Cichanoŭskaja pabačyłasia ŭ Ńju-Jorku z «dziciom Biełarusi» Kianu Ryŭzam

Sustreča adbyłasia pierad cyrymonijaj uručeńnia premij Global Citizen Awards, jakuju štohod ładzić upłyvovy amierykanski analityčny centr Atlantic Council padčas Tydnia vysokaha ŭzroŭniu Hienieralnaj asamblei AAN.

Pierad asnoŭnaj častkaj viečara arhanizatary praviali nievialiki zakryty pryjom dla haściej katehoryi VVIP — «vielmi-vielmi važnych pierson». Tam častka biełaruskaj delehacyi, u tym liku Śviatłana Cichanoŭskaja, i sustrełasia z zorkaj «Matrycy» i «Džona Uika».

«Nas tut šmat»

Razmova nie abyšłasia bieź biełaruskaha žartu. U treciaj častcy «Džona Uika» hieroj Kianu Ryŭza nazyvaje svajo sapraŭdnaje imia — Džardani Jovanavič — i kaža, što naradziŭsia ŭ Biełarusi i źjaŭlajecca «dziciom Biełarusi».

Kamanda Cichanoŭskaj z hetaj nahody pierakinułasia žartam z kamandaj Ryŭza.

«Skazali im: «Viedajecie, siońnia ŭ hetym pakoi jon nie adzinaje dzicia Biełarusi, nas tut šmat». Usie vielmi paśmiajalisia», — raskazaŭ «Našaj Nivie» daradca Śviatłany Cichanoŭskaj pa dypłamatyi Dzianis Kučynski.

Pavodle jaho, u žyćci Ryŭz akazaŭsia takim ža prostym i adkrytym, jakim jaho časta apisvajuć ludzi, što sustrakalisia ź im raniej.

Što Kianu Ryŭz rabiŭ na palityčnym mierapryjemstvie

Kianu Ryŭz byŭ na cyrymonii pradstaŭlaŭ sa sceny adnaho z łaŭreataŭ — prezidenta i hienieralnaha dyrektara «Formuły-1» Stefana Damienikali.

Ryŭz daŭno cikavicca motasportam, a ŭ svajoj pramovie adznačyŭ, što pry Damienikali «Formuła-1» pieratvaryłasia ź mižnarodnaha čempijanatu ŭ suśvietnuju kulturnuju źjavu. 

Akramia Damienikali, uznaharody Global Citizen Awards sioleta atrymali prezident Finlandyi Alaksandr Stub, premjer-ministr Aŭstralii Entani Albanezie i brytanskaja aktrysa i śpiavačka Sincija Eryva. Na mierapryjemstvie sabrałasia bolš za 700 palitykaŭ, dypłamataŭ, kiraŭnikoŭ biznesu, pradstaŭnikoŭ miedyja i hramadskich arhanizacyj. 

Nie tolki sustreča z kinazorkaj

Śviatłana Cichanoŭskaja ŭžo niekalki hadoŭ naviedvaje cyrymoniju pa asabistym zaprašeńni kiraŭnictva Atlantic Council. Arhanizacyja paśladoŭna daje placoŭku biełaruskim demakratyčnym siłam i pravodzić dyskusii pra budučyniu Biełarusi.

Na toj ža cyrymonii Śviatłana Cichanoŭskaja parazmaŭlała z byłym dziaržaŭnym sakratarom ZŠA Majkam Pampiea i amierykanskim pradstaŭnikom pry AAN Majkam Uołcam.

A hod tamu na toj ža placoŭcy delehacyja Cichanoŭskaj sustrakałasia ź lehiendaj ukrainskaha futboła Andrejem Šaŭčenkam. 

• 30
• 3
• 5
• 1
• 1
• 0
• 0
• 4