnuju stajanku.
Brakańjery pryznalisia ŭ niezakonnym palavańni. U dačynieńni da ich raspačali kryminalnuju spravu pavodle č. 4 art. 282 KK (niezakonnaje palavańnie, jakoje paciahnuła pryčynieńnie asabliva bujnoha ŭronu). Najbližejšyja dni jany praviaduć u izalatary časovaha ŭtrymańnia.
Kamientary