Michałkoŭ zajaviŭ, što vajnu z Ukrainaj Rasii pasłaŭ Boh

Rasijski režysior i prapahandyst Mikita Michałkoŭ zajaviŭ, što vajna z Ukrainaj była «pasłana» Rasii Boham, kab rasijanie pierahledzieli svaje kaštoŭnaści. Na dumku Michałkova, toje, što adbyvajecca, pavinna było prymusić hramadstva «pračnucca» i zrazumieć, što sapraŭdy maje značeńnie ŭ hetym žyćci, paviedamlaje Moscow Times.

«Ja razumieju, što hetaja fraza davoli dziŭnaja, ale nam Hospad pasłaŭ «SVA», kab my apamiatalisia, kab my zrazumieli, čaho vartyja sapraŭdnyja kaštoŭnaści i jakija jany», — skazaŭ jon prapahandysckamu RT.

Razvažajučy pra sapraŭdnyja kaštoŭnaści, režysior asobna pieraściaroh ad praźmiernaj ciahi da zadavalnieńniaŭ. Pavodle jaho słoŭ, niebiaśpiečna, kali žyćcio pačynajuć vymiarać «kolkaściu i jakaściu zabaŭ».

U jakaści ilustracyi svajoj dumki Michałkoŭ raspavioŭ pra ekśpierymient ź biełaj myššu, jakoj, pavodle jaho słoŭ, dali mahčymaść atrymlivać zadavalnieńnie naciskańniem knopki.

«Navukoŭcy praviali ekśpierymient, jany ŭziali biełuju myš, padklučyli jaje da čahości i pakazali joj, što voś naciskaješ na knopku — i atrymlivaješ zadavalnieńnie. Jana nacisnuła adzin raz, dva, piać, potym jana prycisnuła knopku — i pamierła. Voś heta vielmi, tak by mović, pakazalny vobraz — adčuvańnie pastajannaha śviata, jakoje navat u hety čas nie spyniłasia, jano praciahvajecca», — zajaviŭ prapahandyst, nie ŭdakładniŭšy, jakija mienavita navukoŭcy i kali pravodzili apisany im ekśpierymient.

Pry hetym, dadaŭ jon, niekatoryja ludzi ŭžo razumiejuć, što «viesialicca rana nie varta».

Sam Michałkoŭ ad zadavalnieńniaŭ admaŭlacca nie śpiašajecca. Jon samy bahaty siarod rasijskich teleprapahandystaŭ: viadučy «Biesahona» na kanale «Rasija» atrymlivaje bolš za 270 młn rubloŭ u hod (na siońnia 3,1 młn dalaraŭ). Akramia taho, na rachunkach Michałkova ŭ roznych bankach znachodzicca bolš za 2,5 młrd rubloŭ (30 młn dalaraŭ), jakija štohod prynosiać jamu jašče kala miljony pracentaŭ.

Za apošnija hady Michałkoŭ pieratvaryŭsia ź viadomaha režysiora ŭ adnaho z najbolš prykmietnych prapahandystaŭ režymu.

U prahramie «Biesahon TV» jon raspaŭsiudžvaŭ antyzachodnija naratyvy i kanśpirałahičnyja teoryi, a rasijskaje ŭvarvańnie va Ukrainu nazyvaŭ «baraćboj z satanizmam» i «vyzvaleńniem Danbasa». Jon taksama abražaŭ rasijan, jakija vystupajuć suprać vajny i pakinuli krainu.

Režysior padtrymlivaje blizkija adnosiny z Uładzimiram Pucinym, jakoha nazyvaŭ «mahutnym lidaram suśvietnaj palityki, jaki ŭśviedamlaje histaryčnuju adkaznaść» pierad Rasijaj.

• 0
• 2
• 1
• 6
• 0
• 0
• 9
• 0