Što viadoma pra viciebčuka, jakoha vinavaciać u sprobie padryvu samalota ŭ Hiermanii
Zachodnija śpiecsłužby i žurnalisty-rasśledavalniki nazyvajuć 40‑hadovaha ŭradženca Viciebska Andreja Karšakova adnarazovym ahientam rasijskaj raźviedki i vinavaciać u maštabnych dyviersijach u Jeŭropie.
Imia Karšakova ŭspłyła paśla vychadu sumiesnaha rasśledavańnia vydańniaŭ The Telegraph i Welt am Sonntag. Žurnalisty sa spasyłkaj na zachodnija raźviedki pišuć, što Karšakoŭ dziejničaŭ pa pramym zahadzie aficera HRU Aleha Levuškina z dyviersijnaha padraździaleńnia 29155.
Mienavita viciebčuk, jak śćviardžajecca, zapuściŭ dron z vybuchoŭkaj Siemteks u kryło ŭkrainskaha hruzavoha samalota An-124 u Lejpcyhu. Dron cudam nie zdetanavaŭ, a na pakinutaj kala anteny palčatcy palicyja znajšła DNK Karšakova ź finskaj bazy.
Taksama mužčynu padazrajuć u dačynieńni da padpału budaŭničaj kramy ŭ polskaj Łodzi ŭ 2024 hodzie. Jeŭrapiejskija ŭłady razhladajuć hetyja dziejańni jak akty mižnarodnaha teraryzmu i skaardynavanuju kampaniju Kramla pa zapałochvańni krain, što padtrymlivajuć Ukrainu.
Što viadoma pra hetaha mužčynu?
Andrej Karšakoŭ naradziŭsia 23 lipienia 1986 hoda ŭ Viciebsku. Pa źviestkach Belpol, u nulavych jon pracavaŭ na «Viciebskaj brojlernaj ptuškafabrycy» i ŭ pryvatnaj kampanii «Strachar». Z 2011 hoda mužčyna byŭ zarehistravany jak indyvidualny pradprymalnik i akazvaŭ pasłuhi kiroŭcy hruzavoha transpartu. Jahony biznes u Biełarusi praisnavaŭ da červienia 2018 hoda.
Daloka nie ŭsio ŭ žyćci viciebčuka išło hładka — jon nie raz mieŭ prablemy z zakonam. Jašče ŭ 2010 hodzie Karšakova aryštavali ŭ Finlandyi za sprobu kradziažu adzieńnia na sotni jeŭra — mienavita tady jahony profil DNK trapiŭ u jeŭrapiejskija kryminalnyja bazy. A ŭ lipieni 2018‑ha na radzimie jon adznačyŭsia pjanym debošam: raźbiŭ nahami łabavoje škło čužoha aŭtamabila kala viciebskaha kłuba «Vintaž».
Nieŭzabavie paśla 2018‑ha Karšakoŭ atrymaŭ rehistracyju ŭ rasijskim Smalensku. Adnačasova z hetym pačalisia jahonyja aktyŭnyja pajezdki ŭ Jeŭrasajuz. Bazy pierasiačeńnia miažy fiksujuć dziasiatki padarožžaŭ viciebčuka ŭ Hiermaniju, Polšču i Aŭstryju.
U apošnija hady jon, padobna, mieŭ dobry zarobak. Z červienia 2023 hoda mužčyna pačaŭ karystacca premijalnym BMW X6 2019 hoda vypuska. A sa śniežnia 2024 hoda rehularna spyniaŭsia ŭ darahim maskoŭskim hateli Radisson Blu Olympiyskiy (vycieki fiksujuć pražyvańni taksama ŭ lipieni i kastryčniku 2025 hoda).
Uźnikaje pytańnie, a jakaja ž była krynica patrebnych dla takoha ładu žyćcia dachodaŭ u hetaha čałavieka.
Vyhladaje, što bolšuju častku žyćcia Karšakoŭ pravodziŭ za miažoj ci ŭ raźjezdach — na jaho navat nie zarehistravana mabilnych numaroŭ u Rasii, choć jon paśpieŭ atrymać rasijski pašpart.
«Naša Niva» — bastyjon biełaruščyny
PADTRYMAĆCiapier čytajuć
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju1010
Kamientary
Honar Savieckaj Biełoruśsii.
[Zredahavana]