Рубіа пра расійскія папярэджанні: Вырашаць, ці бяспечна нашым дыпламатам знаходзіцца ў Кіеве, мы будзем самі
Дзяржсакратар ЗША Марка Рубіа, каментуючы заклік Расіі да замежных дыпламатаў пакінуць Кіеў, заявіў, што ЗША ацэньваюць бяспеку сваёй дыпламатычнай місіі ва ўкраінскай сталіцы самастойна. На гэты момант амерыканская амбасада ў Кіеве працягвае працаваць, паведамляе «Еўрапейская праўда».
Рубіа адзначыў, што Расія ўжо некалькі месяцаў папярэджвае замежных дыпламатаў пра неабходнасць пакінуць Кіеў. Паводле яго слоў, для ЗША не з'яўляецца нечаканасцю тое, што ўкраінская сталіца падвяргаецца атакам.
«Паслухайце, у нас там ёсць амбасада, і мы самі будзем вырашаць, ці бяспечна ім там знаходзіцца, ці не… Яны ўжо некалькі месяцаў папярэджваюць дыпламатаў, каб тыя выязджалі, і я не думаю, што для кагосьці з'яўляецца нечаканасцю таго, што Кіеў зазнае атакі. Думаю, гэта усім добра зразумела», — сказаў Рубіа.
Дзяржсакратар ЗША падкрэсліў, што амерыканскі Дзярждэпартамент штодня аналізуе сітуацыю з бяспекай кожнай дыпламатычнай місіі ЗША ў свеце. Калі ўзнікае пагроза, якая, на думку амерыканскага боку, патрабуе змены становішча, ЗША прымаюць адпаведныя меры. Аднак у выпадку з амбасадай у Кіеве такога рашэння пакуль не прымалі.
Раней Міністэрства замежных спраў Расіі заклікала замежных грамадзян, у тым ліку супрацоўнікаў дыпламатычных місій, пакінуць Кіеў і прыгразіла новымі масіраванымі ўдарамі па ўкраінскай сталіцы.
Пасол Еўрапейскага саюза ва Украіне Катарына Матэрнава заявіла, што ўсе амбасады краін ЕС працягваюць працаваць у Кіеве, нягледзячы на расійскія пагрозы. Аналагічную пазіцыю выказала Міністэрства замежных спраў Польшчы.
Раней на расійскія пагрозы адрэагавала і Еўрапейская камісія. Там заявілі, што Еўрапейскі саюз працягне падтрымліваць Украіну і надалей узмацняць ціск на Расію.
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2222
Каментары