Polšča prapanavała raźmiaścić u siabie zavod pa vytvorčaści rakiet Patriot dla Ukrainy
Polšča prapanavała raźmiaścić na svajoj terytoryi pradpryjemstva pa vytvorčaści rakiet-pierachopnikaŭ dla amierykanskich kompleksaŭ supraćpavietranaj abarony Patriot, kali Ukraina atrymaje na heta adpaviednuju licenziju ZŠA. Pra heta paviedamiła namieśnica ministra nacyjanalnaj abarony Polščy Mahdalena Sabkoviak-Čarnieckaja.
Pavodle jaje słoŭ, raźmiaščeńnie takoj vytvorčaści ŭ Polščy dazvoliła b harantavać biaśpieku važnaha pradpryjemstva. Akramia taho, Varšava raźličvaje spačatku stvaryć u krainie servisny centr dla Patriot, a zatym naładzić vytvorčaść rakiet dla hetych kompleksaŭ. Namieśnica ministra padkreśliła, što hetyja płany źjaŭlajucca ŭłasnaj inicyjatyvaj Polščy i nie zaležać ad rašeńnia ZŠA adnosna vytvorčaści rakiet va Ukrainie.
25 vieraśnia prezident Ukrainy Uładzimir Zialenski zajaviŭ, što padčas sustrečy z Donaldam Trampam u Ńju-Jorku amierykanski prezident nibyta pryniaŭ kančatkovaje rašeńnie ab pieradačy Kijevu licenzii na vytvorčaść rakiet dla Patriot. Sam Tramp, adnak, nie adkazaŭ na pytańnie, ci sapraŭdy jon daŭ takuju zhodu.
Jašče ŭ lipieni polskaje Ministerstva nacyjanalnaj abarony prapanoŭvała ZŠA i Ukrainie sumiesna vyrablać rakiety dla Patriot. U Polščy spasyłalisia na jaje hieahrafičnaje i hieapalityčnaje stanovišča, a taksama na raźvićcio mahčymaściaŭ polskaj abaronnaj pramysłovaści.
Dazvoł na vytvorčaść rakiet PAC-3 dla Patriot u Jeŭropie taksama sprabuje atrymać Hiermanija. Ministr abarony hetaj krainy Barys Pistoryus paviedamlaŭ, što abmiarkoŭvaŭ hetaje pytańnie z kiraŭnikom Pientahona Pitam Chiehsietam padčas vieraśnioŭskaj sustrečy ŭ Vašynhtonie. Adnoj z pryčyn jon nazyvaŭ vysoki popyt na takija bojeprypasy.
3 žniŭnia Ministerstva vajny ZŠA zaklučyła pahadnieńni na 3 miljardy dalaraŭ dla pavieličeńnia vytvorčaści rakiet Patriot i THAAD. Amierykanskija ŭłady raźličvajuć utraja pavialičyć vypusk rakiet PAC-3.
Ukraina vykarystoŭvaje sistemy Patriot dla abarony ad roznych pavietranych pahroz, u tym liku ad balistyčnych rakiet, jakimi Rasija rehularna abstrelvaje ŭkrainskuju terytoryju. Pry hetym stvareńnie ŭłasnaj vytvorčaści rakiet pry atrymańni amierykanskaj licenzii moža zaniać bolš za hod.
U siaredzinie žniŭnia Zialenski zajaŭlaŭ, što Ukrainie nieabchodna kala 5% zapasaŭ rakiet Patriot, jakija znachodziacca ŭ ZŠA, kab pieražyć budučuju zimu na fonie ŭzmacnieńnia rasijskich atak. Pavodle jaho słoŭ, dla pierachopu ŭsich balistyčnych rakiet, jakija zapuskajucca pa terytoryi Ukrainy, spatrebiłasia b kala 10% amierykanskich zapasaŭ.
Tramp spadziajecca na pahadnieńnie pamiž Zialenskim i Pucinym jašče da surovaj zimy
Zialenski paviedamiŭ pra damoŭlenaść adnosna rakiet-pierachopnikaŭ dla Patriot
Vajna ź Iranam pryviała da deficytu bojeprypasaŭ u ZŠA
Hiermanija pieradaść Ukrainie rakiety-pierachopniki PAC-2 dla sistem Patriot
Ukraina atrymała partyju rakiet da Patriot
Ciapier čytajuć
KDB zapuściŭ novy bot u telehramie dla viarboŭki biełarusaŭ za miažoj. Prapanujuć rasklejvać ulotki, fatahrafavać abjekty i «niešta inšaje»7
Kamientary