Amatar ruskaj armii, dačka padarožničaje pa Jeŭropie. Šeść faktaŭ pra hienierała Muraviejku, jakoha pastavili ŭ Administracyju Łukašenki

Byŭ davieranaj asobaj Łukašenki na vybarach

Pieranakiroŭvajučy Muraviejku ŭ Administracyju, Łukašenka adznačyŭ, što prapanavaŭ jaho kandydaturu sam i choča mieć alternatyŭny punkt hledžańnia na situacyju ŭ siłavych padraździaleńniach.

Muraviejka byŭ davieranaj asobaj Łukašenki padčas apošniaj vybarčaj kampanii.

«Heta važna, ale heta nie hałoŭnaje», — niby apraŭdvaŭsia Łukašenka. «Kali chtości skaža, što heta ledź nie rodny brat prezidenta, toj pamylajecca, tamu što ja vas navat da pasady načalnika Hienštaba praktyčna i nie viedaŭ».

Pavialičyć

Prychilnik «ruskaha śvietu»

55‑hadovy Muraviejka pachodzić z Marjinaj Horki. U 1992‑m jon skončyŭ Minskaje vyšejšaje vajskova-palityčnaje ahulnavajskovaje vučylišča. Paśla pastupiŭ u minskuju Vajskovuju akademiju, jakuju skončyŭ u 2001-m. Praź niekalki hadoŭ vučyŭsia ŭ Rasii — u Akademii Hienštaba RF. Skončyŭ jaje ŭ 2008‑m z załatym miedalom.

U 2019 hodzie Muraviejku, užo na pazicyi namieśnika načalnika biełaruskaha Hienieralnaha štaba i ŭ zvańni hienierał-majora ŭznaharodzili rasijskim ordenam družby. Muraviejka tady vykazvaŭsia, što «ŭpeŭnieny, što nijakija prablemy i dadumki nie zmohuć parušyć stratehičnaje partniorstva pamiž Rasijaj i Biełaruśsiu».

Na dumku palityka Paŭła Łatuški, Muraviejka — adzin z vyraznych pradstaŭnikoŭ «ruskaha śvietu» ŭ biełaruskim siłavym i vajskovym błoku.

Sam Muraviejka chvaliŭ rasijskuju armiju jak «samuju mahutnuju ŭ śviecie».

Adzin były vajskoviec tak charaktarazavaŭ Muraviejku. Jon razvažaje, što biełaruskich aficeraŭ možna padzialić na try katehoryi. Pieršaja — patryjoty Radzimy i ludzi dumajučyja, druhaja — tyja, chto słužyć, bo niama alternatyvy, ale nie robiać lišniaha, prytrymlivajucca zakona.

I treciaja katehoryja — «psichatyp Karpiankova», udarniki pracy, jakija hatovy na ŭsio, kab zrabić karjeru i dahadzić načalstvu. «Voś Muraviejka, napeŭna, budzie numaram adzin u śpisie aficeraŭ treciaj katehoryi», — ličyć były vajskoviec.

Dačka — amatarka padarožžaŭ pa Jeŭropie

Muraviejka žanaty na piedahohu-psichołahu Alenie, jakaja, zhodna z apošniaj dastupnaj infarmacyjaj u bazach «Biełpoła», pracavała pa śpiecyjalnaści ŭ administracyi Partyzanskaha rajona Minska.

U hienierał-majora jość 26‑hadovaja dačka Viktoryja, jakaja skončyła BDU. Viadoma, što jana lubić vandravać pa Jeŭropie. Mierkavana, dziaŭčyna vykładaje ci vykładała francuzskuju movu.

Pavialičyć

Abvinavaciŭ biełarusaŭ u «niedastatkovym patryjatyźmie»

Jak ličyć Muraviejka, vajskovyja načalniki prahledzieli padzieńnie patryjatyzmu ŭ hramadstvie — tamu ŭ tym liku i adbylisia padziei 2020 hoda. I kali b siłaviki nie abaranili krainu, było b zusim drenna.

«My z vami stanovimsia śviedkami taho, jak kasmapalityčnyja pohlady ŭkaraniajucca ŭ śviadomaść biełarusaŭ. Ličačy siabie ludźmi śvietu, častka našych suajčyńnikaŭ hatovaja stać ludźmi biez Radzimy, admovicca ad jaje abarony, źjechać za miažu i parvać suviaź z rodnaj ziamloj», — kazaŭ jon. A kab hetaha paźbiahać, u krainie, na dumku hienierał-majora, musić być mocnaja dziaržaŭnaja prahrama patryjatyčnaha vychavańnia nasielnictva.

Muraviejka i prapanavaŭ u 2021 hodzie raspracavać novuju prahramu patryjatyzacyi.

Pahražaŭ prarubić kalidor da mora praź Litvu i ŭžyć jadziernuju zbroju

U 2023 hodzie Muraviejka pryhraziŭ, što Biełaruś moža «prasiekčy žyćciova važny kalidor» praź Litvu pry dapamozie zbroi.

«Litva faktyčna zabaraniła nam pieramiaščać svaje tavary praź miažu. Pa ŭsich normach mižnarodnaha prava taki krok adnosicca da ekanamičnaj ahresii. Z punktu hledžańnia banalnaj łohiki my majem usie padstavy, kab prasiekčy žyćciova važny dla nas kalidor siłaj zbroi», — zajaviŭ Muraviejka ŭ 2023 hodzie.

Paśla zajaŭ, što Pucin pieradaŭ Biełarusi jadziernuju zbroju, hienierał-major pahražaŭ joj.

«My navučylisia abychodzicca z hetaj zbrojaj. My ŭmiejem upeŭniena jaje prymianiać. My zdolnyja heta rabić i, možacie nie sumniavacca, my heta zrobim, kali suvierenitetu i niezaležnaści našaj krainy budzie stvorana pahroza», — farmulavaŭ jon u intervju na ANT.

Jeŭropa, na dumku Muraviejki, maryć pra revanš.

«Zachad faktyčna rychtujecca da vajny. Tamu hučyć revanšysckaja skiravanaść u rytorycy zachodnich palitykaŭ, aktyŭna pravodziacca mierapryjemstvy pa ŭdaskanalvańni i raźvićciu ŭzbrojenych sił, zakuplajecca sučasnaje ŭzbrajeńnie. 

Stanovišča vakoł Biełarusi ciapier jašče bolš składanaje, čym była ŭ červieni 1941‑ha napiaredadni pačatku vajny», — kamientavaŭ Muraviejka žurnalistam, budučy na pazicyi načalniki Hienštaba.

«Chaču skazać tym, chto točyć zuby, rychtuje zbroju ci źbirajecca pryjści i ŭładkavać tut kryvavuju bojniu: siłavy błok Biełarusi manalitny i ŭjaŭlaje ź siabie najmahutny kułak. Pačynajučy ad dziaržaŭnaj miažy i skančajučy ŭčastkovym u maleńkim nasielenym punkcie», — adrasavaŭ jon lubomu, chto zachoča «nachilić» Biełaruś.

Pavialičyć

Pad sankcyjami 

Z 2023 hoda Muraviejka znachodzicca ŭ sankcyjnym śpisie ES, kudy trapiŭ ź inšymi asobami, adkaznymi za vajskovyja dziejańni va Ukrainie. Taksama jon znachodzicca ŭ sankcyjnym pakiecie Ukrainy i Kanady, u tym liku za svaje vykazvańni. Tak, Muraviejka nazyvaŭ zapusk «Arešnika» pa Dniapry «žestam dobraj voli», a vajnu Rasii suprać Ukrainy jon vyznačaje jak reakcyju na patrebu abarony ruskamoŭnaha nasielnictva.

«Ruski narod — heta taki spakojny talerantny narod, ale złavać jaho nie treba i nie treba stavić umovy. Na kožnuju pravakacyju, nieadekvatnaje dziejańnie budzie adkaz», — apraŭdvaŭ jon dziejańni ruskaj armii ŭ razmovie z prapahandystkaj Ludmiłaj Hładkaj.

• 0
• 0
• 2
• 6
• 0
• 0
• 4
• 1