Кая Калас: Амерыканскія перамоўшчыкі ўжо амаль два гады спрабуюць схіліць Украіну да капітуляцыі

«Амерыканскія перамоўшчыкі ўжо амаль два гады, больш за год, спрабуюць схіліць Украіну да капітуляцыі», — сказала Калас. Паводле яе слоў, Украіна дагэтуль не капітулявала на ўмовах Пуціна толькі дзякуючы падтрымцы Еўропы.

Калас таксама падкрэсліла, што еўрапейскія краіны павінны ўдзельнічаць у перамовах, каб ураўнаважваць пазіцыю Белага дома, якая, на яе думку, усё больш схіляецца да інтарэсаў Масквы.

Адносіны паміж ЗША і Еўропай пагоршалі пасля таго, як прэзідэнт ЗША Дональд Трамп заключыў з Пуціным пагадненне аб пастаўках дызельнага паліва і змякчыў санкцыі да красавіка 2027 года, не атрымаўшы ўзамен ніякіх саступак ад Расіі.

Трамп таксама заклікаў правесці ва Украіне новыя выбары, хоць падчас вайны праводзіць іх забаронена, і паскардзіўся, што з украінскім прэзідэнтам Уладзімірам Зяленскім складаней дамаўляцца, чым з Пуціным. Сам Зяленскі заявіў, што адчувае сябе здраджаным Трампам. У нядаўнім інтэрв’ю Bloomberg ён таксама сказаў, што бачыць спробы схіліць Украіну да капітуляцыі.

Выступаючы ў Страсбургу, Калас адказала на крытыку некаторых дэпутатаў Еўрапарламента, якія сцвярджалі, што Еўропа не мае стратэгіі дасягнення міру. Яна заявіла, што гэта не так, і нагадала пра дакумент, які яна перадала сталіцам краін ЕС. У ім пералічаныя патрабаванні да Масквы, выканання якіх Еўропа будзе дамагацца ў межах будучага ўрэгулявання.

Паводле слоў Калас, калі Расія выстаўляе максімалісцкія патрабаванні, то Еўропа таксама павінна выкласці свае ўмовы, каб ураўнаважыць перамовы і даць Маскве зразумець, што еўрапейскія дзяржавы павінны ўдзельнічаць у прыняцці рашэнняў, у тым ліку наконт магчымага зняцця санкцый.

«Мы не збіраемся аддаваць усё гэта задарма, бо гаворка ідзе не проста пра мір, а пра трывалы і справядлівы мір», — падкрэсліла яна.

Калас абвінаваціла Расію ў падрыве бяспекі Чорнага мора праз узброеную блакаду, выкарыстанні харчавання ў якасці зброі і спробах справакаваць глабальны голад. У апошнія тыдні Румынія і Балгарыя паведамлялі пра ўдары расійскіх беспілотнікаў паблізу сваіх тэрытарыяльных вод.

Яна таксама раскрытыкавала Маскву за адмову ад энергетычнага перамір’я і ўзмацненне бомбавых удараў па Украіне напярэдадні зімы.

«Украіна хоча міру больш за ўсіх, бо ўжо чатыры гады жыве пад бамбардзіроўкамі, і пачынаецца пяты год», — заявіла Калас.

Яна дадала, што Еўропа таксама зацікаўленая ў міры, а сцвярджэнні пра адваротнае няслушныя. Паводле яе слоў, адзіны бок, які не хоча міру, — гэта Расія.

Калас застаецца адной з найбольш рэзкіх еўрапейскіх крытыкаў збліжэння Трампа з Масквой. На мінулым тыдні ў інтэрв’ю Euronews яна назвала пагадненне аб пастаўках дызельнага паліва падарункам Пуціну.

У Бруселі падкрэсліваюць, што, нягледзячы на рост рознагалоссяў, супрацоўніцтва са Злучанымі Штатамі павінна працягвацца, каб уплываць на мірны працэс і абараняць інтарэсы Украіны.

У аўторак высокапастаўленыя прадстаўнікі Еўракамісіі, НАТА, Германіі, Францыі, Вялікабрытаніі і Польшчы вылецелі ў Осла для ўдзелу ў чарговым раўндзе перамоў.

• 7
• 0
• 0
• 0
• 0
• 0
• 0
• 0