«Лукашэнку нельга назваць нават малодшым партнёрам Пуціна». Кіт Келаг расказаў пра ролю Лукашэнкі ў перамовах ЗША і Расіі
Аляксандр Лукашэнка не з'яўляецца для Уладзіміра Пуціна нават малодшым партнёрам, беларускае войска не ўяўляе сур'ёзнай сілы, а частковае зняцце санкцый Вашынгтона было выключна прагматычным крокам дзеля вызвалення палітвязняў. Пра гэта заявіў былы спецпрадстаўнік ЗША па Украіне, а цяпер сустаршыня Цэнтра амерыканскай бяспекі ў Інстытуце палітыкі «Амерыка перш за ўсё» Кіт Келаг, адказваючы на пытанне журналіста выдання «Люстэрка» на Варшаўскім форуме аб бяспецы.
Нядаўна Дональд Трамп прапанаваў перавесці Джона Коўла, які займаўся беларускім кірункам, на пасаду спецпрадстаўніка па справах закладнікаў. На цяперашнім Варшаўскім форуме аб бяспецы журналіст «Люстэрка» спытаў у Кіта Келага, ці азначае гэта, што Беларусь і палітвязні больш не з'яўляюцца прыярытэтам для ЗША, а Лукашэнка больш не патрэбны Вашынгтону для кантактаў з Пуціным.
Келаг назваў вызваленне людзей канкрэтнай мэтай, якой Вашынгтон паспяхова дасягнуў. Пры гэтым ён скептычна ацаніў значнасць беларускага палітыка для Расіі.
«Беларусь і Лукашэнка зусім не з'яўляюцца для Пуціна асноўнымі партнёрамі. Я маю на ўвазе, што яго нават нельга назваць малодшым партнёрам. У іх няма моцных узброеных сіл», — заявіў амерыканскі генерал.
Зняцце часткі амерыканскіх санкцый Келаг патлумачыў выключна прагматычнымі прычынамі.
«Мы аддаем перавагу таму, каб самалёты «Боінг» не падалі з неба. І таму мы сказалі, што будзем выконваць пэўныя паслугі пры пэўных умовах — калі яны вызваляць палітычных зняволеных», — расказаў Кіт Келаг.
Ён таксама падзяліўся дэталямі пра свае перамовы з Лукашэнкам і пра тое, як адбывалася вызваленне беларускіх палітвязняў.
«Першая група палітычных зняволеных, якіх мы адтуль выцягнулі, у той момант думала, што іх вязуць на расстрэл. Насамрэч яны былі ў капюшонах, пакуль мы не даставілі іх да мяжы. Урэшце мы знялі з іх гэтыя капюшоны і сказалі, што цяпер яны свабодныя. Гэта быў свайго роду хуткі абмен з Лукашэнкам, і ў мяне была магчымасць прыехаць да яго і пагаварыць. Шчыра кажучы, ён сам расказаў мне пра гэта, каб мы маглі паразмаўляць асобна, — пра тое, як ён прымусіў Яўгена Прыгожына спыніць свой марш [на Маскву] у 2023 годзе. Было вельмі цікава пачуць гэта ад яго, але мяне больш непакоіла вызваленне палітычных зняволеных. І на гэты конт я таксама атрымаў добры адказ», — сказаў Кіт Келаг.
21 чэрвеня 2025 года Кіт Келаг, які на той момант займаў пасаду спецыяльнага прадстаўніка ЗША ва Украіне, прыязджаў у Мінск і правёў перамовы з Аляксандрам Лукашэнкам. Пасля гэтага вызвалілі 14 палітвязняў, у тым ліку Сяргея Ціханоўскага.
Цяпер чытаюць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»18
Каментары