«Pralesak nie baču». Były časovy pavierany ŭ spravach Polščy ŭ Biełarusi vykazaŭsia pra pieramovy ź Minskam
Były časovy pavierany ŭ spravach Polščy ŭ Biełarusi Vitold Juraš u efiry telekanała «Biełsat» prakamientavaŭ sustreču kiraŭnikoŭ MZS na palach Hienasamblei AAN i zajaviŭ, što pieramovy ź Minskam pryviaduć tolki da skasavańnia sankcyj, ale nie da demakratyzacyi Biełarusi. Choć raniej jon sam vystupaŭ za dyjałoh ź biełaruskimi ŭładami.
«Ciapier lubuju narmalizacyju ź Minskam ja liču całkam pamyłkovaj», — skazaŭ na «Biełsacie» žurnalist vydańnia Onet.pl, časovy pavierany ŭ spravach Polščy ŭ Biełarusi ŭ 2010—2011 hadach Vitold Juraš.
U čas svajoj pracy ŭ Minsku jon, naadvarot, vystupaŭ za pieramovy ź biełaruskimi ŭładami. Tahačasny dypłamat ličyŭ mahčymym nie dapuścić spaŭzańnia Biełarusi z aŭtarytaryzmu ŭ dyktaturu i pieratvareńnia našaj krainy ź niezaležnaj dziaržavy ŭ, jak jon skazaŭ, «paŭkałoniju Rasii»:
«Ja 15 hadoŭ tamu kazaŭ zusim inakš. Ja tady kazaŭ: tak, treba razmaŭlać. Ale ciahnik adyšoŭ, usio».
Tady ŭ Varšavie mnohija vystupali suprać dyjałohu. Ciapier ža pieramovy ź Minskam na ruku Kramlu, upeŭnieny Juraš:
«Kali my staniem razmaŭlać ciapier ź Minskam, to vynik budzie adzin: nie budzie sankcyj. A kali nie budzie sankcyj na Biełaruś, tady nie budzie i na Rasiju, pakolki ekanamična heta adno i toje ž».
Eks-dypłamat pry hetym miarkuje: ułady Biełarusi nie mohuć harantavać, što z našaj terytoryi nie budzie napadu na susiedziaŭ, pakolki «vyrašaje nie Minsk, a Maskva», i «Łukašenka nie ŭ stanie admović Pucinu, kali raptam Pucin zachoča vajny»:
«Nie treba adčuvać iluzij, što ciapierašni Łukašenka moža ŭ vypadku rašeńnia Pucina napaści na Litvu jaho, prabačcie za vyraz, pasłać. 15 hadoŭ tamu nazad — tak, jon moh skazać: nie. A ciapier nie moža».
Dyskusii vakoł mahčymaha paciapleńnia pamiž Minskam i Varšavaj pačalisia paśla sustrečy ministraŭ zamiežnych spraŭ Biełarusi i Polščy Maksima Ryžankova i Radasłava Sikorskaha na palach Hienasamblei AAN u Ńju-Jorku. Pra pierśpiektyvy stasunkaŭ Sikorski skazaŭ vielmi vobrazna: «Heta jak praleska, jakaja moža zaćviści, kali nadvorje spryjalnaje».
Vitold Juraš na heta zaŭvažyŭ, što «nijakich pralesak nie bačyć»:
«Ja nie chaču tut kazać, što sustreča Sikorskaha z Ryžankovym była niejkaj skandalnaj, pakolki ŭ AAN — heta takaja tradycyja: sustrakajucca krainy, u jakich vielmi składanyja ŭzajemaadnosiny».
Były dypłamat padsumavaŭ, što ciapier pieramovy ź Minskam mohuć pryvieści da skasavańnia sankcyjaŭ i vyzvaleńnia palitviaźniaŭ, ale nie da spynieńnia represijaŭ u Biełarusi.
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ9
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary