Antyvajennaja častka rasijskaha hramadstva nie zdoleła prademanstravać svajoj pazicyi na vybarach u Dziarždumu
U Rasii pa-raniejšamu «ŭsio schvačana, za ŭsio zapłačana». Ale choć antypucinskaja apazicyja i nie zdoleła supraćpastavić adziny płan dziejańniaŭ, unutranaja straść u režymie taksama na vačach zhasaje, piša Mikoła Buhaj pra vyniki vybaraŭ u rasijskuju Dumu.
Źniaćcio z vybaraŭ partyi «Jabłyk» — apošniaj, jakaja nierašuča vystupała suprać vajny, było najlepšym sacyjałahičnym znakam, što niemaleńkaja častka rasijskaha hramadstva hatovaja kansalidavacca vakoł luboj antyvajennaj alternatyvy — choć jakoj. Inakš by «Jabłyka» nie zabaraniali, jak jaho nie zabaraniali na raniejšych vybarach.
20 vieraśnia rasijskaj apazicyi nie ŭdałosia dasiahnuć taho, što zdoleli biełarusy ŭ 2020‑m — pakazać, što karol hoły, što ludzi chočuć inšaha.
Heta adbyłosia tamu, što antyvajennaja častka rasijskaha hramadstva zastajecca ŭ piermanientna razdroblenym stanie. Adny zaklikali da bajkotu, druhija — za hałasavańnie suprać «Adzinaj Rasii». Trecija vystupali za psieŭdalibieralnych «Novych ludziej» — maŭlaŭ, jany najmienšaje zło, čaćviortyja — za vykreślivańnie ŭsich. Navalnaja i Kac prapanavali składany dla masavaha vybarščyka pryncyp — «hałasavańnie za samaha mocnaha kankurenta «Adzinaj Rasii» ŭ toj ci inšaj akruzie» i hałasavańnie pa partyjnych śpisach za choć jakuju partyju, aby nie za «Adzinuju Rasiju». Možna padumać, što ŭ vas svabodnyja vybary.
Jany taksama zaklikali paŭtaryć toje, što efiektna ździejśnili biełarusy ŭ 2020-m: pryjści na ŭčastki ŭ vyznačany čas. Tolki što śmiełych biełarusaŭ była krytyčnaja masa tady, a ŭ Rasii jaje ciapier niama, tamu i hetaja ideja nie spracavała.
«Jany siadziać za miažoju i vami manipulujuć», — advažna zapiarečyŭ udavie Navalnaha staršynia partyi «Jabłyk».
Karaciej, chto ŭ les, chto pa drovy, a tajha ŭ Rasii biaźmiežnaja.
Pry hetym vyrazna zaŭvažnaja i strata režymam unutranaj enierhii.
Uskosnyja sihnały — vykazvańni ŭ sacsietkach ci, dakładniej, masavaje maŭčańnie ŭ sacsietkach, hałasavanki ŭ telehramie, jakija ŭładam davodziłasia pastfaktum nakručvać — pakazvajuć nam, što vajna stamiła navat šavinistyčnuju častku hramadstva, aŭdytoryju Z-kanałaŭ.
Jość razhalinavany represiŭny aparat, jość samaja darahaja ŭ śviecie mašyna prapahandy: navat Kitaj takoj nie maje. Ale niama nijakich prykmiet, što režym Pucina vyklikaje raniejšy entuzijazm. 99,9% za Kadyrava jość, a entuzijazmu nul. Usio zmacavana pa pryncypie «ŭsio schvačana, za ŭsio zapłačana», a ŭnutranaja straść zhasaje.
Heta nie aznačaje niepaźbiežnaści pieramien. Kali takaja sistema maje resursy, jana moža ruchacca na ich doŭha, a to i da źmieny sistemy kaardynat.
Ahienty režymu buduć i dalej rabić usio — ad manipulacyj da zabojstvaŭ, kab adzinaha lidara, adzinaha centra apazicyi nie źjaviłasia.
Heta taksama tłumačyć, čamu hetaja bojnia praciahvajecca — patrebnyja impieryjalistyčnyja pośpiechi.
Ale, na maju ścipłuju dumku, kali niejkija koły z atačeńnia Pucina ci pierajemnik Pucina zachočuć źmianić kurs, im taksama jość na čym syhrać i na kaho abapiercisia.
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary