KDB sprabavaŭ zavierbavać pravaabaroncu Alenu Tankačovu. Jaje departavali ź Biełarusi

Alena Tankačova kala 10:30 ranicy 29 studzienia vyjšła vyhulać sabaku, i jaje zatrymała hrupa zachopu. Zatrymańnie adbyłosia kala padjezda doma ŭ Minsku.

Da 14:00 pravodziŭsia pieratrus. Siłaviki šukali «pradmiety, dakumienty i inšyja abstaviny, jakija byli b źviazanyja z padtrymkaj ekstremisckaj dziejnaści jak unutry Biełarusi, tak i za jaje miežami».

Alena Tankačova była dapytanaja ŭ jakaści śviedki ŭ haradskim upraŭleńni KDB. Dopyt doŭžyŭsia prykładna da 1:30 30 studzienia.

Uvieś hety čas pravaabaroncu sprabavali schilić da supracoŭnictva.

«Heta značyć, ich cikavili pravaabarončyja hrupy za miažoj i ŭnutry krainy. U pieršuju čarhu. I pytańni taho, jakim čynam arhanizavana albo isnuje donarskaja dapamoha. Ad supracoŭnictva admoviłasia», — raspaviała Alena Reform.news.

Ranicaj Alenie Tankačovaj paviedamili, što jana budzie departavanaja. U Tankačovaj rasijskaje hramadzianstva, ale jana bolš za 35 hadoŭ žyvie ŭ Biełarusi.

«Na praciahu nastupnaha dnia prymałasia rašeńnie, šukaŭsia sposab departacyi. Z ranicy mnie ŭžo paviedamili, što ja budu departavanaja. Z momantu majho zatrymańnia kala padjezda ŭłasnaha doma 29 čysła ja nie mahła bolš viarnucca dadomu. U vyniku ja na siońniašni dzień znachodžusia ŭ Rasijskaj Fiederacyi», — patłumačyła jana.

Pravaabaronca padziakavała ŭsim, chto dapamoh joj u hetyja dni, chto pakłapaciŭsia pra chatnich žyvioł, dapamoh kupić kvitki.

«I paŭtaru jašče raz, asnoŭnaja zadača była — padpisańnie dakumientaŭ ab supracoŭnictvie i dalejšym patencyjnym danosie na maich kaleh i siabroŭ, jakija znachodziacca pa-za miežami Respubliki Biełaruś pa viadomych pryčynach. Ad hetaha ŭzajemadziejańnia ja admoviłasia. Mnie było skazana, što ŭsie dalejšyja nastupstvy — heta vynik majho rašeńnia admovy ad supracoŭnictva», — patłumačyła jana.

Alena Tankačova paprasiła papiaredzić jaje znajomych i kalehaŭ, što jaje technika znachodzicca ŭ KDB i mahčymyja pravakacyi.

«Usie ludzi, jakija byli sa mnoj u kamunikacyi, u śpisie maich kantaktaŭ (u telefonnaj zapisnoj knižcy, va ŭsich miesiendžarach), kali łaska, vydalicie kantakty maje. Moj telefon i maje dva kamputary znachodziacca ŭ Kamitecie dziaržbiaśpieki», — paviedamiła Tankačova.

Alena Tankačova bolš za 30 hadoŭ aktyŭna zajmajecca prasoŭvańniem i abaronaj pravoŭ čałavieka ŭ Biełarusi. U 1996 hodzie jana zasnavała «Centr pravavoj transfarmacyi». Raniej Tankačovu ŭžo dapartavali ź Biełarusi — 13 listapada 2014 ułady anulavali vid na žycharstva pravaabaroncy i vysłali jaje z krainy. U Biełaruś jana zmahła viarnucca tolki ŭ lutym 2018 hoda. Da 2026 hoda jana zastavałasia ŭ Biełarusi.

• 0
• 1
• 2
• 0
• 0
• 6
• 17
• 1