U vioscy pad Minskam stajać chaty, jakija vyhladajuć jak sapraŭdnyja tvory mastactva FOTY
U vioscy Višnioŭka pad Minskam jość dźvie niezvyčajna azdoblenyja draŭlanyja chaty. Adna ź ich pieratvoranaja ŭ svojeasablivuju vialikuju mazaiku z roznakalarovych płastykavych nakryvak, druhaja ŭpryhožanaja raznymi ptuškami i draŭlanymi ŭzorami, piša pristalica.by.
Pieršaja chata znachodzicca na Centralnaj vulicy. Zdalok zdajecca, što jaje fasad prosta razmalavany jarkimi arnamientami, ale zblizku vidać, što amal usie vyjavy zroblenyja zvyčajnymi płastykavymi nakryŭkami ad butelek.
Nakryŭki vykarystanyja nie tolki na adnym baku chaty. Jany abramlajuć vokny, utvarajuć uzory na rahach budynka i ciahnucca ŭzdoŭž karniza.
Siarod arnamientaŭ možna ŭbačyć cełyja kampazicyi i piersanažaŭ. Nad karnizam raźmiaściłasia ptušynaja siamja — pievień, kury i kuraniaty. Nižej jość vyjavy muraški i ślimaka, a taksama dreŭ i kvietak. Na inšym baku doma možna razhledzieć miadźviedziaŭ, matylkoŭ i mulciašnuju varonu.
Niezvyčajna aformleny i płot. Na draŭlanych panelach zroblenyja vyjavy sabaki, kata, kačak i inšych piersanažaŭ. Asobnyja paneli nahadvajuć ekspanaty nievialikaj vuličnaj halerei.
Miascovyja žychary raskazali, što aŭtarkaj takoha afarmleńnia była mastačka. Ciapier chata maje inšych haspadaroŭ, bo raniejšaja ŭładalnica pradała jaje, ale stvoranaje joju azdableńnie zachavałasia.
Druhaja niezvyčajnaja chata znachodzicca na susiedniaj Słužbovaj vulicy. Budynak staić na rahu, tamu jaho dobra vidać navat z darohi R-23.
U adroźnieńnie ad pieršaj chaty, tut niama jarkich nakryvak i vialikaj kolkaści roznych piersanažaŭ. Chata maje biruzovy draŭlany fasad ź biełymi raznymi elemientami. Asabliva vyłučajucca vokny: nad imi raźmieščanyja dźvie biełyja ptuški, a samo vakonnaje abramleńnie dapoŭniena dekaratyŭnymi draŭlanymi detalami. Na frantonie draŭlanymi litarami vykładziena nazva vulicy — «Słužiebnaja».
Pierad domam staić błakitny płot, upryhožany vialikimi biełymi ptuškami ŭ toj ža stylistycy. Raznyja elemienty pieratvarajuć zvyčajnuju aharodžu ŭ praciah azdableńnia chaty.
Takoje afarmleńnie źviazana z tradycyjaj dekaratyŭnaha ŭpryhožvańnia draŭlanych chat, kali asablivaja ŭvaha nadavałasia voknam, frantonu i inšym elemientam fasada.
U centry Minska pradajecca kvatera-muziej. Tam antykvarnaja mebla i vialikija pakoi
Z samarobnym čoŭnam, husiami i ziołkami zamiest lekaŭ. Jak žyvie sapraŭdny paleski rabinzon
«Padlašša niedaacenienaje novymi emihrantami». Biełarus stvaraje fotaprajekt, pryśviečany akanicam chat na polskim pamiežžy
U vioscy na Hrodzienščynie možna kupić pałovu vulicy za 315 rubloŭ
Što viadoma pra viciebčuka, jakoha vinavaciać u sprobie padryvu samalota ŭ Hiermanii12
Kamientary