Vyjšła kniha vieršaŭ Barysa Šterna ŭ biełaruskich pierakładach

Piśmieńnica i pierakładčyca Hanna Jankuta i pierakładčyk Ihar Krebs pierakłali i ŭkłali knihu, jakaja nieŭzabavie budzie dastupnaja dla pakupki praz sajt vydaviectva, piša bellit.info.

«U vydaviectva hochroth Minsk źjaviŭsia novy dośvied, kali aŭtary/aŭtarki paetyčnaj sieryi rekamiendujuć novych aŭtaraŭ/aŭtarak dla publikacyi. Bolš za toje, uklučajucca ŭ padrychtoŭku novych knih sieryi, — dzielicca navinoj u sacsietkach paet i vydaviec Dźmitry Strocaŭ. — Vydaviectvu zastavałasia tolki źviarstać i nadrukavać».

U afarmleńni knihi vykarystana ilustracyja Volhi Prankievič.

«Barys Štern dobra viadomy jak adzin ź pieršych biełaruskich radyjo-dydžejaŭ, muzyka i aŭtar ci suaŭtar piesień dla roznych viadomych hurtoŭ, adnak dahetul u jaho nie vychodziła nivodnaj paetyčnaj knihi. My daŭno maryli zrabić jaje razam. Kali ciapier vyrašyli źviarnucca da hochroth Minsk, ja pierakłaŭ šerah novych vieršaŭ Barysa i krychu papraviŭ raniejšyja pierakłady», — havoryć Ihar Krebs, jaki pačynaŭ pierakładać vieršy Barysa Šterna na biełaruskuju movu z rasijskaj jašče dla internet-časopisa pierakładnoj litaratury «PrajdziŚviet»

«Finalnaja kancepcyja knihi była prapanavanaja vydaŭcom, Dźmitryjem Strocavym — kab u knizie byli vieršy na dźviuch movach: pierakłady Ihara Krebsa na biełaruskuju, ale taksama niekalki vieršaŭ Barysa Šterna ŭ aryhinale — pa-rusku. Varta taksama zhadać, što ŭ knizie jość i vierš, napisany Barysam pa-biełarusku. Takoje spałučeńnie dźviuch movaŭ i habrejskaj tematyki (kniha nie prosta tak nazyvajecca «Miaža aniolskaj asiełaści»), jak mnie zdajecca — jaskravy prykład taho, jak u biełaruskaj kultury złučajucca roznyja identyčnaści», — tłumačyć Hanna Jankuta.

U maich kišeniach zavisajuć buklety
Van Hoh, Deha, Bosch, cyharety
Klučy, zapalnička i partmanet
Telefon z numarami i ŭ dadatak Mane

Zybin, Rotka, Ceśler, niešta matčyna…
Majo PTSR — amal što spadčyna
Usiudy harać lasy, uzdymajecca dym
Akiej, pierakanali, zastajusia žyvym

U słuchaŭkach Debiusi i Skrabin
Nam patrebny mir, kazaŭ stary Rabin
Susiedzi-sitchi vyniali śvietłavyja miačy
Na vajnie ŭsio prosta: kryčy — nie kryčy

U maich kišeniach usio sprava naleva
Nakidy tekstaŭ, kancoŭka prypievu
Spružynka hadzińnika, pažar i dym
Rujnujecca ŭsio: Vaviłon i Rym

*

śpiać tramvai dy biazvažka
ŭ rejkach błytajucca sny
i kanduktary ŭ furažkach
zasynajuć da viasny

im pryśniacca nie pucioŭki
nie ahni kala daroh
im prymrojacca cynoŭki
na cynoŭkach nasaroh

chaj splatajuć ahniakryła
ptuški čaradziejny ŭzor
kałychankaju panyłaj
zahučyć uzdych rysor

da viasny zima biazmała
i zhubiŭšy kalaju
rejki rejki špały špały
ja kanduktaru piaju

• 0
• 0
• 0
• 1
• 0
• 0
• 0
• 0