Amierykanskaja harnałyžnica Lindsey Vonn paviedamiła, što paśla traŭmy na Alimpijadzie ŭ Miłanie-2026 joj mahli amputavać nahu. Von upała padčas chutkasnaha spusku na Hulniach, z trasy jaje evakujavali viertalotam.
— U mianie składany pierałom vialikabiarcovaj kostki i pierałom hałoŭki małabiarcrvaj kostki — tam usio raźlaciełasia na častki. Situacyju ŭskładniŭ kampartmient-sindrom. Heta kali ŭ adnoj častcy cieła pry takoj šyrokaj traŭmie nazapašvajecca zanadta šmat kryvi — i jana «zastraje». Pa sutnaści, pierastaje pracavać usio: ciahlicy, niervy. Usio pačynaje admirać. Tamu doktar Tom Chekiet vyratavaŭ maju nahu. Vyratavaŭ ad amputacyi.
Jon pravioŭ fascyjatamiju: razrezaŭ levuju nahu z dvuch bakoŭ, kab dać joj «dychać». Hetym doktar i vyratavaŭ maju nahu. Pryčym jaho mahło b tam uvohule nie być, kali b raniej ja nie parvała kryžapadobnuju źviazku — jon by nie supravadžaŭ mianie. I nie zmoh by ŭ hety momant vyratavać maju nahu. Heta da razmovy pra toje, što ŭ žyćci ničoha nie adbyvajecca prosta tak.
Ja praviała ŭ balnicy bolš času, čym spadziavałasia, bo ŭ mianie mocna źniziŭsia ŭzrovień hiemahłabinu — z-za straty kryvi paśla apieracyj. Mnie rabili pieralivańni kryvi, i heta vielmi dapamahło. U niejki momant bol byŭ žachlivy, niekantralujemy.
Ciapier mianie narešcie vypisali, pakul ja ŭ invalidnym vazku. Jašče niekatory čas zmahu pieramiaščacca tolki tak, bo ŭ mianie złamanaja i pravaja ščykałatka. Spadziajusia, chutka zmahu pierajści na mylicy — jašče paru miesiacaŭ pachadžu ź imi.
Nie mahu pieradać, nakolki heta ŭsio było baluča. Nie tak ja chacieła zaviaršyć Alimpijadu. Ale ničoha nie zastajecca, jak prymać udary losu. Hety, praŭda, adpraviŭ mianie ŭ nakaŭt. Ale ja jak Roki — usio roŭna ŭstanu, — cytuje Von sports.ru.
Lindsi Von padčas etapu Kubka śvietu ŭ Šviejcaryi 30 studzienia parvała piaredniuju kryžapadobnuju źviazku levaha kalena. Niahledziačy na takuju ciažkuju traŭmu, 41‑hadovaja amierykanka advažyłasia vystupić na Alimpijadzie, dzie ŭpała padčas pieršaha spusku.
Lindsi — adna z samych tytułavanych harnałyžnic u historyi. Uvosień 2024 hoda jana viarnułasia ŭ sport paśla piacihadovaha pierapynku i zamieny kalennaha sustava ŭ levaj nazie.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii7
Kamientary