«Łukašenku nielha nazvać navat małodšym partnioram Pucina». Kit Kiełah raskazaŭ pra rolu Łukašenki ŭ pieramovach ZŠA i Rasii
Alaksandr Łukašenka nie źjaŭlajecca dla Uładzimira Pucina navat małodšym partnioram, biełaruskaje vojska nie ŭjaŭlaje surjoznaj siły, a častkovaje źniaćcie sankcyj Vašynhtona było vyklučna prahmatyčnym krokam dziela vyzvaleńnia palitviaźniaŭ. Pra heta zajaviŭ były śpiecpradstaŭnik ZŠA pa Ukrainie, a ciapier sustaršynia Centra amierykanskaj biaśpieki ŭ Instytucie palityki «Amieryka pierš za ŭsio» Kit Kiełah, adkazvajučy na pytańnie žurnalista vydańnia «Lusterka» na Varšaŭskim forumie ab biaśpiecy.
Niadaŭna Donald Tramp prapanavaŭ pieravieści Džona Koŭła, jaki zajmaŭsia biełaruskim kirunkam, na pasadu śpiecpradstaŭnika pa spravach zakładnikaŭ. Na ciapierašnim Varšaŭskim forumie ab biaśpiecy žurnalist «Lusterka» spytaŭ u Kita Kiełaha, ci aznačaje heta, što Biełaruś i palitviaźni bolš nie źjaŭlajucca pryjarytetam dla ZŠA, a Łukašenka bolš nie patrebny Vašynhtonu dla kantaktaŭ z Pucinym.
Kiełah nazvaŭ vyzvaleńnie ludziej kankretnaj metaj, jakoj Vašynhton paśpiachova dasiahnuŭ. Pry hetym jon skieptyčna acaniŭ značnaść biełaruskaha palityka dla Rasii.
«Biełaruś i Łukašenka zusim nie źjaŭlajucca dla Pucina asnoŭnymi partniorami. Ja maju na ŭvazie, što jaho navat nielha nazvać małodšym partnioram. U ich niama mocnych uzbrojenych sił», — zajaviŭ amierykanski hienierał.
Źniaćcie častki amierykanskich sankcyj Kiełah patłumačyŭ vyklučna prahmatyčnymi pryčynami.
«My addajem pieravahu tamu, kab samaloty «Boinh» nie padali ź nieba. I tamu my skazali, što budziem vykonvać peŭnyja pasłuhi pry peŭnych umovach — kali jany vyzvalać palityčnych źniavolenych», — raskazaŭ Kit Kiełah.
Jon taksama padzialiŭsia detalami pra svaje pieramovy z Łukašenkam i pra toje, jak adbyvałasia vyzvaleńnie biełaruskich palitviaźniaŭ.
«Pieršaja hrupa palityčnych źniavolenych, jakich my adtul vyciahnuli, u toj momant dumała, što ich viazuć na rasstreł. Nasamreč jany byli ŭ kapiušonach, pakul my nie dastavili ich da miažy. Urešcie my źniali ź ich hetyja kapiušony i skazali, što ciapier jany svabodnyja. Heta byŭ svajho rodu chutki abmien z Łukašenkam, i ŭ mianie była mahčymaść pryjechać da jaho i pahavaryć. Ščyra kažučy, jon sam raskazaŭ mnie pra heta, kab my mahli parazmaŭlać asobna, — pra toje, jak jon prymusiŭ Jaŭhiena Pryhožyna spynić svoj marš [na Maskvu] u 2023 hodzie. Było vielmi cikava pačuć heta ad jaho, ale mianie bolš niepakoiła vyzvaleńnie palityčnych źniavolenych. I na hety kont ja taksama atrymaŭ dobry adkaz», — skazaŭ Kit Kiełah.
21 červienia 2025 hoda Kit Kiełah, jaki na toj momant zajmaŭ pasadu śpiecyjalnaha pradstaŭnika ZŠA va Ukrainie, pryjazdžaŭ u Minsk i pravioŭ pieramovy z Alaksandram Łukašenkam. Paśla hetaha vyzvalili 14 palitviaźniaŭ, u tym liku Siarhieja Cichanoŭskaha.
Ciapier čytajuć
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary