Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe
«Kali łaska, tavaryš prezident, pryjazdžajcie!», — ślozna prasiŭ Vital Drabyšeŭski. A praź niekalki dzion źnik.
Praz kanflikt z uładami Vital užo zhubiŭ dva svaje biznesy — zabiahałaŭku «Pinta» la kirmašu ŭ Homieli (darečy, jaje pradprymalnik apahaniŭ vializnym banieram z fotazdymkam Stalina) dy letniaje kafe na Centralnym plažy. Zrabili ŭsio elehantna — prosta admaŭlalisia praciahvać damovu arendy.
Vital skardziŭsia siabram, što pad čas znosu jaho kafe skrali šmat darahoha abstalavańnia, jakoje jon nijak nie moža atrymać nazad.
Ciapier ža nadyšła čarha jaho treciaha, bolš maštabnaha prajektu. Havorka idzie pra kafe «Lavada». U instahramie jaho pazicyjanujuć jak šacior, jaki źmiaščaje da 150 čałaviek. Tam pravodziać viasielli, śviatkujuć dni naradžeńnia, pravodziać karparatyvy dy vypusknyja. Znachodzicca «Lavada» ŭ parku Vypusknikoŭ treciaha tysiačahodździa.
Historyja paŭtarajecca adzin u adzin. Ułady admovilisia praciahvać arendu i patrabujuć usio prybrać. Drabyšeŭski ŭ žachu ad takich navin: jon nazyvaje hety prajekt svaim dziciom.
Kaža, što pryśviaciŭ jamu amal pałovu žyćcia — u 17 hadoŭ nabyŭ piŭny łarok, ź jakoha zrabiŭ prystojnaje miesca.
Kala tydnia tamu Vital vyrašyŭ znoŭ źviarnucca da Łukašenki z prośbaj vyratavać jaho biznes. Jon tak užo rabiŭ letaś, kali razburali «Pintu» — ale z nulavym rezultatam.
U novym videa Drabyšeŭski zaklikaje Łukašenku naviedać «Lavadu» da 26 kastryčnika (heta apošni dzień pracy kafe), kab «asabista pierakanacca ŭ biezzakońni, jakoje adbyvajecca ŭ Homieli z boku pravaachoŭnych, kantralujučych orhanaŭ, miascovych orhanaŭ ułady». Pa słovach Vitala, jon atrymaŭ admovu ab padaŭžeńni damovy arendy na padstavie nibyta nie metavaha vykarystańnia ci kanfiskacyi dla dziaržaŭnych patreb.
«Pavažany Alaksandr Ryhoravič! Vam słovami nie pieradać, jak heta, kali na tvaich vačach raździrajuć dzicia, jakoje ty nie možaš abaranić. Jakoje ty hadavaŭ uvieś hety čas, układaŭ dušu, siły», — kaža Drabyšeŭski i dadaje, što mocna chvalujecca i jamu vielmi ciažka zapisvać zvarot.
Śćviardžaje, što hetaje miesca akramia jaho nikomu nie patrebna, bo paŭsiul navokał burjan — achvotnych rabić niešta niama.
«Pavažany Alaksandr Ryhoravič, ja vas vielmi mocna prašu, pryjazdžajcie. Vy sami ŭsio ŭbačycie, što sapraŭdy jość nie prosta pierahiby, a mienavita škodnictva, toje samaje. Vy patrabujecie ad vašych padnačalenych, kab ekanomika była na pieršym miescy, a ŭ ich na pieršym miescy ambicyi. Nu prosta niezrazumieła. Abo jany heta robiać znarok, kab ludziej razzłavać, tamu što ja nie adzin taki. Ludzi źviartajucca da mianie, ludzi bačać, jak ja zmahajusia ź niespraviadlivaściu».
Praź niekalki dzion paśla publikacyi videa ŭ tredsach Vital tehnuŭ aficyjnyja akaŭnty prakuratury i milicyi. Jon paprasiŭ terminova źviazacca ź im, kab «paźbiehnuć katastrofy». U chutkim časie dadaŭ, što ź im źviazalisia sa štabu MUS — i sam źnik.
Jak stała viadoma «Našaj Nivie», Drabyšeŭskaha znoŭ zatrymali za «raspaŭsiud ekstremisckaj pradukcyi» (artykuł 19.11 KaAP). Pryblizna da siaredziny kastryčnika stalinist-jabaćka budzie za kratami.
Nahadajem, Vital Drabyšeŭski, pradprymalnik z Homiela, zaŭsiody publična padtrymlivaŭ Łukašenku. Jon nazyvaje palityka Baciem, publikuje jaho cytaty i nie lanujecca jeździć u Minsk na chakiejnyja matčy.
Mužčyna z entuzijazmam udzielničaje ŭ lubych mierapryjemstvach pad čyrvona-zialonym ściaham — na adnym ź ich navat vitaŭsia z Alaksandram Łukašenkam za ruku, a na inšym sfatahrafavaŭsia z Kolem.
Bolš, čym Łukašenku, Vital lubić chiba što tolki Stalina — u vieraśni raspačaŭ zbor łatuni ŭ Homieli dla taho, kab pieradać materyjał u rasijski horad Bor, dzie chočuć pastavić pomnik tyranu.
U svabodny čas stalinist paluje na «źbiehłych» u sacsietkach i piša abraźlivyja kamientary.
Adnačasova z tym Vital atrymlivaje prablemu za prablemaj ad uładaŭ. Aktyvist zakidvaje skarhami čynoŭnikaŭ samaha roznaha ŭzroŭniu — dajšoŭ i da Natalli Kačanavaj, ale i tam jaho «nie zrazumieli».
Kostkaj u horle staŭ Drabyšeŭski šmat dla kaho: jaho zabanili ŭ praŭładnych instahramach — ad akaŭnta BiełEkspa da Prezidenckaha spartyŭnaha kłuba. Vital, darečy, sprabavaŭ praz sud damahčysia taho, kab jaho razbanili ŭsiudy.
Vyhnali mužčynu i z «Patryjotaŭ Biełarusi» — hramadskaha abjadnańnia, jakoje apieratyŭna stvarali ŭ 2020 hodzie, kab ładzić dobraachvotna-prymusovyja aŭtaprabiehi ŭ padtrymku Łukašenki. Drabyšeŭski adnym ź pieršych padklučyŭsia da inicyjatyvy. Ale navat adnadumcy ad jaho ŭžo adchryścilisia — pakryŭdzilisia, što Drabyšeŭski nazyvaŭ ich patryjotami za hrošy.
Užo nie pieršy hod siłaviki źjaŭlajucca častymi haściami ŭ kvatery stalinista. Taho presinhu nie vytrymała jaho žonka — i kinuła Drabyšeŭskaha. A jamu samomu daviałosia iści pracavać u taksi.
«Naša Niva» — bastyjon biełaruščyny
PADTRYMAĆHomielski «ruskamirac» natchniŭsia Rakasoŭskim i zapatrabavaŭ pastavić u Homieli pomnik Stalinu
Dziaržvydańnie razmazała pradprymalnika-łukašysta, jaki praz tyktok skardziŭsia Łukašenku na miascovyja ŭłady
Homielski biznesoviec-łukašyst, jaki vajuje za Stalina, napisaŭ danos sam na siabie
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5656
Kamientary
A, užo aryštavali? tavaryš stalin praizašła užasnaja ašybka