U «Minsktransie» raskazali, čamu ŭ Minsku aŭtobusy i tralejbusy spaźniajucca i źnikajuć z maršrutaŭ
U sacyjalnych sietkach pasažyry raskazali pra prablemy ź niekalkimi maršrutami hramadskaha transpartu.
Adna ź minčanak źviarnuła ŭvahu na pracu aŭtobusa №175S, a taksama tralejbusaŭ №29 i №61. Pavodle jaje słoŭ, transpart nie zaŭsiody prychodzić u paznačany čas, pry hetym pasažyry nie atrymlivajuć svoječasovaj infarmacyi pra zatrymki, piša «Minskaja praŭda».
Jašče adna žycharka stalicy paskardziłasia na aŭtobus №130. Jana raskazała, što maršrut, pavodle jaje nazirańniaŭ, niekalki razoŭ na tydzień moža nie prychodzić ranicaj i ŭviečary.
Na pradpryjemstvie patłumačyli, što zboi ŭ hrafiku ruchu naziemnaha transpartu ŭ hadziny pik mohuć być źviazanyja sa składanaj darožnaj situacyjaj.
Akramia taho, pryčynaj zatrymak stanoviacca ekspłuatacyjnyja prablemy niepasredna na linii.
Pry hetym pasažyry mohuć adsočvać ruch transpartu z dapamohaj elektronnych tabło na prypynkach i servisu «Virtualnaje tabło».
Što aznačaje «ZT» na elektronnym tabło
U «Minsktransie» patłumačyli, što sistema raźličvaje mierkavany čas prybyćcia transpartu na prypynak. Kali ruch pa maršrucie parušajecca, prahramna-aparatny kompleks pieraličvaje čas čakańnia paśla taho, jak transpart prachodzić papiarednija prypynki.
Adnak dakładna vyznačyć, kolki aŭtobus ci tralejbus, naprykład, prastaić u darožnym zatory, sistema pakul nie moža.
U takich vypadkach na elektronnym tabło pobač z numaram maršrutu źjaŭlajecca paznačeńnie «ZT» — «zatrymka transpartu».
Takim čynam, kali aŭtobus ci tralejbus nie prychodzić u paznačany čas, pasažyram rekamiendujuć aryjentavacca nie tolki na zvyčajny raskład, ale i na danyja elektronnaha tabło abo «Virtualnaha tabło».
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary