Sieuł pasvaryŭsia z Kijevam praz paŭnočnakarejskich vajennapałonnych

Prezident Paŭdniovaj Karei Li Čže Mion zajaviŭ, što Ukraina parušyła damoŭlenaść ab nierazhałošvańni infarmacyi. Pavodle jaho, pytańnie pieradačy paŭnočnakarejskich pałonnych źjaŭlajecca vielmi adčuvalnym z punktu hledžańnia dypłamatyi, nacyjanalnaj biaśpieki i situacyi na Karejskim paŭvostravie.

Ukrainski bok heta admaŭlaje. Daradca prezidenta Dźmitryj Litvin zajaviŭ u sacyjalnych sietkach, što damoŭlenaści maŭčać pra pieradaču pałonnych nie było. Pavodle jaho, było b niapravilna chavać infarmacyju pra toje, kudy nakiroŭvajucca pałonnyja.

Dvuch vajskoŭcaŭ z Paŭnočnaj Karei ŭkrainskija siły zachapili ŭ studzieni 2025 hoda padčas apieracyi ŭ Kurskaj vobłaści. Spačatku Zialenski paviedamiŭ, što jany byli paranienyja, znachodzilisia pad vartaj SBU i atrymlivali miedycynskuju dapamohu. Adzin ź ich na dopycie zajaviŭ, što nibyta pryjechaŭ u Rasiju na vučeńni, a nie dla ŭdziełu ŭ vajnie suprać Ukrainy.

Paŭdniovakarejskaja raźviedka paźniej paćvierdziła fakt zachopu dvuch paŭnočnakarejskich vajskoŭcaŭ. Ministr zamiežnych spraŭ Ukrainy Andrej Sibiha zajaviŭ, što jany byli vajskoŭcami rehularnych vojskaŭ KNDR, a nie najmitami. Ich zachop staŭ adnym z paćviardžeńniaŭ niepasrednaha ŭdziełu paŭnočnakarejskich vojskaŭ u vajnie Rasii suprać Ukrainy.

23 vieraśnia padčas vystupu na Hienieralnaj asamblei AAN Zialenski paviedamiŭ, što Ukraina niadaŭna pieradała hetych dvuch pałonnych Paŭdniovaj Karei. Pavodle jaho słoŭ, sami vajskoŭcy prasili pieradać ich mienavita tudy, bo paśla zachopu ŭ pałon zajavili, što nie chočuć viartacca ŭ Paŭnočnuju Kareju. Sieuł raniej taksama paviedamlaŭ pra hatoŭnaść pryniać ich.

Zialenski raskazaŭ i pra toje, što adzin z paŭnočnakarejcaŭ sprabavaŭ skončyć žyćcio samahubstvam, kali zrazumieŭ, što trapiŭ u pałon. Pavodle prezidenta Ukrainy, heta śviedčyć pra toje, jak u Paŭnočnaj Karei abmiažoŭvajecca prava ludziej na vybar.

Paśla zajavy Zialenskaha prezident Paŭdniovaj Karei raskrytykavaŭ publičnaje paviedamleńnie pra pieradaču. Jon napisaŭ, što repatryjacyja paŭnočnakarejskich pałonnych maje surjoznyja nastupstvy dla dypłamatyi i biaśpieki, a taksama moža paŭpłyvać na situacyju na Karejskim paŭvostravie. Li Čže Mion zajaviŭ, što nie varta rabić hučnyja publičnyja zajavy pra takija adčuvalnyja pytańni dziela demanstracyi ŭłasnych zasłuh.

Paŭdniovakarejski prezident taksama paviedamiŭ, što navat unutry ŭrada byli hałasy za raskryćcio infarmacyi pra pieradaču, pakolki heta mahło spryjać rostu palityčnaj padtrymki. Adnak ułady, pavodle jaho, paličyli zachavańnie kanfidencyjnaści bolš uzvažanym rašeńniem.

Razam z tym u ofisie prezidenta Paŭdniovaj Karei zajavili, što Sieuł zahadzia viedaŭ pra namier Zialenskaha paviedamić pra pieradaču. Ukraina paviedamiła paŭdniovakarejskamu boku pra svoj płan, ale, pavodle ananimnaha pradstaŭnika administracyi, nie ŭdakładniła, u jakoj formie budzie zroblena hetaja zajava.

• 1
• 0
• 2
• 9
• 2
• 0
• 0
• 0