Aryštavany ministr pryrodnych resursaŭ vybraŭ «stratehiju Bryło»
Były ministr pryrodnych resursaŭ Siarhiej Maślak, jaki z sakavika siadzić u SIZA KDB, daŭ pakazańni na dziasiatki ludziej ź lasnoj haliny. Paśla jaho pakazańniaŭ u izalatar adzin za adnym jeduć laśničyja z rajonaŭ, a ŭ lashasach pustujuć kresły dyrektaraŭ i hałoŭnych laśničych.
12 sakavika 2026 hoda Łukašenka na naradzie mimachodź paviedamiŭ, što ministr pryrodnych resursaŭ i achovy navakolnaha asiarodździa Siarhiej Maślak znachodzicca ŭ SIZA. «Jaho ŭziali na haračym… Vinavaty — idzi i adkazvaj», — skazaŭ jon.
19 sakavika Maślaka vyzvalili ad pasady «ŭ suviazi z pravinnaściu, niesumiaščalnaj ź dziaržaŭnaj słužbaj». Novym ministram u červieni staŭ Maksim Łysienka.
Sprava Maślaka, jak stała viadoma «Našaj Nivie», dalokaja ad zaviaršeńnia. Čynoŭnik dahetul znachodzicca ŭ izalatary KDB i aktyŭna supracoŭničaje sa śledstvam, zahružajučy za saboj novych i novych ludziej.
«Maślak vybraŭ stratehiju Bryło, jaki, ułasna, byŭ u tym ža miescy i amal u toj ža čas. Pryniaŭ naviazanuju śledčymi hulniu «chočaš vyjści — zdaj siabra». Užo niejkija šarahovyja leśniki zajazdžajuć na SIZA KDB i ŭ pracesie pryznajuć chabary na $200», — stała viadoma ad čałavieka z haliny lasnoj haspadarki. Pa jahonych słovach, pa mnohich rajonach prajšlisia śledčyja KDB, tamu što «ministr niešta tam uspomniŭ pra naš rajon».
Hetaja infarmacyja supadaje z publičnymi danymi. U tym ža sakaviku-krasaviku było zatrymana bolš za dva dziasiatki rabotnikaŭ lasnoj haliny: majstry lesu, dyrektary lashasaŭ, hałoŭnyja śpiecyjalisty abłasnych lesahaspadarčych abjadnańniaŭ.
U adnym z epizodaŭ abvinavačanamu pastavili ŭ vinu atrymańnie častki — «nie mienš za 20 kiłahram» — śvinoj tušy za padbor lepšaj dzialanki dla narychtoŭvańnia lesu.
U lipieni 2026 hoda ŭ Dokšyckim laśnictvie raskryli schiemu kradziažu bolš za 230 kubamietraŭ draŭniny. U Vałožynie majstra ŭčastka asudzili na dva z pałovaj hady abmiežavańnia voli za chabar 400 rubloŭ. U žniŭni prakuratura pačała pravierku lashasaŭ Bresckaj vobłaści, u vieraśni kiraŭnik padraździaleńnia lashasa atrymaŭ dva hady kałonii i 18 tysiač rubloŭ štrafu za chabar 900 rubloŭ i hetak dalej.
Pavodle banka vakansij, ciapier šukajuć dyrektaraŭ Mahiloŭskaha i Klimavickaha lashasaŭ. U Smarhonskim lashasie sa staronki kiraŭnictva źnikli proźvišča i fota dyrektara, jak i ŭ Małaryckim. Vakansii hałoŭnych laśničych akrytyja ŭ Bychaŭskim, Navahradskim, Rasonskim, Dziśnienskim i inšych lashasach. Tolki niadaŭna zapoŭnili vakantnyja pasady hałoŭnych laśničych u Pastaŭskim i Homielskim lashasach.
U Centry padrychtoŭki kadraŭ Minlashasa źmianiŭsia dyrektar.
Čamu my nazyvajem pavodziny eks-ministra Maślaka padčas śledstva «stratehijaj Bryło»?
Ihar Bryło — były ministr sielskaj haspadarki, paśla pamočnik Łukašenki pa Viciebskaj vobłaści. KDB aryštavaŭ jaho ŭ listapadzie 2023 hoda pa «małočnaj spravie». Jon aktyŭna supracoŭničaŭ sa śledstvam i pryznaŭ chabary na 2 miljony dołaraŭ. Na pryznalnych pakazańniach Bryło, nakolki viadoma, i budavałasia abvinavačvańnie pa spravie.
U lipieni 2026 hoda sud prysudziŭ Bryło 12 hadoŭ kałonii.
46‑hadovy Siarhiej Maślak skončyŭ Biełaruski dziaržaŭny technałahičny ŭniviersitet i pačynaŭ pracoŭny šlach pamočnikam laśničaha ŭ Vołmianskim laśnictvie Minskaha lashasa. Potym pracavaŭ u «Biełhipralesie», kiravaŭ «Zielanbudam» Pieršamajskaha rajona Minska i Minskim haradskim kamitetam pryrodnych resursaŭ, piać hadoŭ byŭ kiraŭnikom administracyi Zavodskaha rajona. Ministram pryrodnych resursaŭ staŭ u krasaviku 2024 hoda.
Ciapier čytajuć
Redki vypadak: pamiłavany biełaruski palitviazień pajšoŭ na vajnu suprać Ukrainy18
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary