Лукашэнка згадаў беларуску, якая нарадзіла тройню і атрымала кватэру
І паставіў яе ў прыклад работнікам Інстытута парашковай металургіі.
Лукашэнка сёння падчас наведвання выпрабавальнага палігона Інстытута парашковай металургіі мімаходзь выказаўся пра беларуску, якая нарадзіла тройню і атрымала кватэру.
Звяртаючыся да аднаго з кіраўнікоў інстытута, ён зазначыў, што калі па тым ці іншым запатрабаваным напрамку будзе вынік, то і ён асабіста, і дзяржава ў цэлым заўсёды акажуць неабходную падтрымку: «Зрабі і прыходзь, як я часта кажу, прасі, чаго захочаш».
Ён прывёў у прыклад, як жанчына, якая нарадзіла тройню, папрасіла кватэру.
«Жанчына нарадзіла тройню. А я неяк языком ляпнуў: прыходзь і прасі кватэру. Яна папрасіла, я аддаў. Так і ты, прыходзь і прасі, я буду выконваць», — сказаў Лукашэнка.
Гісторыя 25‑гадовай Ангеліны Камінскай грымнула некалькі тыдняў таму. 28 жніўня жанчына стала адразу шматдзетнай маці. На 35 тыдні беларуска нарадзіла трох дзяўчынак вагой 2130, 2050 і 1940 грамаў. Назвалі іх Стэфанія, Ясенія і Ева.
Напачатку верасня Ангеліна запісала зварот да Лукашэнкі з просьбай даць ёй кватэру — бо ў Год беларускай жанчыны яна падарыла краіне трох цудоўных жанчын. Відэа дзяўчыны ў інстаграме сабрала больш за 7 мільёнаў праглядаў.
Зварот выклікаў вялікі рэзананс у беларускім грамадстве. Адны захапляліся смеласцю Ангеліны, іншыя палічылі гэта нахабствам.
Праз пару тыдняў сям'я атрымала кватэру.
«Нашы дзяўчаткі і мы сустрэнем Новы год ужо ў сваім новым жыллі», — падзялілася ў інстаграме Ангеліна і паказала ключы.
Дзяўчына падзякавала Лукашэнку за тое, што «жыллёвае пытанне настолькі добра і хутка вырашылася».
Герой Беларусі Марына Васілеўская нарадзіла дачку ад касманаўта Алега Навіцкага16
Каментары