Minčanka pasprabavała znajści «tatu na hadzinu» dla syna praz sacsietki
Chłopčyku 10 hadoŭ.
U pieršaj pałovie vieraśnia Julija apublikavała niečakany post u Threads. Žančyna raskazała, što choča znajści dla syna «tatu na hadzinu». Samomu chłopčyku 10 hadoŭ. Siarod patrabavańniaŭ da mužčyny, naprykład, — lubić «Majnkraft» i robatatechniku. Onliner.by daviedaŭsia, što z hetaha atrymałasia.
Darečy, hetymi patrabavańniami śpis nie abmiažoŭvaŭsia. Dla mamy było važna, kab mužčyna lubiŭ dziaciej i ŭmieŭ uzajemadziejničać z chłopčykami. U ideale — kab nie prosta viedaŭ pra isnavańnie «Majnkrafta», ale i moh hadzinami razmaŭlać pra jaho. Jašče adnym plusam była b ciaha da inžyniernaj tvorčaści.
Jak Jula ŭjaŭlała takoje ŭzajemadziejańnie? Prahułki i hulni raz na tydzień pa 3—4 hadziny. Darečy, žančyna płanavała apłačvać dapamohu «pa siarednim taryfie na rynku niań».
Usiaho post nabraŭ kala 30 tysiač prahladaŭ i 100 kamientaroŭ. Reakcyja była vielmi roznaj. Chtości aścierahaŭsia, što heta moža być niebiaśpiečna, chtości prapanoŭvaŭ lepš naładzić adnosiny z mužčynami-rodnymi, a chtości — addać dzicia ŭ spartyŭnuju siekcyju.
Siarod tych, chto prakamientavaŭ post, byŭ prafiesijny huviernior. Praŭda, jon adrazu adznačyŭ, što jaho pasłuhi buduć kaštavać doraha, bo jon «kandydat fiłałahičnych navuk, vykładaje staražytnyja movy i antyčnuju litaraturu».
A jašče adhuknułasia mama inšaha chłopčyka: «Moža, budzie cikava: siabar, a nie tata. Šmat chodzić pieššu — ad 10 000 [krokaŭ]. [Lubić] kanstruktary, Minecraft pieraros, chutčej Roblox. Šmat cikavaha hladzić i vielmi lubić razmaŭlać na roznyja temy. 12 hadoŭ». Ale vyśvietliłasia, što siemji žyvuć u roznych kancach horada.
Adhukalisia i sami mužčyny. Jak raspaviała Onliner.by Julija, napisali piać čałaviek.
— Byli navat baćki-adzinočki. Chacieli dać parady. Mianie ździviła, što takija ludzi sapraŭdy jość. Skinuli niekalki prajektaŭ u Minsku. Naprykład, jany pravodziać roznyja mierapryjemstvy dla takich synoŭ.
Pakul ja spyniłasia na adnym čałavieku, my ź im razmaŭlajem, užo hulali z synam. Adnych ich pakul nie pakidaju. Z majho boku ŭsio adbyvajecca nie tak chutka, bo to chvareli, to inšyja spravy nie davali sustrecca.
— U cełym ja čakała, što adhuknucca adekvatnyja ludzi, u jakich, naturalna, jość dzieci. Darečy, adzin ź ich navat žanaty. Ja spytała, jak jaho žonka na heta hladzić: kaža, absalutna narmalna, bo jana piedahoh.
Samomu chłopčyku ideja vielmi spadabałasia, jon pastaviŭsia da jaje pazityŭna.
Žurnalisty ŭdakładnili, ci sapraŭdy patencyjny «tata na hadzinu» tak dobra raźbirajecca ŭ Minecraft? Akazałasia, usio ž nie.
— Heta i zrazumieła, u jaho ŭ asnoŭnym hulajuć dzieci. Ale ŭ cełym nie baču prablemy ŭ tym, što hety punkt nie supadaje, — adznačyła Jula.
Kamientary