Preparat pakul ekśpierymientalny i nie maje dazvołu na prodaž.
Kampanija Veradermics apublikavała vyniki daśledavańniaŭ 19 kastryčnika. U daśledavańni ŭdzielničali 536 mužčyn ź lohkim abo ŭmieranym abłysieńniem mužčynskaha typu. Ich vypadkovym čynam raźmierkavali na try hrupy: dźvie atrymlivali preparat z roznaj častatoj pryjomu, treciaja — płaceba. Vyniki paraŭnali praz paŭhoda.
Pavodle kampanii, u hrupach, jakija prymali preparat, kolkaść vałasoŭ na ŭčastku skury, dzie aceńvali rost, pavialičyłasia ŭ siarednim prykładna na 29—36 na kvadratny santymietr. U hrupie płaceba — prykładna na siem.
Preparat maje pracoŭnuju nazvu VDPHL01. Jaho asnova — minaksidył, jaki ŭžo vykarystoŭvajuć suprać vypadzieńnia vałasoŭ, u tym liku ŭ srodkach dla naniasieńnia na skuru hałavy.
Asablivaść raspracoŭki Veradermics — pastupovaje vyzvaleńnie minaksidyła z tabletki. Kampanija raźličvaje tak zrabić jaho dziejańnie bolš raŭnamiernym.
Pavodle raspracoŭščyka, za paŭhoda ŭ novym vyprabavańni nie zafiksavali surjoznych pabočnych efiektaŭ, źviazanych ź lačeńniem. Adnak pabočnyja efiekty byli: u apublikavanaj tablicy zhadvajucca acioki i zališni rost vałasoŭ na ciele ci tvary. Tamu śćviardžać, što preparat zusim nie maje niepažadanych efiektaŭ, nielha.
Važna i toje, z čym paraŭnoŭvali vynik. U hetym daśledavańni kantrolnaja hrupa atrymlivała płaceba, a nie zvyčajny minaksidył. Tamu jano pakul nie daje adkazu, ci lepšaja novaja forma za ŭžo isnyja preparaty.
Heta treciaja, poźniaja faza kliničnych vyprabavańniaŭ, vyniki jakich vykarystoŭvajuć pry razhladzie dazvołu na prodaž. Takoha dazvołu ŭ VDPHL01 pakul niama. Da kanca hoda kampanija płanuje pradstavić i bolš praciahłyja nazirańni za ŭdzielnikami inšaha daśledavańnia — paśla hoda lačeńnia.
Kamientary