Арыштаваны міністр прыродных рэсурсаў выбраў «стратэгію Брыло»
Былы міністр прыродных рэсурсаў Сяргей Масляк, які з сакавіка сядзіць у СІЗА КДБ, даў паказанні на дзясяткі людзей з лясной галіны. Пасля яго паказанняў у ізалятар адзін за адным едуць ляснічыя з раёнаў, а ў лясгасах пустуюць крэслы дырэктараў і галоўных ляснічых.
12 сакавіка 2026 года Лукашэнка на нарадзе мімаходзь паведаміў, што міністр прыродных рэсурсаў і аховы навакольнага асяроддзя Сяргей Масляк знаходзіцца ў СІЗА. «Яго ўзялі на гарачым… Вінаваты — ідзі і адказвай», — сказаў ён.
19 сакавіка Масляка вызвалілі ад пасады «ў сувязі з правіннасцю, несумяшчальнай з дзяржаўнай службай». Новым міністрам у чэрвені стаў Максім Лысенка.
Справа Масляка, як стала вядома «Нашай Ніве», далёкая ад завяршэння. Чыноўнік дагэтуль знаходзіцца ў ізалятары КДБ і актыўна супрацоўнічае са следствам, загружаючы за сабой новых і новых людзей.
«Масляк выбраў стратэгію Брыло, які, уласна, быў у тым жа месцы і амаль у той жа час. Прыняў навязаную следчымі гульню «хочаш выйсці — здай сябра». Ужо нейкія шараговыя леснікі заязджаюць на СІЗА КДБ і ў працэсе прызнаюць хабары на $200», — стала вядома ад чалавека з галіны лясной гаспадаркі. Па ягоных словах, па многіх раёнах прайшліся следчыя КДБ, таму што «міністр нешта там успомніў пра наш раён».
Гэтая інфармацыя супадае з публічнымі данымі. У тым жа сакавіку-красавіку было затрымана больш за два дзясяткі работнікаў лясной галіны: майстры лесу, дырэктары лясгасаў, галоўныя спецыялісты абласных лесагаспадарчых аб'яднанняў.
У адным з эпізодаў абвінавачанаму паставілі ў віну атрыманне часткі — «не менш за 20 кілаграм» — свіной тушы за падбор лепшай дзялянкі для нарыхтоўвання лесу.
У ліпені 2026 года ў Докшыцкім лясніцтве раскрылі схему крадзяжу больш за 230 кубаметраў драўніны. У Валожыне майстра ўчастка асудзілі на два з паловай гады абмежавання волі за хабар 400 рублёў. У жніўні пракуратура пачала праверку лясгасаў Брэсцкай вобласці, у верасні кіраўнік падраздзялення лясгаса атрымаў два гады калоніі і 18 тысяч рублёў штрафу за хабар 900 рублёў і гэтак далей.
Паводле банка вакансій, цяпер шукаюць дырэктараў Магілёўскага і Клімавіцкага лясгасаў. У Смаргонскім лясгасе са старонкі кіраўніцтва зніклі прозвішча і фота дырэктара, як і ў Маларыцкім. Вакансіі галоўных ляснічых акрытыя ў Быхаўскім, Наваградскім, Расонскім, Дзісненскім і іншых лясгасах. Толькі нядаўна запоўнілі вакантныя пасады галоўных ляснічых у Пастаўскім і Гомельскім лясгасах.
У Цэнтры падрыхтоўкі кадраў Мінлясгаса змяніўся дырэктар.
Чаму мы называем паводзіны экс-міністра Масляка падчас следства «стратэгіяй Брыло»?
Ігар Брыло — былы міністр сельскай гаспадаркі, пасля памочнік Лукашэнкі па Віцебскай вобласці. КДБ арыштаваў яго ў лістападзе 2023 года па «малочнай справе». Ён актыўна супрацоўнічаў са следствам і прызнаў хабары на 2 мільёны долараў. На прызнальных паказаннях Брыло, наколькі вядома, і будавалася абвінавачванне па справе.
У ліпені 2026 года суд прысудзіў Брыло 12 гадоў калоніі.
46‑гадовы Сяргей Масляк скончыў Беларускі дзяржаўны тэхналагічны ўніверсітэт і пачынаў працоўны шлях памочнікам ляснічага ў Волмянскім лясніцтве Мінскага лясгаса. Потым працаваў у «Белгіпралесе», кіраваў «Зелянбудам» Першамайскага раёна Мінска і Мінскім гарадскім камітэтам прыродных рэсурсаў, пяць гадоў быў кіраўніком адміністрацыі Заводскага раёна. Міністрам прыродных рэсурсаў стаў у красавіку 2024 года.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы4
Каментары