ZŠA mohuć prymianić suprać Irana «maci ŭsich bombaŭ»

Pavodle krynic telekanała, novyja płany praduhledžvajuć mahčymyja ŭdary pa iranskaj enierhietyčnaj infrastruktury i jadziernych abjektach, kali prezident ZŠA Donald Tramp zahadaje adnavić bajavyja dziejańni — da pramiežkavych vybaraŭ u Kanhres u pačatku listapada abo paśla ich.

Jak śćviardžaje CNN, Tramp asabista daručyŭ vajskoŭcam raspracavać dadatkovyja varyjanty ŭdaraŭ pa iranskich celach. Adzin ź ich praduhledžvaje źniščeńnie značnaj častki enierhietyčnaj infrastruktury krainy z mahčymym vykarystańniem MOAB. Inšaja krynica paviedamiła, što hetuju bombu taksama ŭklučyli ŭ płany ŭdaraŭ pa iranskich jadziernych abjektach.

U apošnija miesiacy Tramp nieadnarazova pahražaŭ atakavać abjekt pad nazvaj «Hara Kirka», dzie, pavodle acenak ZŠA i Izraila, Iran zachoŭvaje kampanienty svajoj jadziernaj prahramy.

Amierykanskija vajskoŭcy zvyčajna prapanujuć palityčnamu kiraŭnictvu roznyja varyjanty dziejańniaŭ — ad prostych da składanych. Dla paražeńnia abjektaŭ, raźmieščanych hłyboka pad ziamloj, patrebnyja bojeprypasy z asablivymi charaktarystykami. Adnak ekśpierty sumniavajucca, što navat MOAB zmoža efiektyŭna źniščyć raźmieščanyja hłyboka pad ziamloj jadziernyja abjekty Irana, abaronienyja, u pryvatnaści, hranitnymi parodami.

MOAB — najmahutniejšaja niajadziernaja bomba ŭ arsienale ZŠA. Jaje masa składaje kala 9800 kiłahramaŭ. Bomba maje sistemu GPS-naviadzieńnia i vybuchaje jašče da sutyknieńnia ź ziamloj, stvarajučy mahutnuju ŭdarnuju chvalu. Pavodle acenak, jaje vybuch moža źniščyć usio na terytoryi, supastaŭnaj ź dzieviaćciu haradskimi kvartałami.

Bombu raspracavali padčas vajny ŭ Iraku. U 2003 hodzie, na zaklučnym etapie vyprabavańniaŭ, amierykanskija vajskoŭcy paviedamlali, što jana pryznačałasia najpierš dla psichałahičnaha ŭździejańnia.

Pry hetym Tramp raniej davaŭ zrazumieć, što nie zacikaŭleny ŭ maštabnaj naziemnaj apieracyi suprać Irana, jakaja mahła b kaštavać žyćcia tysiačam amierykanskich vajskoŭcaŭ. Častka pradstaŭnikoŭ jaho administracyi i niezaležnych analitykaŭ ličyć, što biez uviadzieńnia naziemnych vojskaŭ budzie ciažka dasiahnuć poŭnaha vajennaha razhromu Irana.

Jak adznačaje CNN, imknieńnie Trampa jak maha chutčej zaviaršyć kanflikt stvaraje dla jaho składanuju palityčnuju dylemu, asabliva napiaredadni pramiežkavych vybaraŭ u ZŠA.

• 0
• 0
• 2
• 2
• 0
• 0
• 0
• 0