Łatuška: Idzie piać kryminalnych spravaŭ, źviazanych z pahrozaj majmu žyćciu i zdaroŭju
Pavodle kiraŭnika Narodnaha antykryzisnaha ŭpraŭleńnia, biełaruskija śpiecsłužby sprabujuć atrymlivać infarmacyju pra jaho atačeńnie i pieramiaščeńni.
U intervju Paŭła Łatuški Biełaruskaj słužbie Polskaha radyjo havorka siarod inšaha zajšła pra toje, što ŭ demakratyčnych strukturach vyjaŭlajuć ludziej, źviazanych sa śpiecsłužbami.
Łatuška ŭ razmovie z Aksanaj Kołb zaŭvažyŭ, što całkam zaścierahčysia ad takich vypadkaŭ nie mohuć navat dziaržavy z ułasnaj kontrvyviedkaj. Jon pryvioŭ u prykład Polšču i sudździu Tomaša Šmita, jaki mieŭ dostup da dziaržaŭnych sakretaŭ, a paśla źjechaŭ u Biełaruś.
«Krytykavać možna kolki zaŭhodna. Heta samaje lohkaje, što možna zrabić. Ale kali praanalizavać arhumienty, to arhumienty pavinny być nastupnyja. Demakratyčnyja siły Biełarusi nie majuć kontrvyviedki, i nie tamu, što nie chočuć. Jany nie majuć prava mieć jaje ŭ krainach, u jakich znachodziacca. Kali my stvorym z vami tut kontrvyviedku, my adrazu parušym zakanadaŭstva hetaj krainy», — davioŭ Łatuška.
Pavodle palityka, tolki za apošni miesiac u jaho kamandzie i frakcyi ŭ Kaardynacyjnaj radzie zafiksavali 11 novych sprobaŭ viarboŭki.
«Apošnija sproby viarboŭki — prośba za hrošy pieradavać infarmacyju pra toje, jaki moj hrafik, kudy ja jezdžu, čym ja zajmajusia.
Heta sistemnaja [praca]. Idzie piać kryminalnych spraŭ, źviazanych z pahrozaj majmu žyćciu i zdaroŭju.
Naprykład, dva tydni tamu rajonny sud Varšavy zavioŭ čarhovuju kryminalnuju spravu pa fakcie pahrozy majmu žyćciu, daŭ daručeńnie prakuroru rasśledavać hetaje złačynstva», — padzialiŭsia padrabiaznaściami Łatuška.
Pa słovach Łatuški, suprać biełaruskich demakratyčnych struktur pracujuć KDB, raźviedvalnyja struktury MUS i vajennaja raźviedka. Sami demakratyčnyja siły, pavodle jaho, mohuć raźličvać pieradusim na pravaachoŭnyja orhany krain, u jakich znachodziacca.
«Kali adbyvajucca takija situacyi jak źniknieńnie ludziej, što ja rabiŭ pieršaje? Ja adrazu infarmavaŭ prakurora i palicyju. Kali sprabujuć vierbavać supracoŭnikaŭ, ja adrazu painfarmavaŭ vajennaha prakurora Akruhovaj prakuratury Varšavy».
Palityk zaklikaŭ paviedamlać pra vypadki viarboŭki nie tolki pravaabaroncam, ale i miascovym pravaachoŭnym orhanam. Na jaho dumku, dziejnaść biełaruskich śpiecsłužbaŭ suprać biełarusaŭ za miažoj treba razhladać i jak prablemu biaśpieki krain, u jakich jany žyvuć.
Stopracentnaj biaśpieki, pavodle Łatuški, nie moža harantavać navat dziaržava. Tamu zastajecca ŭzmacniać ułasnyja miery zaściarohi.
«Ja kažu — majo žyćcio za začynienymi dźviaryma. To-bok ja zaŭsiody začyniaju dźviery. Nie toje, što za saboj, kali vychodžu. Heta žyćcio pad kamierami. Heta značyć, treba prymianiać tyja srodki, jakija dapamahajuć kantralavać prastoru, u jakoj ty znachodzišsia. Ty nie možaš pić vadu, kali tabie chtości adkryje butelku. Lepš adkryć jaje samomu. To-bok prymianiać miery samabiaśpieki. Heta taksama važna».
Łatuška taksama zaklikaŭ aściarožna stavicca da nieznajomcaŭ, jakija vychodziać na suviaź i pradstaŭlajucca supracoŭnikami ŭkrainskich śpiecsłužbaŭ. Pavodle jaho, apošnim časam takija vypadki stali častymi. Jon padkreśliŭ, što kantakty z zamiežnymi śpiecsłužbami źjaŭlajucca parušeńniem zakanadaŭstva krainy znachodžańnia.
Dla pravierki ludziej, jakija vyklikajuć padazreńni, demakratyčnyja struktury, pavodle Łatuški, mohuć źviartacca pa dapamohu da «Biełpoł».
Kamientary
dla načała polaki prosto obiazany pri vydačie viz triebovať avtobiohrafiju, napisannuju Sobstviennoručno... ETO AKSIOMA. Nie diełajut etoho. + Dla rośsijan i biełarusov TOLKO NACIONALNYJE VIZY s triebovanijem v́jezda, vlota v etu stranu piervoj, vydavšuju nac.vizu. NIKAKICH ŠIENHIENOV dla hraždan RB i rośsii, poka vojna. A to ustroili "prochodnoj dvor" dla ludiej vani-łysoho, pavličienok. intielektuałov bałab, karpienkovych s sieḿjami i pročiej okružajuŝiej ich svoroj...