Сталініста-ябацьку з Гомеля затрымалі пасля таго, як ён запрасіў Лукашэнку на гвалтоўнае закрыццё свайго трэцяга кафэ

Праз канфлікт з уладамі Віталь ужо згубіў два свае бізнэсы — забягалаўку «Пінта» ля кірмашу ў Гомелі (дарэчы, яе прадпрымальнік апаганіў вялізным банерам з фотаздымкам Сталіна) ды летняе кафэ на Цэнтральным пляжы. Зрабілі ўсё элегантна — проста адмаўляліся працягваць дамову арэнды.

Віталь скардзіўся сябрам, што пад час зносу яго кафэ скралі шмат дарагога абсталявання, якое ён ніяк не можа атрымаць назад. 

Цяпер жа надышла чарга яго трэцяга, больш маштабнага праекту. Гаворка ідзе пра кафэ «Лявада». У інстаграме яго пазіцыянуюць як шацёр, які змяшчае да 150 чалавек. Там праводзяць вяселлі, святкуюць дні нараджэння, праводзяць карпаратывы ды выпускныя. Знаходзіцца «Лявада» ў парку Выпускнікоў трэцяга тысячагоддзя.

Павялічыць

Гісторыя паўтараецца адзін у адзін. Улады адмовіліся працягваць арэнду і патрабуюць усё прыбраць. Драбышэўскі ў жаху ад такіх навін: ён называе гэты праект сваім дзіцём.

Кажа, што прысвяціў яму амаль палову жыцця — у 17 гадоў набыў піўны ларок, з якога зрабіў прыстойнае месца.

Каля тыдня таму Віталь вырашыў зноў звярнуцца да Лукашэнкі з просьбай выратаваць яго бізнэс. Ён так ужо рабіў летась, калі разбуралі «Пінту» — але з нулявым рэзультатам.

У новым відэа Драбышэўскі заклікае Лукашэнку наведаць «Ляваду» да 26 кастрычніка (гэта апошні дзень працы кафэ), каб «асабіста пераканацца ў беззаконні, якое адбываецца ў Гомелі з боку праваахоўных, кантралюючых органаў, мясцовых органаў улады». Па словах Віталя, ён атрымаў адмову аб падаўжэнні дамовы арэнды на падставе нібыта не мэтавага выкарыстання ці канфіскацыі для дзяржаўных патрэб.

«Паважаны Аляксандр Рыгоравіч! Вам словамі не перадаць, як гэта, калі на тваіх вачах раздзіраюць дзіця, якое ты не можаш абараніць. Якое ты гадаваў увесь гэты час, укладаў душу, сілы», — кажа Драбышэўскі і дадае, што моцна хвалюецца і яму вельмі цяжка запісваць зварот. 

Сцвярджае, што гэтае месца акрамя яго нікому не патрэбна, бо паўсюль навокал бур'ян — ахвотных рабіць нешта няма. 

«Паважаны Аляксандр Рыгоравіч, я вас вельмі моцна прашу, прыязджайце. Вы самі ўсё ўбачыце, што сапраўды ёсць не проста перагібы, а менавіта шкодніцтва, тое самае. Вы патрабуеце ад вашых падначаленых, каб эканоміка была на першым месцы, а ў іх на першым месцы амбіцыі. Ну проста незразумела. Або яны гэта робяць знарок, каб людзей раззлаваць, таму што я не адзін такі. Людзі звяртаюцца да мяне, людзі бачаць, як я змагаюся з несправядлівасцю».

Праз некалькі дзён пасля публікацыі відэа ў трэдсах Віталь тэгнуў афіцыйныя акаўнты пракуратуры і міліцыі. Ён папрасіў тэрмінова звязацца з ім, каб «пазбегнуць катастрофы». У хуткім часе дадаў, што з ім звязаліся са штабу МУС — і сам знік.

Як стала вядома «Нашай Ніве», Драбышэўскага зноў затрымалі за «распаўсюд экстрэмісцкай прадукцыі» (артыкул 19.11 КаАП). Прыблізна да сярэдзіны кастрычніка сталініст-ябацька будзе за кратамі.

Нагадаем, Віталь Драбышэўскі, прадпрымальнік з Гомеля, заўсёды публічна падтрымліваў Лукашэнку. Ён называе палітыка Бацем, публікуе яго цытаты і не лянуецца ездзіць у Мінск на хакейныя матчы.

Павялічыць

Мужчына з энтузіязмам удзельнічае ў любых мерапрыемствах пад чырвона-зялёным сцягам — на адным з іх нават вітаўся з Аляксандрам Лукашэнкам за руку, а на іншым сфатаграфаваўся з Колем.

Больш, чым Лукашэнку, Віталь любіць хіба што толькі Сталіна — у верасні распачаў збор латуні ў Гомелі для таго, каб перадаць матэрыял у расійскі горад Бор, дзе хочуць паставіць помнік тырану.

Павялічыць

У свабодны час сталініст палюе на «збеглых» у сацсетках і піша абразлівыя каментары. 

Павялічыць

Адначасова з тым Віталь атрымлівае праблему за праблемай ад уладаў. Актывіст закідвае скаргамі чыноўнікаў самага рознага ўзроўню — дайшоў і да Наталлі Качанавай, але і там яго «не зразумелі».

Косткай у горле стаў Драбышэўскі шмат для каго: яго забанілі ў праўладных інстаграмах — ад акаўнта БелЭкспа да Прэзідэнцкага спартыўнага клуба. Віталь, дарэчы, спрабаваў праз суд дамагчыся таго, каб яго разбанілі ўсюды.

Павялічыць

Выгналі мужчыну і з «Патрыётаў Беларусі» — грамадскага аб’яднання, якое аператыўна стваралі ў 2020 годзе, каб ладзіць добраахвотна-прымусовыя аўтапрабегі ў падтрымку Лукашэнкі. Драбышэўскі адным з першых падключыўся да ініцыятывы. Але нават аднадумцы ад яго ўжо адхрысціліся — пакрыўдзіліся, што Драбышэўскі называў іх патрыётамі за грошы. 

Павялічыць

Ужо не першы год сілавікі з’яўляюцца частымі гасцямі ў кватэры сталініста. Таго прэсінгу не вытрымала яго жонка — і кінула Драбышэўскага. А яму самому давялося ісці працаваць у таксі.

• 7
• 1
• 57
• 8
• 1
• 0
• 0
• 1