Cichanoŭski adkazaŭ Cichanoŭskaj: Čamuści nie zhadvajecca, što reabilitacyja syna adbyvałasia ŭ kvaterach i damach, jakija ja kupiŭ
Były palitviazień dakazvaje padpisčykam, što mienavita jon apłačvaŭ reabilitacyju syna Karnieja.
Siarhiej Cichanoŭski i Śviatłana Cichanoŭskaja. Fota: Marek Antoni Iwanczuk NurPhoto via Getty Images
Były palitźniavoleny Siarhiej Cichanoŭski aburyŭsia apoviedam svajoj žonki Śviatłany Cichanoŭskaj pra ich dziaciej. Jon zapisaŭ videazvarot, u jakim adznačyŭ, što reabilitacyja syna Karnieja adbyłasia ŭ kuplenych im kvaterach i damach, a taksama što mienavita jon apłačvaŭ svajoj siamji pajezdki za miažu i pryjom u daktaroŭ.
Nahadajem, lidarka demakratyčnych sił Śviatłana Cichanoŭskaja na kanfierencyi ŭ Varšavie vystupiła z pramovaj pra niabačnuju pracu žančyn i raskazała, jak pryśviaciła dziesiać hadoŭ reabilitacyi syna Karnieja, jaki naradziŭsia z prablemami sa słycham. Tekst hetaha vystupu apublikavała «Lusterka», a ŭśled i inšyja miedyja.
Čytajcie: Cichanoŭskaja ščyra raskazała pra chvarobu syna i niabačnuju pracu žančyn. «Dziesiać hadoŭ svajho žyćcia ja pryśviaciła jamu i jaho reabilitacyi»
«My zrabili jamu apieracyju davoli pozna, stracili šmat času. I nastupnyja dziesiać hadoŭ svajho žyćcia ja pryśviaciła jamu i jaho reabilitacyi. Ja pamiataju hety čas biezvychodnaści, kali ty zadaješsia kučaj pytańniaŭ: čamu heta zdaryłasia z nami, ja ničoha nie ŭmieju, ničoha nie viedaju, napeŭna, my nikoli nie reabilitujemsia, jon nikoli nie zahavoryć. Ale kožny dzień zajmałasia ź im i sa śpiecyjalistam, razumiejučy, što heta zaraz maja rabota i ja całkam vykładvałasia», — raskazvała Cichanoŭskaja.
Jana adznačyła, što pobač ź joj była siamja, śpiecyjalisty i siabry.
«Synu pryjšłosia achviaravać dziacinstvam, kab stać narmalnym. I ciapier jon havoryć bieź pierapynku. Ja šalona ščaślivaja. Kali ludzi bačać majho syna, absalutna adukavanaje i erudziravanaje dzicia, jakoje biez prypynku raskazvaje niejkija historyi ź internetu, usie hladziać i dumajuć: jon havoryć, što tut takoha? Ničoha ž. I tolki vuzkaje koła ludziej razumieje, jakaja niabačnaja dziesiacihadovaja rabota była praviedziena. I mnie jość čym hanarycca nasamreč. Ja razumieju, što nie kožny hetuju niabačnuju rabotu z maim dziciem acenić, nie kožny jaje bačyć», — pryznałasia lidarka demakratyčnych sił.
Na jaje vystup adreahavaŭ Siarhiej Cichanoŭski.
«Havorycca, što Śviatłana sama, u adzinočku, 10 hadoŭ zmahałasia z chvarobaj syna i pieramahła. Na žal, heta chłuśnia. Naš syn nie reabilitavaŭsia całkam i maje surjoznyja psichičnyja prablemy», — zajaviŭ svajoj aŭdytoryi Cichanoŭski.
Na jaho dumku, pramova Śviatłany była «adkazam» na pytańnie, ci była Śviatłana vypadkovym čałaviekam da leta 2020 hoda: «Ofis sprabuje pierakanać usich, što jana była zmaharkaj. Prosta na inšym froncie».
Cichanoŭski vyrašyŭ adznačyć svoj uniosak: «U artykule nie zhadvajecca, što reabilitacyja adbyvałasia ŭ kvaterach i damach, jakija kupiŭ ja, na kurortach, što naładka [abstalavańnia dla syna] rabiłasia ŭ Varšavie i Piciery, što apłačvalisia pajezdki za miažu, vizy, lekary».
Cichanoŭski zaklikaŭ nie vykarystoŭvać dziaciej u palityčnych sprečkach.
Ciapier čytajuć
Usich studentak biełaruskich VNU abaviazali terminova zapoŭnić ankietu z paznačeńniem svajho rostu41
Kamientary
[Zredahavana]
[Zredahavana]