U Biełarusi zabaroniać vonkavuju rekłamu azartnych hulniaŭ. Ale buduć vyklučeńni
U Biełarusi płanujuć całkam zabaranić raźmiaščeńnie vonkavaj rekłamy azartnych hulniaŭ. Adpaviedny zakonaprajekt raspracavała Ministerstva antymanapolnaha rehulavańnia i handlu.
Jak paviedamiła kansultantka adździeła rekłamy ŭpraŭleńnia abarony pravoŭ spažyŭcoŭ i kantrolu za rekłamaj Minhandlu Julija Chvaluk, ciapier u Biełarusi niama abmiežavańniaŭ na abjom raźmiaščeńnia i raspaŭsiudžvańnia rekłamy hulniavych ustanoŭ i azartnych hulniaŭ.
Pavodle jaje słoŭ, padrychtavany zakonaprajekt praduhledžvaje źmieny jak u patrabavańniach da źmiestu takoj rekłamy, u tym liku rekłamy virtualnych ihralnych ustanoŭ, tak i ŭ miescach, dzie jaje možna budzie raźmiaščać i raspaŭsiudžvać.
Adnym z abaviazkovych patrabavańniaŭ stanie papiaredžańnie pra toje, što vyjhryš nie harantavany i isnuje ryzyka finansavych strat.
Asnoŭnaje novaŭviadzieńnie — poŭnaja zabarona rekłamy hulniavych ustanoŭ, u tym liku virtualnych, i azartnych hulniaŭ u vonkavaj rekłamie.
Pry hetym praduhledžany šerah vyklučeńniaŭ. Rekłamnyja šyldy možna budzie raźmiaščać na transpartnych srodkach i ŭ ich sałonach, na prypynačnych punktach hramadskaha transpartu, aŭtavakzałach i čyhunačnych vakzałach, a taksama ŭ šmatkvaternych žyłych damach, handlovych abjektach, abjektach hramadskaha charčavańnia i handlovych centrach.
Prajekt zakona raspracavany ŭ vykanańnie daručeńnia Alaksandra Łukašenki. U MARH zajaŭlajuć, što jaho meta — udaskanalić pravavoje rehulavańnie hulniavoha biznesu i nie dapuścić raźvićcia hulniavoj zaležnaści, asabliva siarod moładzi.
Raniej Łukašenka źviartaŭ uvahu na ahresiŭnuju rekłamu hulniavych ustanoŭ i daručyŭ čynoŭnikam bolš uvažliva vyvučyć rekłamu azartnaha biznesu.
Kamientary