Dziaržvydańnie razmazała pradprymalnika-łukašysta, jaki praz tyktok skardziŭsia Łukašenku na miascovyja ŭłady
Vital Drabyšeŭski ślozna prasiŭ Łukašenku vyratavać jahony biźnies, bo, pavodle Vitala, jaho kafe «pa-bandycku źniščana» ŭładami Homiela. Ale ŭ homielskich uładaŭ jość abłasnoje vydańnie «Homielskaja praŭda», jakoje nie stała maŭčać i prypomniła pradprymalniku ŭsio.
«Hučny videazvarot homielskaha pradprymalnika: zvyčajnaja myšynaja vałtuźnia i škurny intares», — adrazu rasstavili kropki homielskija prapahandysty.
Jak raspaviadaje vydańnie, pradprymalnik arendavaŭ ziamlu kala Centralnaha rynku ŭ Homieli da 2020 hoda. U 2022-m dahavor byŭ padoŭžany jašče na dva hady, ale z umovaj, što indyvidualny pradprymalnik praviadzie madernizacyju paviljona. Termin paznačyli da 26 červienia 2024-ha. Ale patrabavańnie jon nie vykanaŭ, nie vyzvaliŭ učastak i admoviŭsia pierajechać na prapanavanaje inšaje miesca, choć inšyja handlary heta zrabili.
Čynoŭniki raspracavali prajekt dobraŭparadkavańnia hetaj terytoryi, ale Drabyšeŭski praihnaravaŭ patrabavańni vyzvalić ziamlu i źviarnuŭsia ŭ sud, jaki admoviŭ jamu. Paśla hetaha paviljon byŭ źniesieny administracyjaj.
Da taho ž, žychary rajona raniej skardzilisia na šum, nieachajnaść i parušeńni sanitarnych normaŭ z boku pradprymalnika.
«Paviljon prybrali ŭsiaho niekalki dzion tamu, ale rajonnaja administracyja ŭžo paśpieła atrymać padziaku ad haradžan za naviedzieny paradak. U Hod dobraŭparadkavańnia heta asabliva važna», — piša vydańnie.
Prajšłasia hazieta i pa patryjatyzmu łukašenkaŭskaha prychilnika.
«Drabyšeŭski ŭsiudy znaročysta maluje ź siabie patryjota. Ale kali b jon sapraŭdy im byŭ, to nie dapuskaŭ by parušeńniaŭ zakanadaŭstva i ŭtrymlivaŭ svoj handlovy abjekt u naležnym vyhladzie, dobraŭparadkavaŭ prylehłuju terytoryju», — miarkujuć prapahandysty.
I jašče niekalki zaŭvah znajšłosia ŭ homielskaha vydańnia da pradprymalnika. Naprykład, toj niedastatkova dobra viedaje cytaty Stalina.
«Na videa hamialčuk kaža: «Hetyja ludzi zryvali partret Iosifa Visaryjonaviča Stalina ŭ hod 80-hodździa Pieramohi nad fašystami». Što jon maje na ŭvazie? Niejki čas tamu Drabyšeŭski zdahadaŭsia raźmiaścić na svaim paviljonie, dzie pradavali piva i zakuski, vialiki baner z partretam pravadyra. Pry hetym svaju ideju nie ŭzhadniŭ z orhanami ŭłady. Zatoje ŭ partreta horda krasavałasia cytata: «Našie dieło pravoje, vrah budiet raźbit, pobieda budiet za nami!» Tolki voś jana Stalinu nie naležyć. Heta zaklučnaja fraza zvarotu da savieckaha narodu, jakoje namieśnik Staršyni Savieta narodnych Kamisaraŭ SSSR Viačasłaŭ Mołataŭ začytaŭ 22 červienia 1941 hoda — u dzień pačatku Vialikaj Ajčynnaj vajny. Jak havorycca, vučy matčastku, pradprymalnik!» — saromieje stalinista vydańnie.
Da taho ž, pišuć prapahandysty, na momant znosu pałatki baniera na joj nie było.
«Dy i ŭvohule napružvaje tendencyja, što ludzi, jakija zahadzia viedajuć, što jany nie majuć racyi, sprabujuć vyrašać svaje pytańni z dapamohaj tyktoka», — narakaje vydańnie.
Dabivajučy pradprymalnika, jaki vystupiŭ suprać miascovych uładaŭ, vydańnie raskazvaje «ŭsiu praŭdu»: pryciahvaŭsia da adkaznaści za niezakonnuju pradprymalnickuju dziejnaść — pradavaŭ ałkahol bieź licenzii; zachoŭvaŭ ałkahol biez dakumientaŭ na terytoryi Centralnaha plaža, dzie ŭ jaho znachodzicca jašče adzin handlovy abjekt; samavolna zaniaŭ płošču, bolšuju za vydzieleny jamu ziamielny ŭčastak.
«I višańka na torcie. U krasaviku hetaha hoda Drabyšeŭski atrymaŭ štraf u pamiery dziesiaci bazavych vieličyniaŭ (420 rubloŭ) za padpiski na ekstremisckija resursy. Jon z rašeńniem nie pahadziŭsia, abskardziŭšy jaho ŭ abłasnym sudzie. Pasiadžeńnie adbudziecca 25 červienia», — paviedamlaje vydańnie.
I apošnim vydańnie nazyvaje toje, što «videazvarot Drabyšeŭskaha tut ža padtrymaŭ i musolić ekstremiscki telehram-kanał. «Supadzieńnie? Nie dumaju», — zabivaje apošni ćvik «Homielskaja praŭda».
Zasnavalnikami abłasnoj haziety «Homielskaja praŭda» źjaŭlajucca abłasnyja ŭłady — Homielski abłasny vykanaŭčy kamitet, Homielski abłasny Saviet deputataŭ.
Ciapier čytajuć
«Razahnać darmajedaŭ! Addać ludziam ziamlu!» Traktaryst z Chojnikaŭ, jaki ciapier žyvie ŭ Łatvii, paraŭnaŭ sielskuju haspadarku tam i ŭ nas13
Kamientary