U čarhovym šou na TNT — biełaruski desant: himnastka Hałkina, baksior Kudzin i nie tolki
Na rasijskim telekanale pakazali pieršy vypusk novaha siezona šou «Tytany». Siarod 111 spartoŭcaŭ-udzielnikaŭ akazałasia ažno šaściora biełarusaŭ — rasijanie pryciahnuli sapraŭdnych zorak.
TNT zdymaje «Tytanaŭ» z 2024 hoda. Mienavita tady bosy kanała źviarnulisia da ŠI i toj raspracavaŭ składanyja fizičnyja vyprabavańni dla spartoŭcaŭ i viadomych asobaŭ. Ideja šou nie aryhinalnaja — padobny prajekt źjaviŭsia raniej na Netflix.
Pieršy siezon pakazali letam 2024-ha, a ciapier, 13 vieraśnia, prajšła premjera ŭžo čaćviortaha siezona. Hetym razam arhanizatary sabrali 111 spartoŭcaŭ, u tym liku i šeść biełarusaŭ.
Pierš za ŭsio, heta Kaciaryna Hałkina — lidarka zbornaj pa mastackaj himnastycy ŭ druhoj pałovie 2010-ch, ciapier jana žyvie ŭ Maskvie i zarablaje na žyćcio trenierstvam. Taksama na ŭdzieł pahadzilisia Cimafiej Kałačoŭ, były futbalist i zorka nacyjanalnaj zbornaj, razam z dačkoj-lohkaatletkaj Janaj Kałačovaj.
Jašče ŭ šou paklikali Alaksieja Kudzina, šmatrazovaha čempijona śvietu ŭ tajskim boksie i kikboksinhu, a taksama byłoha palitviaźnia. I Dzianisa Hančaronka, jašče adnaho šmatrazovaha čempijona śvietu pa tajskim boksie ź Biełarusi.
Šostym ź biełarusaŭ u «Tytanach» akazaŭsia Mark Rudakoŭski, chakieist, jaki faktyčna skončyŭ karjeru ŭ 2025-m. Ale ž bolš viadomy jon nie praz hulniu, a praz svaju miedyjnaść. Mark žanaty na rasijskaj błohiercy Karynie Kros, starejšaj za jaho na 11 hadoŭ, maje amal 73 tysiačy padpisčykaŭ u instahramie, zdymajecca ŭ kino ŭ epizadyčnych rolach i paŭdzielničaŭ u šou «Lednikovy pieryjad».
Cimafiej Kałačoŭ pryznavaŭsia žurnalistam, što pahadziŭsia na ŭdzieł dziela dački:
«Napeŭna, hałoŭnym dla mianie byŭ nie sam udzieł, a mahčymaść padtrymać Janiu i prajści hety vopyt razam ź joj. Ja jašče da prajekta pastajanna žartavaŭ, što vaźmu ŭdzieł maksimum u adnoj sieryi, a Jania pojdzie dalej.
Dla mianie heta byŭ całkam novy dośvied, ale samaje hałoŭnaje — my ź Janiaj zmahli prajści jaho razam. Dumaju, mienavita heta i zastaniecca dla mianie samym kaštoŭnym uspaminam pra hety prajekt».
U vypusku, što vyjšaŭ 13 vieraśnia, udzielnikaŭ padzialili na try hrupy. Im treba było jak maha bolš razoŭ uzyści na płatformu z nachiłam u 30 hradusaŭ. Na linii finišu ŭdzielniki musili nacisnuć na śpiecyjalnuju knopku i viarnucca na liniju startu da hukavoha sihnału, pryčym intervał pamiž sihnałami pastupova skaračaŭsia.
«Nam kožnamu dali formu, prysvoili ŭłasny numar, ź jakim ty isnuješ uvieś prajekt. Viadoma, hladziš minułyja vypuski i miarkuješ, što ciabie čakaje ŭ nastupnym siezonie, ale nikoli ŭ žyćci nie zdahadaješsia. My zahadzia ničoha nie viedajem, i kali vychodzim u kaliziej (placoŭku dla spabornictvaŭ — NN), bačym, što nas čakaje, afihievajem i rychtujemsia da svajho debiutu — ci, jak jašče možna skazać, da hańby», — tak Kaciaryna Hałkina apisvała padrychtoŭku da šou.
Pa vynikach pieršaha vypusku šou pakinuli 11 udzielnikaŭ. Biełarusaŭ siarod ich niama, ale ž niama ich i siarod najlepšych udzielnikaŭ, jakija atrymajuć bonus u nastupnym vypusku.
Dzianis Hančaronak raskazaŭ u storys, jak jon adčuvaŭ siabie paśla pieršaha dnia ŭ šou:
«Paśla vyprabavańnia nohi byli prosta zabityja ŭ nierealny chłam, chadzić niemahčyma! U vyniku ja zabieh 30 padjomaŭ i byŭ 92‑m sa 111 čałaviek. Ad vyletu adździalała ŭsiaho 7 pazicyj, ale pajšoŭ dalej».
«Naša Niva» — bastyjon biełaruščyny
PADTRYMAĆCiapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma8
Kamientary
Kultura časam bolš važki faktar mihracyi, čym pracoŭnyja zdolnaści.