U Centralnaafrykanskaj Respublicy, jakaja stała hałoŭnaj afrykanskaj bazaj «Vahniera», u školnuju prahramu ŭklučyli ruskuju movu
Rašeńnie było pryniataje na pasiadžeńni mižuradavaj kamisii Rasii i Centralnaafrykanskaj respubliki (CAR), a ministr adukacyi krainy Areljen-Simplis Kanhbiele-Zinhas padpisaŭ adpaviednuju pastanovu, paviedamlaje TASS.
Zaniatki ruskaj movy ŭ škołach CAR vykładčyki «Ruskaha doma» ŭ Banhi pravodziać z 2024 hoda. U minułym navučalnym hodzie jaje vyvučali kala 1,1 tysiačy školnikaŭ u stalicy krainy. Jašče kala 2 tysiač dziaciej i darosłych štohod naviedvajuć biaspłatnyja kursy pry «Russkim domie».
U 2024—2025 navučalnym hodzie ruskaja mova ź inicyjatyvy kiraŭnictva źjaviłasia ŭ prahramach dźviuch pryvatnych škoł. Paźniej jašče šeść škoł Banhi źviarnulisia da «Russkoho doma» z prośbaj arhanizavać zaniatki.
Centralnaafrykanskaja Respublika z 2013 hoda znachodzicca ŭ stanie hramadzianskaj vajny.
U 2018 hodzie Rasija nakiravała tudy vajskovych instruktaraŭ, adnak, pavodle dadzienych The Washington Post, na samoj spravie heta byli bajcy PVK «Vahnier».
Mienavita ŭ CAR «Vahnier» u 2018 hodzie stvaryŭ svaju najbujniejšuju afrykanskuju bazu, piša Moscow Times.
Rasijskaja PVK achoŭvała prezidenta Fastena-Arkanža Tuaderu, dapamahała adbić nastup paŭstancaŭ na Banhi ŭ 2020—2021 hadach i vajavała razam z vojskam krainy suprać uzbrojenych hrupovak.
Źviazanyja z «Vahnieram» palittechnołahi i kampanii taksama zajmalisia ŭ CAR prapahandaj, u tym liku praz multfilmy i «Ruski dom» u Banhi. Uzamien hrupoŭka atrymała dostup da pryrodnych resursaŭ krainy, uklučajučy radoviščy zołata i ałmazaŭ, a taksama lasnyja resursy.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary