Пуцін змяніў «план перамогі»: замест прарыву на фронце — вайна гарадоў

Яшчэ ў 2024 годзе Уладзімір Пуцін заяўляў: «Нашы войскі прасоўваюцца па ўсёй лініі сутыкнення». Масква спадзявалася знясіліць украінскую армію і ўрэшце перамагчы на полі бою.

Аднак расійскі наступ не прынёс чаканага пералому, а страты працягваюць расці. Паводле ацэнак брытанскіх вайскоўцаў, якія прыводзіць Frankfurter Allgemeine Zeitung,

Расія страціла забітымі і параненымі каля 1,5 мільёна вайскоўцаў. Прыкладна 500 тысяч з іх маглі загінуць.

Таму, піша аглядальнік FAZ, Пуцін пераходзіць да іншага «плана перамогі» — так званай вайны гарадоў.

Яе мэта — сістэматычнымі ўдарамі па ўсёй тэрыторыі Украіны разбурыць эканоміку, ускладніць жыццё насельніцтва і прымусіць Кіеў прасіць міру.

Блізкі да расійскіх вайскоўцаў тэлеграм-канал Rybar апісвае гэты разлік яшчэ больш адкрыта: Украіну хочуць ператварыць у настолькі праблемны і затратны актыў, каб заходнім саюзнікам стала нявыгадна яе падтрымліваць. Пры гэтым ракеты і беспілотнікі, на думку аўтараў канала, абыходзяцца Расіі танней, чым утрыманне і папаўненне вялікай арміі на фронце.

Галоўнай мішэнню становіцца Кіеў

Швейцарскае выданне NZZ звяртае ўвагу на павелічэнне маштабу атак на ўкраінскую сталіцу. Расійскія беспілотнікі пачалі мэтанакіравана атакаваць кіеўскія масты цераз Дняпро.

Пасля некалькіх удараў Паўднёвы і Паўночны масты, а таксама мост Патона цалкам перакрывалі. Рух па мосце Метро, якім карыстаюцца аўтамабілі і цягнікі, абмяжоўвалі.

Пашкоджанне гэтых аб’ектаў можа паралізаваць значную частку сталіцы. Дняпро падзяляе Кіеў на дзве часткі: на правым беразе знаходзяцца дзяржаўныя ўстановы, бізнэс і значная частка працоўных месцаў, а на левым жывуць сотні тысяч людзей.

The New York Times папярэджвае пра магчымы «лагістычны кашмар». Магчымасцяў аб’ехаць пашкоджаныя масты амаль няма: найбліжэйшы аўтамабільны мост на поўдзень ад Кіева знаходзіцца прыкладна за 145 кіламетраў.

Адначасова Расія атакуе школы, пасажырскія цягнікі, запраўкі, памежныя пункты, склады, дата-цэнтры, медыцынскія сховішчы і прамысловыя прадпрыемствы. Адзін з беспілотнікаў трапіў у кіеўскую школу падчас заняткаў. Дзеці і настаўнікі паспелі схавацца ва ўкрыцці, таму ахвяр не было.

Перад гэтым былі пашкоджаныя будынак Акадэміі навук і радзільны дом.

«Расіяне не змаглі нас акупаваць. Таму цяпер яны здзяйсняюць масаваныя атакі і масавыя забойствы», — заявіў Уладзімір Зяленскі.

Паводле яго, украінская разведка атрымала звесткі, што Пуцін загадаў больш не прытрымлівацца ніякіх абмежаванняў: «Цяпер — ніякіх правілаў».

Разлік на зіму і слабую супрацьпаветраную абарону

Новая стратэгія Масквы становіцца больш небяспечнай праз недахоп ва Украіны сродкаў супрацьпаветранай абароны. Паводле NZZ, запасы ракет для амерыканскіх комплексаў Patriot значна скараціліся, а частка рэсурсаў ЗША цяпер ідзе на вайну з Іранам.

Адначасова Расія нарошчвае вытворчасць рэактыўных беспілотнікаў. Калі раней Украіна перахоплівала каля 90% паветраных цэляў, то ў верасні паказчык знізіўся да 55—57%.

Асаблівую стаўку Масква, на думку Конрада Шулера, робіць на наступную зіму. Удары па электрастанцыях, сістэмах ацяплення і прамысловых прадпрыемствах павінны стварыць цяжкія ўмовы для мільёнаў людзей і ўзмацніць эканамічны ціск на Кіеў.

Разам з тым Расія рыхтуецца не толькі да зімовай кампаніі, але і да працяглай вайны. У наступным годзе Масква плануе павялічыць вайсковыя выдаткі прыкладна на 40% у параўнанні з ранейшым планам.

• 0
• 0
• 1
• 0
• 0
• 2
• 27
• 0