Гранітныя пліты, крыжы, агароджы. Сям'я знайшла ў лесе могілкі хатніх жывёл
Звычайная прагулка па лесе пад Бабруйскам абярнулася для мясцовай сям’і непрыемным адкрыццём.
Усяго за сто метраў ад жылой забудовы мікрараёна Заходні яны выявілі стыхійныя могілкі хатніх жывёл, якія за апошнія гады разрасліся да маштабаў паўнавартаснага некропаля, піша Onliner.by.
Лясная ўскраіна літаральна ўсеяная магілкамі, абгароджанымі пластыкавымі і металічнымі агароджамі і ўпрыгожанымі вянкамі і кветкамі. А дзе-нідзе ёсць нават гранітныя помнікі або крыжы.
Чытач, які даслаў у рэдакцыю Onliner.by фатаграфіі, абурыўся такім падыходам, адзначыўшы, што пад выглядам захавання памяці пра жывёл лес ператвараецца ў захламленую звалку з пластыку і штучных матэрыялаў.
— Ну хочаце вы пахаваць сваю жывёлу — пасадзіце на гэтым месцы дрэва! І прыродзе зробіце добрую справу, і сабе арыенцір назаўсёды пакінеце. Я проста ўражаны тым, як нашы людзі любяць цягаць усялякае смецце ў лес. Тут штрафаваць трэба па поўнай праграме! — абурыўся мясцовы жыхар.
Між тым з пункту гледжання беларускага заканадаўства падобныя стыхійныя мемарыялы знаходзяцца па-за законам. Згодна з дзеючымі санітарнымі і ветэрынарнымі правіламі, хаваць памерлых хатніх жывёл у лясах, парках, дварах і любых іншых неўладкаваных месцах катэгарычна забаронена.
Целы жывёл юрыдычна прыраўноўваюцца да біялагічных адходаў, якія патрабуюць спецыялізаванай утылізацыі. Бескантрольныя пахаванні ў зямлі нясуць патэнцыйную экалагічную і санітарную пагрозу: раскладанне рэшткаў можа забруджваць глебу і грунтавыя воды, а таксама прыцягваць дзікіх жывёл або ствараць небяспеку для іншых хатніх гадаванцаў.
За стварэнне несанкцыянаваных могільнікаў і захламленне лесапаркавых зон прадугледжаная адміністрацыйная адказнасць — аж да значных штрафаў памерам да 30 базавых велічынь (сёння 1350 рублёў).
Цяпер чытаюць
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў106
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх2121
Каментары