Raźviedka ZŠA papiaredziła pra namier Rasii ŭmiašacca ŭ amierykanskija vybary
Amierykanskija raźviedvalnyja słužby papiaredžvajuć, što Rasija pačała novuju ličbavuju kampaniju ŭpłyvu napiaredadni listapadaŭskich vybaraŭ u ZŠA. Pavodle sakretnych acenak, metaj Kramla źjaŭlajecca ŭzmacnieńnie ŭnutranych supiarečnaściaŭ u amierykanskim hramadstvie. Amierykanskija čynoŭniki, znajomyja z materyjałami raźviedki, raskazali pra heta The New York Times na ŭmovach ananimnaści.
U apošnija tydni śpiecyjalisty pa rasijskaj dezynfarmacyi vyjavili niekalki kampanij u sacyjalnych sietkach, u jakich z dapamohaj štučnaha intelektu stvaralisia padroblenyja videa z udziełam halivudskich znakamitaściaŭ. U ich znakamitaści nibyta abmiarkoŭvali važnyja vybary ŭ Sienat u štatach z asabliva napružanaj baraćboj.
Pry hetym ciapierašniaja kampanija, pavodle amierykanskich čynoŭnikaŭ, mienš maštabnaja i mienš skaardynavanaja, čym niekatoryja papiarednija sproby Rasii paŭpłyvać na vybary ŭ ZŠA. Pavodle acenak raźviedki, z 2016 hoda Kreml pravodziŭ internet-apieracyi ŭpłyvu padčas kožnaha fiederalnaha vybarčaha cykłu.
Ciapier amierykanskija śpiecsłužby ličać, što Maskva mienš zacikaŭlenaja ŭ pramiežkavych vybarach, čym u prezidenckich, a častku jaje ŭvahi adciahvaje vajna suprać Ukrainy.
Čynoŭniki śćviardžajuć, što asnoŭnaja meta ciapierašniaj kampanii — stvaryć chaos, a nie dapamahčy kankretnaj partyi. Adnak niezaležnyja daśledčyki dezynfarmacyi ŭ apošnija tydni źviazvali z Rasijaj prykłady napadaŭ mienavita na kandydataŭ ad Demakratyčnaj partyi ŭ štatach, dzie čakajecca vostraja baraćba.
U sacyjalnych sietkach X i BlueSky na praciahu apošniaha tydnia ŭ dźvie chvali źjaviłasia sieryja videa, stvoranych z dapamohaj štučnaha intelektu. Jany vykarystoŭvalisia dla masavaha raspaŭsiudžvańnia nieabhruntavanych abvinavačańniaŭ suprać demakrataŭ, jakija bałatujucca ŭ Sienat. U materyjałach vykarystoŭvalisia temy, jakimi Donald Tramp i Respublikanskaja partyja krytykujuć demakrataŭ, u tym liku abvinavačańni ŭ karupcyi, antysiemityźmie i padtrymcy pravoŭ ŁHBT.
Niekatoryja videa byli zmantavanyja tak, kab stvarać uražańnie, nibyta jany pachodziać ad viadomych ŚMI, u tym liku CNN, BBC i The New York Times. Siarod mišeniaŭ byli kandydaty, jakija mohuć paŭpłyvać na suadnosiny sił u Sienacie.
U adnym z apošnich dopisaŭ było vykarystana padroblenaje videa The Times, u jakim aktrysa Džejmi Li Kiorcis nibyta krytykavała demakrataŭ za ich palityku ŭ dačynieńni da transhiendarnych ludziej. Pres-sakratarka aktrysy Hajdzi Šefier zajaviła, što ŭ hetym videa «niama ni kropli praŭdy». Pavodle danych X, da kanca dnia dopis prahledzieli amal 200 tysiač razoŭ.
Daśledčyki adznačajuć, što ŭ hetaj kampanii vykarystoŭvajucca rasijskija mietady, viadomyja pa papiarednich vybarach u ZŠA i Jeŭropie. Starejšy daśledčyk kampanii Graphika Žan Le Ru zajaviŭ, što amierykanski kantent pačaŭ źjaŭlacca nieŭzabavie paśla zakančeńnia vybaraŭ u Hiermanii i Šviecyi. Pavodle jaho, možna čakać pašyreńnia kampanii, jakaja, na jaho dumku, ciapier zasiarodžvajecca na vybarach u ZŠA.
Graphika miarkuje, što za apieracyjaj mohuć stajać źviazanyja z Kramlom sietki Operation Overload abo Matryoshka. Ich boty časta vydajuć siabie za sapraŭdnyja navinavyja arhanizacyi, kab raspaŭsiudžvać sfabrykavanyja materyjały.
Amierykanskaja raźviedka taksama robić acenki, pavodle jakich u apieracyjach upłyvu napiaredadni vybaraŭ moža ŭdzielničać Iran, ale jaho aktyŭnaść pakul nievysokaja. Akramia taho, Kitaj, pavodle amierykanskich čynoŭnikaŭ, moža być hatovy pravodzić apieracyi, nakiravanyja suprać asobnych kandydataŭ u Kanhres abo dziejnych kanhresmienaŭ, jakich Piekin ličyć varožymi da Kitaja.
Kamientary