Пад Гроднам прадаецца недабудаваны санаторый за тры мільёны даляраў
У аграгарадку Парэчча, што за 30 кіламетраў ад Гродна, выставілі на продаж недабудаваны аздараўленчы комплекс. За аб’ект просяць 9 мільёнаў рублёў, што складае прыкладна 3 мільёны даляраў, але можна таксама далучыцца да фінансавання яго дабудовы, піша newgrodno.by.
Парэчча вядомае найстарэйшым у Беларусі чыгуначным вакзалам, а таксама маляўнічай прыродай і лячэбнымі фактарамі. Тут ужо шмат гадоў працуе санаторый з такой самай назвай. Новы аздараўленчы комплекс узводзяць на беразе Малочнага возера.
Адметнасць аб’екта — яго размяшчэнне побач з унікальнай для Беларусі прыроднай крыніцай мінеральнай вады. Паводле апісання, гэта адзіная ў нашай краіне прыродная крыніца хларыдна-натрыева-кальцыевай вады з павышаным утрыманнем крэмнію і брому і нізкім узроўнем радону. На тэрыторыі комплексу прабілі дзве свідравіны з мінеральнай вадой.
Будаўніцтва завершанае прыкладна на 85%. Галоўны будынак плошчай 4 тысячы квадратных метраў разлічаны на 50 нумароў стандартнага і сямейнага тыпаў. Адначасова тут змогуць размясціцца каля 100—104 чалавек.
Праект прадугледжвае стварэнне спа-зоны з саунай, хамамам, джакузі і купеллю, а таксама зімовага саду і ацяплянай зашклёнай веранды з відам на возера. Для гасцей таксама абсталявалі ўласны пляж. Да комплексу ўжо падведзеныя газ і вада.
Сярод пераваг аб’екта называюць і яго геаграфічнае размяшчэнне: да літоўскай мяжы адсюль каля 10 кіламетраў, да польскай — каля 50. Акрамя таго, рэгіён знаходзіцца на маршруце, якім карыстаюцца расійскія турысты.
Цяпер чытаюць
А што будзе, калі вярнуцца ў Беларусь? Кажуць жа, што рэпрэсіі заканчваюцца3
А што будзе, калі вярнуцца ў Беларусь? Кажуць жа, што рэпрэсіі заканчваюцца
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары