Pryznačeńnie Muraviejki ŭ Administracyju — heta kambinacyja Łukašenki, sens jakoj pakul niezrazumieły

Raniej Muraviejka zajmaŭ pasadu načalnika Hienieralnaha štaba Uzbrojenych sił i pieršaha namieśnika ministra abarony. Pryčym pierasadzili na novuju pasadu jaho praz dva dni paśla taho, jak jamu spoŭniłasia 55 hadoŭ. Jak tolki spoŭniłasia, adrazu i papiorli, choć enierhii ŭ hetaha hienierała było choć adbaŭlaj.

Takaja rakiroŭka stała siurpryzam dla ŭsich, bo hienierał-major Pavieł Muraviejka maje reputacyju ćvierdałobaha navat pa mierkach ciapierašniaj siłavoj viarchoŭki. A daśviedčany ŭ kułuarnych čutkach Pavieł Łatuška nazyvaŭ jaho pradstaŭnikom rasijskaha łobi ŭ biełaruskim siłavym błoku. Muraviejka vučyŭsia ŭ Akademii Hienštaba RF, jakuju skončyŭ u 2008‑m z załatym miedalom.

Źviartaŭ uvahu hety hienierał svaimi zajavami. Naprykład, jon kazaŭ, što Biełaruś maje prava siłaj prasiekčy kalidor praź Litvu da mora. Hetyja słovy siłavika pryviali da sapraŭdnaha mižnarodnaha skandału pamiž Minskam i Vilniaj. Taksama Muraviejka pahražaŭ susiednim krainam jadziernaj zbrojaj i raskazvaŭ pra miljony kibieratak na Biełaruś — poŭnuju łuchtu.

U 2022‑m Muraviejku pieraviali na pasadu pieršaha namieśnika dziaržaŭnaha sakratara Rady biaśpieki Biełarusi, a ŭ 2024‑m i ŭvohule pastavili kiravać Hienštabam. Naziralniki źviartali ŭvahu, što adstaŭka Viktara Huleviča adbyłasia paśla viartańnia Łukašenki z Maskvy, a pryznačeńnie Muraviejki — u dzień vizitu Pucina ŭ Minsk.

Ciapier, jak bačym, hienierała pieraviali ŭ Administracyju. Pryčym nibyta pa asabistym žadańni niepasredna Łukašenki, jaki padkreślena zajaviŭ, što heta robicca cieraz hałavu kiraŭnika Administracyi Dźmitryja Krutoha.

Zahadka tut, čym kankretna budzie zajmacca Muraviejka na pasadzie čynoŭnika. Sam Łukašenka adkazvaje na hetaje pytańnie voś taki čynam: «Mnie jak prezidentu i hałoŭnakamandujučamu Uzbrojenymi siłami vielmi važna mieć niekalki, kali chočacie, alternatyŭnych punktaŭ hledžańnia na situacyju ŭ našych siłavych padraździaleńniach», — zaŭvažyŭ jon.

Raniej siłavyja struktury kaardynavała Rada biaśpieki. A ciapier što, u dadatak da jaje budzie jašče namieśnik kiraŭnika Administracyi? Jakija jaho funkcyi tady?

Składvajecca ŭražańnie, što Łukašenka rychtuje ŭ siłavym błoku niejkija pieramieny. Što heta budzie, skazać pakul ciažka, ale ž kambinacyja jaŭna raspracavanaja i pacichu budzie realizoŭvacca. Pytańnie — a što ž vyklikała patrebu ŭ hetych pieramienach? Banalnaje žadańnie abmaładzić kadry i pry hetym nie stvaryć uražańnia ŭ Maskvy, što prarasijskaha hienierała adsunuli? Ci čystka aparatu ad zanadta ŭžo prarasijskich hienierałaŭ? Ci heta prosta pieršy chod u rucinnaj pieratasoŭcy kadraŭ, kab nichto nie zasiedžvaŭsia na adnoj pasadzie zadoŭha?

U Hienštabie Muraviejku siońnia źmianiŭ hienierał-major Uładzimir Bieły.

Jon zusim niadaŭna, z 8 lipienia hetaha hoda, pracavaŭ namieśnikam ministra abarony. Da taho Bieły ŭznačalvaŭ hałoŭnaje ŭpraŭleńnie bajavoj padrychtoŭki Uzbrojenych siłaŭ. U svoj čas Bieły kamandavaŭ hvardziejskaj asobnaj pavietrana-desantnaj bryhadaj, i byŭ načalnikam štaba — pieršym namieśnikam kamandujučaha Siłami śpiecyjalnych apieracyj, a taksama kamandujučym Zachodnim apieratyŭnym kamandavańniem. U adroźnieńnie ad Muraviejki, Uładzimir Bieły ŭ Rasii nie vučyŭsia — redki dla ciapierašniaha hienieralitetu vypadak, chutčej, vyklučeńnie. 

• 0
• 0
• 0
• 0
• 3
• 1
• 0
• 0