Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»

Z nahody vychadu novaha sinhła, daviedalisia ŭ Kazimira, jak jon staŭ razmaŭlać i pisać pieśni pa-biełarusku ŭ pieršapačatkova ruskamoŭnaj siamji, a taksama raspytali ŭdzielnikaŭ hurta pra toje, jak pa cahlinkach farmavaŭsia ich skład i čym kožny ź ich zajmajecca pa-za muzykaj.

Pavialičyć

Jak pačynałasia Prypiać?

Choć jašče ŭ dziciačym sadku Kazimir maryŭ stać chimikam, usio ž naradžeńnie ŭ siamji muzyki šmat u čym pieradvyznačyła jaho budučyniu.

«Baćki raskazvali mnie, što budučy trochhadovym dziciom ja chadziŭ pa kvatery i napiavaŭ pieśniu «Piatli prychilnaści»: «Ulajaia kosmasu». Nu, i z małych hod da niadaŭniaha času naviedvaŭ kancerty «Piatli»— asiarodździe, u jakim ja ros, spryjała raźvićciu majoj ciahi da muzyki i post-panku ŭ pryvatnaści».

«Post-pank — muzyka sumnych ludziej, heta blizka našamu narodu», — dadaje Cimafiej. «Usie my ŭ 90‑ia słuchali «Kino», The Cure, Joy Division, Sonic Youth, Pixies».

Praŭda, pieršapačatkova sam Savicki-starejšy byŭ zaciatym zaŭziataram mietału.

«Viedajecie — vulica, starejšyja z «vožykami» na hałovach, u čornych klapanych skurankach, na «Javach» z zadranymi pad 45 hradusaŭ uharu siaduškami i z «mafonam» na ŭsiu vulicu, ź jakoha hrymieła jakoje-niebudź «Balls to the wall, man!» — jak takija «płachišy» mohuć chłapčuka nie ŭrazić?

Ale kali ja ŭpieršyniu ŭbačyŭ pa «Vidźmo-nievidźmo» ŭ cudoŭnaha Siarhieja Filimonava klip Therapy na «Die Laughing», ja zrazumieŭ, što heta mienavita toje, što adlustroŭvaje rečaisnaść vakoł mianie, i ja z hetym muzłom całkam sinchronna rezanuju».

Cimafiej raskazvaje, što syn z malenstva pačaŭ sprabavać pisać muzyku. Na samym pačatku heta byŭ rep.

«Dla jaho, samo saboj, byli patrebnyja bity. Navyk napisańnia minusaŭ ja i asvojvaŭ», — zhadvaje Kazimir. «Pryčym pisaŭ ja nie tolki dla čytki tekstu, ale i dla stvareńnia asobnych kampazicyj u styli padobnym na jungle, easy listening ci štości nakštałt taho. U tyja časy ja byŭ mocna natchniony elektronnaj muzykaj Bonobo, zachaplaŭsia taksama Depeche Mode i ŭsłuchoŭvaŭsia ŭ ich instrumientały, sprabujučy pačarpnuć štości novaje dla siabie. U peŭny momant ad instrumientałaŭ ja stamiŭsia i zrabiŭ pierapynak».

Tym časam maci kupiła Kazimiru ŭkulele. Bas baćki ž zaŭsiody byŭ pad rukoj, i tak na niejki čas chłopiec źnik u svaim pakoi ŭžo z novymi instrumientami.

«A potym Kazimir prynios da mianie pieršyja pieśni «Matyli» i «Miedykamient», — zhadvaje Cimafiej. «Nie chaču, kaniečnie, chvalicca, ale za 30 hadoŭ u muzycy ja staŭ niadrennym hieołaham-raźviedvalnikam. Biez pamyłki baču ŭ hary kamianioŭ nieahranieny ałmaz. Ja adrazu skazaŭ synu, što ludzi pavinny heta pačuć!»

Mienavita tak i pačynałasia Prypiać. Pieršyja demki dasłali Dzianisu Tarasienku, ź jakim Cimafiej znajomy sa školnych časoŭ.

«Chłopcy dasłali mnie niekalki piesień na prasłuchoŭvańnie z pytańniem, ci cikava mnie było b dałučycca. U tych demkach było niešta ad rańniaha Coja. I junackaja naiŭnaść, i adnačasova niejkaja hłybinia. Ja raptam adčuŭ siabie tak, jak byccam heta ja sam tolki pačynaŭ svoj muzyčny šlach. Naturalna, ja pahadziŭsia», — raskazvaje lidar «Raźbitaha serca pacana».

Pavialičyć

Krynica ŭsich pieśniaŭ Prypiać — tvory, napisanyja samim Kazimiram. 

«Paśla naradžeńnia idei ŭsio vyhladaje tak: ja zapisvaju hitaru, nakidvaju ŭ Fl Studio barabany, pišu tekst u pracesie, zapisvaju vakał (časam jašče i bas -hitaru). Takim čynam vychodzić asnova dla materyjału, jakuju ja pakazvaju Cimochu i Dzioniu. Nu i dalej my ŭžo pracujem u kamandzie. Z ulikam ich prapanovaŭ ja mahu paźniej dapisać ci pierapisać niešta».

«Asensavaŭ, što paśla siami kłasaŭ biełaruskaj škoły, ja nie viedaju, jak pa-biełarusku skazać «priviet»»

U siamji Savickich paskaralnikam pierachodu na biełaruskuju movu stali padziei 2020 hoda. Kazimir žyŭ zvyčajnaje padletkavaje žyćcio, ale tut baćkam pryjšłosia emihravać u Polšču.

«Ź dziacinstva prychodziłasia pakrysie vynyrvać, ja pačaŭ aziracca vakoł», — zhadvaje tyja padziei lidar «Prypiaci». «Praź niejki čas da mianie pryjšło ŭśviedamleńnie, što, raz ja biełarus, to i mova maja biełaruskaja — usio łahična i samo saboj zrazumieła. Ale ź niekatorym ździŭleńniem ja asensavaŭ, što paśla siami kłasaŭ biełaruskaj škoły nie viedaju, jak pa-biełarusku skazać «priviet».

Tady ja pačaŭ aktyŭna padciahvać biełaruskuju: padpisaŭsia na adukacyjnyja kanały i błohieraŭ, pačaŭ čytać u internecie biełaruskamoŭnyja vieršy, prozu, słoŭniki, słuchać patryjatyčnyja, narodnyja i sučasnyja pieśni (naprykład, Pahoniu, himn BNR, «Ručniki» Dančyka, N.R.M i Deviation). Ja razumieŭ, što navuka nie budzie prostaj, bo niama ŭmoŭnaha Duolingo dla achvočych zahavaryć pa-biełarusku. Ale adnačasova z hetym było jasna, što ŭsio mahčyma».

Tak fiłałohija stała adnym z chobi Kazimira. 

«A pisać vieršy, darečy, ja pačaŭ tamu, što mnie pačatkova padabałasia ich čytać. Aproč taho, ich napisańnie zdavałasia davoli «nišavym». To bok, heta byŭ adzin sa srodkaŭ vyvučeńnia i praktyki movy ŭ dadatak da samavyjaŭleńnia». 

Pavialičyć

Pra aŭtarskuju «Kałychanku»

Kazimir zapeŭnivaje, što ich «Kałychanka» pryjdziecca da hustu ŭsim amataram indzi-roka, post-panka i prychilnikam avanhardavych tekstaŭ.

View this post on Instagram

A post shared by Prypiać (@prypiac)

Prypiać i dalej płanuje vypuskać treki pa adnym, imknučysia ŭ hetaj spravie da rehularnaści. U płanach i albom.

«Ale ciažka davać niejkuju datu, bo nie zaŭsiody ŭsio składvajecca tak, jak nam chaciełasia b. U tym liku ź finansami na zapis i źviadzieńnie», — kamientuje Kazimir.

Pavialičyć

Pa-za hurtom chłopiec vučycca ŭ licei i płanuje pastupać va ŭniviersitet na psichałohiju albo kulturaznaŭstva. Jaho ž baćka zajmajecca ramontami pamiaškańniaŭ i zachaplajecca rybałkaj. A Dzianis Tarasienka pracuje ŭ aŭtaservisie (jon śpiecyjalist pa afarboŭcy i kuzaŭnym ramoncie aŭtamabilaŭ) i vystupaje z «Raźbitym sercam pacana».

• 3
• 1
• 0
• 0
• 0
• 0
• 0
• 2