Kala «Instytuta kultury» znajšli cieła 26‑hadovaha minčuka. Zabojcu vyznačyli praz 16 hadoŭ
U kišeni zahinułaha lažała zapiska sa słovami «Ściopa, doŭh, 187****».
Zdareńnie adbyłosia viasnoj 2010 hoda. U Minsku kala stancyi mietro «Instytut kultury» adbyłosia žorstkaje zabojstva 26‑hadovaha chłopca. Vyjści na śled złačyncy śledčym udałosia praz 16 hadoŭ. Padrabiaznaści zabłytanaj spravy raskryła vydańnie «Na stražie».
U mai 2010 hoda ŭ kustach u dvary šmatpaviarchovika niepadalok ad stancyi «Instytut kultury» znajšli cieła maładoha mužčyny sa šmatlikimi nažovymi ranieńniami. Pobač lažaŭ kinuty nož z vyhraviravanym nadpisam «Žyć u miry».
Ekśpiertyza ŭstanaviła, što ŭdary nanosilisia sa śpiny. Paśla raspravy napadnik pieraviarnuŭ achviaru tvaram uvierch, adciahnuŭ uhłyb kustoŭ i nakryŭ hałavu sarvanym łopucham.
Niepadalok apieratyŭniki znajšli askiepki raźbitych butelek, płastykavyja šklanki sa śladami ałkaholu, pustuju piŭnuju blašanku i niedakurki. Śpiecyjalisty kanfiskavali adbitki palcaŭ i ŭzory DNK, adnak znajści supadzieńni ŭ isnych na toj čas bazach źviestak nie ŭdałosia.
Milicyja adpracoŭvała roznyja viersii, u tym liku źviazanuju z daŭhami: u kišeni zahinułaha lažała zapiska sa słovami «Ściopa, doŭh, 187****». Ale hetaja nitka zaviała śledstva ŭ tupik. Nie dało vyniku i vyznačeńnie ŭładalnika redkaha naža, choć pryładu zabojstva navat pakazvali pa telebačańni.
Pad padazreńnie trapili znajomyja zahinułaha, susiedzi, a taksama jaho sužycielka z bratami, ź jakimi niezadoŭha da trahiedyi ŭ jaho adbyŭsia kanflikt. Adnak va ŭsich było alibi.
«Usie začepki zachodzili ŭ tupik. Syščyki ŭstanavili bolš za 140 čałaviek, jakija ŭ toj majski viečar vyjšli z elektryčki na susiedniaj płatformie i išli praz złaščasny dvor. Byli apytanyja žychary navakolnych damoŭ i rabotniki kruhłasutačnych ustanoŭ. Pravieranyja kiroŭcy taksi, jakija dziažuryli ŭ rajonie, adpracavanyja raniej sudzimyja asoby i kalehi zahinułaha pa biźniesie. Bijałahičnyja ŭzory ŭziali amal u 600 čałaviek. Była praviedzienaja kałasalnaja rabota, ale tady jana nie pryniesła vyniku», — piša hazieta.
Padčas pieršaha rasśledavańnia pastupiŭ sihnał ad susiedki zabitaha.
Žančyna zajaviła, što nibyta viedaje złačyncu, i ŭkazała na 27‑hadovaha miascovaha žychara. Ale tady jaho dačynieńnie da złačynstva nie znajšło paćvierdžańnia.
Złačynstva ŭdałosia raskryć praz 16 hadoŭ, kali supracoŭniki kryminalnaha vyšuku HUUS Minharvykankama i Kastryčnickaha RUUS znoŭ viarnulisia da archiŭnych materyjałaŭ i paŭtorna apytali adnaho sa śviedak.
— My znoŭ pahavaryli z hetaj žančynaj, i jana pryznałasia: u 2010 hodzie jaje prymusili abhavaryć nievinavataha čałavieka, — paviedamiŭ načalnik adździeła ŭpraŭleńnia kryminalnaha vyšuku Minska padpałkoŭnik milicyi Andrej Bachar.
Jak vyśvietliłasia, u tyja hady minčanka ciesna kantaktavała z dvuma bratami — 29‑hadovym Alaksiejem i 31‑hadovym Ivanam (imiony źmienienyja). Mužčyny žyli ŭ susiednim padjeździe z zahinułym i pieryjadyčna vypivali razam.
U 2010 hodzie ich taksama dapytvali, ale dokazaŭ suprać ich nie znajšłosia. Śviedka pryznałasia: zabojstva ździejśniŭ mienavita małodšy z bratoŭ, paśla čaho zapałochaŭ jaje i zahadaŭ nakiravać śledstva pa iłžyvym śledzie.
Adnoŭlenaja karcina taho viečara vyhladaje tak: kampanija susiedziaŭ i ich pryjaciel raśpivali ałkahol na vulicy. U niejki momant pamiž zahinułym i Alaksiejem uźnik kanflikt. Małodšy brat vychapiŭ nož i na vačach u vidavočcaŭ zarezaŭ apanienta, paśla čaho zahadaŭ usim maŭčać.
Adkazać pierad sudom fihurantu tak i nie daviałosia: paśla zdareńnia jon pačaŭ ciažka pić i praz paŭtara hoda pamior ad cyrozu piačonki.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač22
Kamientary
Taksama tak liču. Ciapier na jaho ŭsio śpišuć.